//الصفحة 44// 🎗️اسيرة عشق🎗️
📝الكاتبة ياسمين الوراق
🌷بارت 91🌷
من بعد ما وصلو للشركة حط طوموبيلتو فالباركينغ و كل واحد فيهم مشا لخدمتو
نيليا : اش هاد التعطيلة؟؟ هادشي كامل غدا؟ واخا تكونو كضربو قزيبة الفيل
جينا (تزنكاات) : مالك مقصدرة بحال هاكا ا زمر؟؟؟
نيليا (عوجات فمها) : انا هاكا ا حبيبتي للي ما بغاني يصطح راسو مع الحيط
جينا : ياااك
نيليا : اوا نتي للي جبدتيني
جينا (حركات راسها باستنكار) : لا حول و لا قوة إلا بالله معاك و خلاص. خليني نكمل خدمتي نسيتي غدا خاصني نعطي موديل للكينغ
نيليا : تفووو ما تفكرينيش فغدا... ما فهمتش علاش من دون عباد الله يخدمونا السبت فالصباح (شافت فيها بحال الا تفكرات شي حاجة) اجي فراسك اليوم كاينة حفلة ياك؟
جينا (باستغراب) : اشمن حفلة؟
نيليا : حفلة الذكرى السنوية لتاسيس الشركة، ويلي نسييت ما قلتها ليك واقيلا. راها فاليل مع 10
جينا : اوا شنو غنديرو دابا؟ انا كاعما موجدة لشي حفلة؟
نيليا (كتخمم) : امممم عرفتي شنو، غي نساليو الخدمة فالعشية خلي طوموبيلتك هنا و اجي معايا ندوزو لدارك تهزي شنو غتلبسي و نمشيو لواحد الصالون كنعرفو فيه حمام و كولشي... تما نعومو و نصاوبو شعرنا و الماكياج اش بان لك؟
جينا : صافي مزيان انا نعيط لصاحبتي باش نعلمها
فالمكتب عند أزاد
أزاد (ساخط) : غادي تسكت و لا نوض نفرع ديلمك
أركان (كيضحك بالجهد) : هههههه ما يمكنش ا صاحبي ما يمكنش. ديك اللقطة ما بغاتش تنسا ليا (سكت شوية و شاف فيه و عطاها للضحك عوتاني) وااااع نتا عااااالام و الله ما عرفتش شنو قال ليك راسك
أزاد : قال ليا نقول ليك نووض تقود فحالك دابا
أركان (وقف) : صافي ها هوا غادي... عنداك تعطل فالليل
أزاد : نو مغاديش نتعطل (حك لحيتو) هدرتي مع نيليا فداك شي للي قلت ليك؟
أركان (ضحك عليه) : حاالتك صعيييبة ا معلم ههههه هدرت معاها و قلت ليها تعلمها على الحفلة غي كون هاني حبيبة القلب جاية اليوم
أزاد (خنزر فيه و دار ليه إشارة زعمة الباب بلاما يدوي)
وصلات 5 و نص ديال العشية و الموظفين بداو كيخرجو حيت خاصهم يوجدو راسهم للحفلة للي كاينة فاوطيل المامونية (ناس مراكش غادي يعرفوه).
و تا جينا خرجات هي و نيليا، و كي تافقو خلات طوموبيلتها و مشات معاها.
فالأول دازو لدار جينا للي هزات مستلزمات الحمام ديالها و تا الحوايج و الاكسسوارات للي غادي تلبس و مشاو من بعد للصالون فين ضربوها فالأول بتحمحيمة فاعلة و خرجو كيشعلو بالنقا و دارو لا صيغ طوطال واخا ما كانش فيهم الشعر بزاف و معاها سوان للوجه خلا وجههم كيشعل و البنات للي فالصالون حالين فمهم فيهم و كيقولو غي تبارك الله.
من بعد صاوبو ليهم شعرهم و قادو ليهم الماكياج على حساب اللبسة ديال كل وحدة.
جينا لبسات كسوة طوييلة فالكحل و هابطة من جيهة الكتاف مع طالون و ماكياج دخاني مركز على جيهة العينين و شعرها صاوبوه ليها سامبل باش تبان طولتو (الصورة)
و نيليا لبسات كسوة كحلة تا هي حيت تافقو على نفس اللون غي هادي كسوتها كانت قصيييرة تال فخادها و دايرة les gants ديال السهرات و طالون عالي و صاك صغييور و شعرها صوباتو سامبل و جمعاتو ذيل الحصان كي كيعجبها.
نيليا (كتصفر) : واااااو القوووق ا عباد الله انا طحت
جينا (تزنكات) : صافي سكتي شوهتينا ههه يحساب ليهم غي ليزبيانة😂
نيليا (هزات كتافها) : يعاودو لمت امهم (شداتها و بدات كضور فيها) ويلي ويلي تيتيز يا حبيبي الليلة الطايح كثر من النايض و النايض fatigué 😍😍
جينا : هههه حمقة..تا نتي جيتي فنة 😍
نيليا (بغرور) : انا عاااارفة راسي زوينة 😏 ما نحتاجش للي يقولها
جينا (شافت فالساعة) : يالاه نمشيو را هادا هو الوقت
نيليا : اوكي let's go baby
خرجو البنات من الصالون و مشاو بالزربة للطوموبيل تفاديا لمعاكسات الشباب للي كانو غياكلوهم بعينيهم.
اما فجهة أخرى كان واقف قدام المرايا فالفيلا ديالو كيقاد الكول ديال قاميجتو و دار ريحتو الرجولية و دوز يدو على لحيتو كيقاد فيها.
من بعد هز سوارتو و تيليفونو و اتجه الاوطيل فين لقا أركان واقف حدا الباب كيتسناه و أرسلان للي كيستقبل الناس شاف فيه شوفة باردة و عاود ضور وجهو.
عطا سوارت الطوموبيل للولد اللي مكلف باش يحطها فالباركينغ و جاو عندو الناس كيسلمو عليه و يالاه بغاو يدخلو و هوما يضورو كاملين على إثر صوت السيارة للي وقفات.
نزلات نيليا هي اللولة هازا خنافرها للسما و مدات سوارتها للكارديان مخلية أرسلان متبع ليها العين بلا هواه.
و ما هي إلا لحظات تا كيتحل الباب للي من الجهة الأخرى و نزلات منو كي حورية البحر.
حورية البحر للي لفتات انتباه الناس كلهم، و خطفات قلبو من اول و جديد بحال الا اول مرة يشوفها. شوفة وحدة فيها خلات قلبو يعلن الخطر و يضرب فالتسعين.
نفس القلب للي ادا سمع ضرباتو شي واحد غيقول هادو دقات قلب عادية و لكن فالحقيقة هاد الدقات بلغة العشق كان عندهم معنى واحد : جينا... جينا.... و لا احد سوى جينا ♥️
هانا حطيت زوج أجزاء متابعين وا صبرو على القادم و خليو ارائكم راني غندخل للمسكي 😂
أنت تقرأ
🔥الصفحة 44🔥(مكتملة الجزء الاول)
حركة (أكشن)مجددا رواية ❄️الصفحة 44 ❄️ على شاشة مختلف اللهجات و بقلم ياسمين الوراق بدون تقديمات مطولة و شعارات فارغة لانه القصة صدى ديالها وصل للي قراوها وو للي ما قراوهاش و قررت نزلها مجددا باش تكون فرصة يتعرفو عليها البنات كاملين قبل ما ينزل ال...
