يا صدفً عشنا بعدها حبيبين

٤٦

توترت غيم من شافت البنات سريعات وشفطت الورقه واتجهت بسرعه لعز توها بتحط الورقه بمبسمه طاحت والتقت شفتها بشفته وطبع قبله سريعه عليها
البنات بصوت واحد صرخو وعز عض شفته با ابتسامه وهو يناظر بغيم وغيم من الفشله توترت وهي تحسها احترت وحمرت خدودها خجل
غلا بضحكه على غيم:خلاص انتهى الوقت
سدن:يه يه تجننون وش الحركات الرومنسيه ذي
عز وهو يناظر بغيم وشايف خجلها مره ابتسم:ينصر دينك على اللعبه الحلوه ذي
البنات صرخو مره ثانيه وغيم من شدة الحياء انطلقت ركض ورى عز الي صار يجري وهي وراه والبنات يضحكون عليهم وتعلقت غيم بضهر عز وهي تضربه وهي تضحك وعز مسكها على ظهره وركض فيها ناحيه البنات وبس وصل نزلها وهم يضحكون على غيم
سدن:عادي عادي زوجك ماعليك
غيم مسحت رقبتها بحياء وكبحت بسمتها بس انتبهت لعز الي يبتسم ويمسك ظهره وواضح تعور من شيلتها ناظرها عز واشرت بعينها بمعنى :وش فيك
عز ابتسم يهز براسه:بمافيه شي
سدن:بعد ليله وسهره ممتعه نقول ياليت تصلحون لنا الفطور بكره
غيم:أنا اتوقع بسحب عليكم
غلا:افا ترجعين بقولك وش يقولون بنت عبدالله مو قد كلامها
عز:والله انها قدها وماترجع بكلامها لاتشيلون هم عندي اصحيها لكم من قبل الفجر
غيم ابتسمت واتجهو البنات لغرفتهم ينامون وغيم ساعدت عز تحط الاغراض بالمطبخ وشافته يروح الغرفه قبلها سكرت انوار المطبخ واتجهت وراه بس دخلت الغرفه شافته يمسك ظهره بالم وبسرعه اعتدل بس دخلت اتجهت له غيم :موجوع من ظهرك صح
عز:لا عادي
غيم:الحق علي نسيت انك ماتقدر تشيل شي ثقيل
عز وعمره ماتوقع انه ممكن ينحط بذا الموقف مايقدر يحمل غيم كذا وحس بشعور عجز مره مقرف واتجه للكنب وجاء بينزل ثوبه بس تفاجأ من مسكت كتوفه غيم بحنيه:لك جميله برقبتي ياعز وانا حابه اسوي لك عمليتك ما ابي اشوف شعور الضعف بعيونك
عز ابتسم:تبين تسوينها عشاني والا عشان تردين جميلتي
غيم ابتسمت:انت وش تبي تسمع؟
عز يمسك بفكها يقربها من وجهه:قلبك وش يقول
قال كلامه وعينه بعيونها يتفحص رجفتها وتوترها وقالت وفمها يرجف من قربه:عشان ارد جميلك
عز ابتسم:عيونك تقول انك كذابه
غيم ابتسمت تبعد عنه:من متى تفهم بلغه العيون
عز وهو ينزل ثوبه:من اليوم الي جت عيني بعينك
غيم ابتسمت بحياء تتجه للمرايه تنزل حلقها وجت بتفتح سوارتها بس عز اتجه لها يفتحها لها وقال:اقولك شي
غيم:قول
عز:بخاطري اروح لعمتي مناير بكره تخاويني
غيم ابتسمت:اوكي أخاويك لان اصلا مره مشتاقه لها
عز ابتسم:تمام نامي وارتاحي نمشي على العصر بعد ماترجعين من دوامك وعاد بعدها اوف والبنات بيجون بعد مع العيال
غيم ابتسمت لمن قال بعد ترجعين دوامك وهي منجد ممنونه لعز مره وهو رجعها للحياه برجعتها لدوامها لانها تعبت كثير حتى وصلت للي وصلت له
جاء عز بينام على الكنب وقالت:حلفت عليك تنام على السرير
عز:ليه تحلفين ؟انتي طيب
غيم:بنام على الكنب عادي أنا مو موجوعه
عز رفع سبابته:بس اليوم ترى
