يا صدفً عشنا بعدها حبيبين

٧٢

بس فتحت عيونها نور صرخت بخوف وهي نسيت شكل برق من الخوف ومن الموقف وبسرعه برق حط يده على فمها:اششش أنا برق
نور ناظرته من فوق لتحت وهي تشوف ملامحه القريبه تشوف يده الي فمها وتحس لمسه يده الي ورى ضهرها عشان يسكتها ناظرت بعيونه الي فيها شويه حده ودفعته تبعده عنها وبعد برق لكن تفاجأ من شافها تركض وهي ماتشوف من الظلام وضرب رجلها بحجر وصرخت بالم واتجه وراها ركض
برق:اصبري ليه تهربين مني
نور بخوف منه :ما ابيك بعد عني
برق:خلاص اهدي رجلك مجروحه لعد تهربين
نور بدت تبكي خوف منه و وخوف اول مره تشوفه قريب منها وصدت بوجهها تحط يدها على فمها تكتم بكاها
برق تقدم لها يمسك كتوفها بحنيه وشهقت نور تبعد عنه برق طفش من خوفها وقال بحده:يوم نويتي تجين هنا ماخفتي ليه الحين خايفه مني
نور بترجي:الله يخليك بعد عني لاتلمسني
برق بصدمه:بنت انهبلتي أنا برق
نور:خلاص روح روح أنا أشوف اخوي يجي لي
برق اتجه يوقف قبال وجهها:اخوك راح يقسم ظهرك على فعلتك ذي
نور ارتجفت بخوف وهي تعرف عز مستحيل يتغاضى عن غلط نفس كذا ومد يده برق:تعالي معاي برجعك البيت
نور استسلمت وهي خافت تضيع بالبر ومدت يدها له ناظر برق خوفها ورجفتها الي واضحه بيدها وقرب منها يحط يده ورى كتوفها يحاوطها وارتجفت نور بخوف من قربه وناظرت بعيونه وشد كتفها برق:لاتخافين عليك الأمان
نور نزلت عينها بالارض وهي مو قادره تتقبل برق وتحس مشاعرها لمحمد لسا موجوده اما برق الي اول مره يشوفها ماعرف يحدد موقفه تجاهها واتجهو لسياره برق ركبها واخذ علبه مويه مسك رجلها وشدت رجولها نور بخوف:وش بتسوي؟
برق:بنضف جرحك وش فيك كذا مطيوره
نور تفشلت تناظره وقال برق:خلاص انضفه؟
مدت رجلها نور وبدا يصب المويه برق والتسع مكان الجرح من برودت المويه وتاوهت بالم برق :معليش تعورك شوي بس توصلين البيت لفيه
نورتتحلطم:ليتني ماجيت
برق وقف يعدل جسمه ومسك الباب ومال عليها:موضوع جيتك هنا بدون أذني ذي ماراح أعديها لك لان محارمي ممنوع يقربون مكان تجمع رجال
نور :لا والله بصفتك مين؟
برق بعيون تغيض نور يقرب من وجهها :بصفتي زوجك ياحلوه
نور ارتخى جسمها ورجعت على ورى من قربه تناظر وجهه وعيونه الي تتفحص ملامح نور وارتجفت وتسارعت ضربات قلبها من قربه وقالت بخوف:بعد عني ليه تناظر اقصر النظر
برق با ابتسامه:النظره الاولى حلال
نور وعينها ترجف وهي بعينه:نظره قالو مو تطالع كذا
برق با ابتسامه اعرض:مو ذنبي انك حلوه
نور توترت زياده وهي تصد بوجهها عنه وتنحنح برق يقفل باب السياره واتجه يركب وقال:حسابك بعدين على جيتك هنا
نور:والله مادخلني البنات أخذوني
برق :هاا يعني انتي ماعندك لسان ترفضين
نور:لا مو كذا بس انتو السبب
برق باستغراب:احنا ليه وش سوينا؟
نور بعدم انتباه:ليه ما تقول لي انك رايح مع العيال مالي رأي أنا ؟
برق كبح فرامل بقوه وشهقت نور بخوف ولف برق عليها ورجعت نور على الدريشه بخوف وهي ترجف شفايفها وبصعوبه قالت:ا-س -اسف
برق:ههههههههههههههه مفعله وضعيه الحكومه القويه بدري ي حلوه
نور تغطي وجهها بفشله وبداخلها:الله يقلع ابليسك ي نور وش مفكر عنك الحين اوف اوف
