🔥الصفحة 44🔥(مكتملة الجزء الاول)

part165

📜 رواية : الصفحة 44
         الفصل الثاني : حرب الأسد و الثعبان
            الجزء :  165
بقلمي انا 🖋️ : ياسمين الوراق

اما ازاد من بعد ما دخل الحمام مشا نيشان للدوش تخشا تحت منو و حط يديه على الحيط مخلي الما سخوووون ينزل مع راسو و هضبات ظهرو الضخمة و هو مغمض عينيه و حال فمو مخلي الما يدوز بين شفايفو و صدرو كيطلع و ينزل.

ما بغاش يغوت عليها بديك الطريقة خصوصا و انه اخيرا فهم باللي هي ما عندها دخل فداكشي للي وقع فالماضي. و لكن مجرد انها دكرات اسم ياسر على لسانها خلا جروح الماضي كلها تفتح من اول و جديد و يرجع نزيفها.
مجرد انها تشكر عائلتها قدامو و الطريقة باش كانت كتهدر على واليديها خلاتو يتخايل النهار للي يخيروها بينهم و بينو و تفضل عائلتها عليه خصوصا اذا عرفات الماضي الأسود للي مخبي عليها.

هو ما داير اعتبار لا لعزيزة و لا ياسر و لا تا جنى و أرسلان للي ممكن يقلبو الدنيا إذا عرفوها مزال عايشة.
هو كيهمو هي شنو ممكن تكون ردة فعلها إذا عرفات بللي هو سبب المشاكل كاملة للي وقعات لها فحياتها.

شنو ممكن يكون رد فعلها مللي تعرف بللي هو كان عارف حقيقتها و ما قالش ليها بللي هي من عائلتو؟؟؟ شكون ممكن تكون ردة فعلها مللي تعرف بللي هاد زواجهم كان هدفو الانتقام؟؟ شنو ممكن تكون ردة فعلها ادا عرفات بللي هو سبب الكوابيس للي عاشت فحياتها؟؟؟
فلحظة داز بين عينيه المنظر ديالها و هي مدلية من البالكون و ما بقا ليها والو و تلاح بسبب الدوا للي كان يعطيها الشيئ للي خلاه يزير على عينيه و يضرب يدو مع الحيط بالجهد و ألم كبير كيعصر فصدرو بطريقة رهييييبة ما عمرو جربها من قبل و ما عرفش المصدر ديالو.

هدا ما كان غي احساس الندم للي كياكل فيه و ما مخليهش يرتاح. بل فوق من هادشي كان حاس بخوف كبييير لا يخسرها للأبد و ما عمرها تسمح ليه.

هاد الفكرة بالذات يفضل يموت و لا يشوفها تحول لحقيقة.

كمل الدوش ديالو و خرج لاوي فوطة على نصو و شعرو كيقطر بالما شاف فيها لقاها باقا جالسة جامعة رجليها عندها و مضورة وجهها جنب كتمسح دموعها و تنخصص.

تنهد تنهيدة طويلة و مسح على وجهو بعدم ارتياح عارف راسو قفرها معاها.

قرب لعندها و جلس حداها فطرف الناموسية متكي على يديه كيشوف فيها كيفاش قالبة وجهها لجنب و ما باغاش تشوف فيه. هز يدو الثانية و شدها من دقنها مضور ليها وجهها لعندو لقا عينيها حمرين و مدمعين و كل شوية تشهق بالتنخصيصة

قرب منها و هو شادها من دقنها و باسها بوسة حنينة فعينيها للي سداتهم و رجع هز ليها يدها و باسها بوسة طويييلة من الداخل مغمض عينيه عاد رجع شاف فيها و نطق بصوت حنين و هو كيداعب حنكها بيدو

أزاد : سمحيليا ما كنتش باغي نغوت عليك

جينا (كتنخصص و تحرك راسها بالنفي) : المشكل ماشي انك تغوت عليا، المشكل هو تغوت عليا بلاما نكون دايرة علاش. انا ما قلت تا كلمة ديال العيب قلت ليك دوي مع بابا حيت ما يمكنش نبقاو مزوجين فالسر (شافت فيه بتشكيك) و لا يكما باغي غي دوز بيا الوقت و تلوحني