غيم هزت راسها وهي مبتسمه واتجهت تمدد على الكنب وعز تمدد على السرير وهو يتذكر قبله غيم وابتسم يغرق باحلامه اما غيم نفس الطريقه تتفكر فيها ورجعت تحمر خجل لكن بس تذكرت تعبه من ظهره بدت تشيل همه وهي مايأست وراح ترجع تحاول فيه حتى يرضى يصلح العمليه
عند رنيم الي تو تمددت على سريرها وهي صارت عايشه عند اخوها رن جوالها
شهاب:حي الله حرمي وملهمتي
رنيم ابتسمت:حي الله ملاكي المجهول
شهاب:افا بعدني مجهول
رنيم ضحكت ورنت ضحكتها بقلب شهاب وقالت:لا صرت معلوم
شهاب:زين ابي اقولج باچر بمرچ نروح نشوف ترتيبات الزواج
رنيم ابتسمت:اوكي اسحب على دوامي ترا عشانك
شهاب:إذا تبين نأجله العصر مافي مشكله وياي
رنيم:لألا تعال الصباح عشان ننجز ولاني مالي خلق اداوم
شهاب:طيب والي اشتاق
رنيم:ينام
شهاب:افاا
رنيم:بااايي
شهاب ابتسم:تصبحين على خير
رنيم:قصدك اصبح عليك
شهاب :ههههههههههههه احلى صباح والله
رنيم ابتسمت تقفل جوالها وتبحر باحلامها مع شهاب وهي مو مصدقه ولسا تحس كل شي يصير معها كانّه حلم
عند شهاب الي مانام يخطط ليؤمهم بكره وفين بيروحون
صباح يوم جديد
في مزرعه الجابر فز عز يبي يصلي وانصدم من حس بشي على وجهه بعد يشغل النور وانصدم بغيم الي نايمه ومستنده ذراعه وداخله بنومه عميقه واضح
ابتسم عز وهو يرجع شعرها عن وجهها وفزت غيم بخوف وتناظر بوجهه القريب منه وضحك عز:لها الدرجه حابه قربي
غيم رفعت حاجبها:اصبح بس جيت هنا لان البارح شفت مزون توايق من الدريشه فا اضطريت أتمدد بجنبك كنت ابي بس تروح وارجع على الكنب بس بالغلط نمت
عز:وخليها تعرف طيب ان حنا كل واحد ينام بمكان
غيم ناظرته:شكلك لسا خاطرك فيها
عز يبي يجرب غيرتها:وش فيها لو تزوجتها أنا رجال مايعيبني شي
غيم:انت مايعيبك شي ي ولد الجابر لكن والله لعقلك لو بس يجي ببالي ادنى شك انك ودك فيها علي
عز:اوف اوف لها الدرجه تكرهينها
غيم:ما اكرها بس ما اداني الي ترمي نفسها على رجال متزوج
عز يغمز:يعني انتي معترفه بزواجنا
غيم:مو مهم المهم الحين خلصنا خلينا نسوي فطور
عز ضحك:حلوه التصريفه
ضحكت غيم تتوجه تتوضى وتصلي وتبدل بجامتها ببنطلون اسود وبلوفر بني وهي تخلص وشافت عز خلص اخذت ربطه ورفعت شعرها وطلعو هي وعز للمطبخ وناظر عز:تعرفين تطبخين
غيم:شويه بس من زمان ماطبخت كنا معتمدين على ريم وعلى خاله ام اديم
عز:زين ارتاحي أنا بجهزه
غيم:لا بساعدك بس طمني انت كيف ظهرك
عز وهو خف الم ظهره شوي:تمام التمام
ابتسمت غيم وشمرت ذراعها:وش اسوي
عز:هذا الدقيق عجني وانا بسوي بيض
غيم:تمام
اخذت بكت الدقيق وجت بتحط بالصينيه وطشر الدقيق لانها حطته بسرعه وبعدت شوي وهي تكح ولف عز عليها وهو يضحك ونفضت ملابسها غيم ورجعت تقرب الصينيه وتكب المويه على الدقيق وناظرت بيدها وهي ماتعرف كيف تعجن حطت يدها بالعجين وحاولت تعجن بس ماعرفت وتقرفت مره وقالت:عزو شوف
عز لف على اسمه الي أسره من فمها واتجه لها يشوفها تناضر بيدها الي كلها عجينه وواضح مره متقرفه ضحك عز:وش هالدلع ماتعرفين تعجنين
غيم:يووه ي عز مره لا شيلها من يدي احس تقرف
سحب بيدها عز يقربها للمغسله وهو واقف بجنبها وصار يفرك يدها وينضفها من العجين وغيم تتأمل قربه منها وحنيته وبسماته الي كان يتردد اسمه بذهنه لمن نطقته لف عليها وشافها تناظره وقال:خلصنا
سحبت يدها غيم وقالت:خلاص أنا اسوي البيض
عز:مره ارتاحي أنا بعجن واجي أسويه
غيم:خير مو فاشله بالطبخ لذي الدرجه
عز بعدم انتباه:لا ي حبيبتي مو فاشله بس ...سكت لمن انتبه على نفسه وغيم كانت ماشيه لمقلاه البيض وقفت بصدمه للكلمه وبسرعه صدت بتوتر للمقلاه
وعز اتجه يعجن وخلص ورجع لها بس انصدم من شافها تنشف ودموعها تنزل وقال بخوف يمسك كتوفها:بسم الله عليك وش فيك وش صار؟
غيم:انت السبب
عز فكر بسبب كلمته ماتبي حبه لها وقال:اعتبريني ماقلت شي
غيم تضرب كتفه :ي اهبل بسبب هالبصل انت متاكد انك بقيت لهم بصل بالمطبخ
عز زفر براحه:انتي بتجيبين اجلي صدقيني
غيم:بعيد الشر في مزون وامها ولافيك
عز ضحك وحط الزيت بالصينيه وشغلها وسخن وجاء بالبصل وحطه بقوه وطشر الزيت ولسع بيد غيم خفيف وهي ترجع على ورى:أح
عز مسك يدها يناظر:اسف والله انتي قريبه
غيم:ولايهمك بسيطه
مسك الملعقه وصار يقلب البصل وضربت كتفه غيم :بعد لي أنا ابي أتعلم
عز ابتسم يبعد يعطها الملعقه وصارت تقلب وهي مبتسمه وشاف عز ان البصل ذبل تقدم يحاوط غيم من وراها وحط الطماطم بخفيف وحط يده على يدها وصار يقلب معها في المقلاه وغيم كانت تحس بقلبها الي يرجف وعز الي ماكان فاهم ليه يحب قربها لكنه تاكد انه يكن لها مشاعر وبالأحرى صار يعشق وجودها بحياته غيم ابد ماعارضت قربه وهالشي اثار استغراب عز بس انبسط يشوف ابتسامتها وقال:جاء وقت نحط البيض
اخذ وحده وضربها بطرف المقلاه وفتحها وحطها بالمقلاه
غيم بحماس:الله ابي اسوي نفسك
عز :طيب بس انتبهي
غيم:ساعدني طيب
عز حاوطها من كتوفها وهو يمسك بكفوف يدينها وظهرها ملاصق بصدره وضرب بالبيض الي بيدها بطرف المقلاه ومسك يدها الثانيه يلاقيها مع الاولى يفتح البيض وينزل بالصينيه وابتسمت غيم :الله حلو
عز وهو لسا محاوط كتفها ناظر بوجهها عن قرب وابتسم وغيم تناظره بحب دخلت مزون على هالمنظر وهي توقف بصدمه وانتبهت غيم عليها اما عز كان جاهل وجودها وابتسمت غيم زياده لقرب عز وهي تلف راسها عليه وقالت :قرب بقولك شي
قرب عز أذنه لها بس انصدم من حس شفايفها بخده وهي تبوسه ورفع نظره بصدمه لها وابتسمت غيم تنزل نظرها مزون بصدمه من بوستها:وش عندكم هنا
لف عز عليها وغيم تخزها:وش عندك انتي هنا تجسسين علينا
مزون :مع نفسك ترا ادري ان كل هذا تمثيل بس عشان تبينون انكم تحبون بعض
تقدمت لعز:صباح الحب ياعز
عز مارد وهو ياخذ الملعقه يحرك البيض واتجهت له مزون تلمس كف يده بس هو سحبها بسرعه وناظرها بحده وقال:الزمي حدك ما يعني سكوتي لك اني راضي عن تصرفاتك أنا إذا عاملتك بالطيب مايعني اني راضي عن حركاتك ان حاولتي تلمسيني ترا بدفنك بأرضك وأنسى انك انثى
مزون من الصدمه تناظرهم وتشوف غيم الي تتكتف وتخزها وهي مبسوطه وطلعت مزون تركض لغرفتها وهي تبكي عند امها اما غيم الي ناظرت عز بفخر وهي تنحنح ودخلو البنات في هالأثناء ومعهم جدتهم واتجهت غيم بفرح لجدتها تحضنها:وانا اقول وش هالصباح الحلو أثاري جدتي منورتنا بالمطبخ
رحمه تحضنها:ياحبيبتي انتي
سدن:اقول اخلصي علينا الفطور وين عاد
غيم تضرب بكتفها:اص وادخلي كملي فطور مع اخوك بروح أتجهز للدوام
البنات بصدمه:رجعوك دوامك
غيم:اي
جدتها تحضنها:مبروك ي حبيبتي الله يجعله خير عليك
غيم:امين ي جده
البنات فزو يحضنونها ويباركون لها وطلعت من عندهم لغرفتها تبدل وبس خلصت سمعت حكي عند دريشتها مزون تكلم امها:يمه خلصونا منها نفس ماتخلصنا من اهلها
ام مزون:اصبري شوي
غيم بشك من الي سمعته اتجهت للدريشه حاولت تفتحها وانتبهو ام مزون وبنتها على الصوت وهربو وبس فتحت الدريشه ناظرت ماشافت احد وشكت بنفسها
قاطعها سدن:غيم هيا الفطور
طلعت غيم وهي لابس سكراب الدوام والبالطو بيدها والجابر ناظر بصدمه هو وأخته متفاجئين
الجابر:انتي مو طردوك من دوامك؟؟
غيم :اوه معليش ماتوقعت تشوفني كذا صح احب ابشرك رجعت وبشروطي بعد
الجابر:كيف رجعوك هاء
ام مزون:أكيد ساحرته للمدير نفس امها
سدن:يوه شخباري من قام يفكر كذا
الجابر مد عصاه بيضرب يد سدن بس عز حط يده فوق يده وقال:اعتقد طلع على لساننا شعر وحنا ننهر عن الضرب
ام مزون:كيف تتكلم كذا مع جدك
وقف عز بحده:انتي تسكتين ولا اسمع حسك تفهمين ترا من دخلتي المزرعه ماجاء من وراك إلا المشاكل انتي وبنتك فهذا آخر تنبيه لكم ياتقعدون هنا بكرامتكم يالباب يفوت جمل
ام مزون:أنا قاعده عند اخوي ماني ببيتك
غيم تنحنح:شكلك ناسيه انك جالس ببيتي وبيتي بيته ويطرد الي يبي ويجلس الي يبي
عز ابتسم لغيم ورجع يعقد وجهه بجده وقال:ياجدي لك الحشيمه بس أنا ماتكلمت كذا إلا لمن شفتك تمشي ورى سوالف اختك تراها بتضيعك نصيحه
لف عز على غيم:الحقيني
طلعت غيم وراه وركبو السياره وغيم فرحانه اخيراً صار عندها سند منجد تضرب فيه ولاتبالي وقالت :تأمن بالله عمري ماتخيلت بيوم اني يكون عندي ذراع احتمي فيه
عز ناظرها وهو يوقف السياره وقال:جربيني ي غيم عهد علي ما أخونك أنا ذراعك وانا سندك بس ما ابيك تفكرين بيوم انك لوحدك
غيم :اخاف من الغدر يعز
عز:والله انك بوجهي واني لك سند وظهر
غيم:متاكد؟
عز يشد يدها  وقال:

انتي بوجهي لاتخافين دنـيـاك
‏عن كل ماضي خوّفك لا تخافين

‏لـــو اللـيـالي والـزمـان يـتحـداك
‏لايضيق لك خاطر عسى ماتضيقين

‏كل الظروف اللي تشوفين تفداك
‏نامي على راحـــة يدي لا تـبـالـين

‏لا يبين خافيك ولا يطلع اقصاك
‏وانا معك عمري اعيشه بعمرين .
ابتسمت غيم بحب وحرك عز السياره وتفاجئ من مالت براسها على كتفه تسند راسها عليه رفع يده يحاوط كتفها بيمينه وكمل يسوق بيساره حتى وصل المشفى