برق سحب يدها:وريني وجهك ابي اشوف الورعه الي تبي تتحكم فيني
نور تحط يدها حاجز على وجهها وقالت:برق خلاص
برق:ههههههههههه زين زين
رجع يحرك السياره متجهين لبيت عز
عند عز الي كان يركض ورى غيم وبصعوبه مسكها وصرخت غيم:بعد عنيييي
عز يشدها من ورى:بالله ابعد عنك
غيم لفت على عز وناظرها عز يتركها وقال:تخطيتي الحدود ي غيم وحيل بعد
غيم بلعت ريقها بورطه وارجعت على ورى وسحب بيدها عز بقوه ويرتطم صدرها بصدره وقال عز بحده:اتوقع اني عطيتك وجه حتى تتمادين بهذي الطريقه
غيم ولأول مره تشوف عز بهذا الوجه المرعب وصارت تفرك يديها الي بيده بخوف وشفايفها ترجف من الخوف منه وقالت:عز اترك يدي تعورني
عز:لسا بعورك زياده عشان تعرفين ان كل شي له حدود
سحب بيدها بقوه يدفعها قدامه وقال بحده:قدامييي
غيم:بس اسمع...قاطعها يدفعها من كتوفها:ولانفس صوتك ما ابي اسمعه
غيم ارتبكت تمشي قدامه وفتح الباب عز يدفعها تركب وقفل الباب بحده وركب يشغل السياره وحرك غيم والخوف سيطر عليها لانه عز عمره ماعصب عليها مثل كذا قالت بهدوء:عزي اسمع...عز بصراخ يضرب الطار:اسكتي غيم اششش حسك ما ابي اسمعههه انطميييي
غيم رجفت من صراخه وهي تصد للدريشه وهي تمسك عبايتها تلمها عليها وخايفه من تالي هالعصبيه من عز ومتمنيه ان البنات مايجيهم شي من رجالهم
كمل طريقه عز لفلته
-ببيت مهاب
ناصر الي توسعت عيونه بصدمه وهو مو مصدق ان مهاب مات معقول
نرجس انحنت على اخوها تمسك خده بحنيه وهي تصرخ وتنادي باسمه وطلعو امها وابوها وانصدم بمنظر مهاب الي غارق بدمه وصرخت ام مهاب تطيح مغمى عليها وابوه اتجه له ركض وهو يضرب كتفه :مهاب ياولدي تسمعني مهاب تكفى ي ابوك لاتخليني
رفع نظره ابو مهاب لناصر الي شايل السلاح وبس شاف نظرات عمه طاح السلاح من يده ووقف ابو مهاب بكسره قدام وجه ناصر وقال:ليه ياولدي ليه تحطني بموقف صعب ليه تخليني حاير بين عيالي تقتل اخوك عشان مين تفرط بدم اخوك عشانها أوجعتني حيل ياناصر وقفتني بينكم القاتل ولدي والمقتول ولدي
رجال مهاب بسرعه حملوه واتجهو به للمستشفى وابو مهاب اتجه لزوجته يشيلها في السياره ويلحقهم ونرجس الي من الصدمه جالسه على ركبها نفس الوضعيه من انصاب مهاب وهي مو قادره تستوعب كل الي صار مهاب الي شايفته ميت امها الي طاحت وحب طفولتها القاتل شافها ناصر تايهه بافكارها ومو عارفه تستوعب اتجه لها يوقف وراها وقال بهمس فيه خجل من سواته:نرجس أنا ...قاطعته من وقفت بكل قهر الدنيا تضربه :ليه ي ناصر ليه تسوي فيني كذا هذي جزاتي ليه تكسرني بوحيدي ليه تعذب ابوي الي حبك وعزك وحتى بموقف كذا لسا يناديك ولدي ليه تفجع امي الي كبرتك وربتك وعدتك بحسبه ولدها يوم تخلى عنك الكل حتى امك امي كانت لك الحضن الحنون وابوي عطاك الأمان ومهاب كان لك السند ليه سويت كذا ليه أوجعتني بوحيدي
ناصر وقلبه احترق من كلامها:والله ماقصدت غصب عني استفزني وطلع معي كذا أنا كنت مستحيل أذيه حتى يوم أطلقت عليه المره الاولى كنت قاصد كتفه لاني اعرف جسمه قوي بيتحمل طلقه بكتفه بس اليوم أنا ما اعرف كي..قاطعه كف قوي على وجهه منها وتوسعت عيونه بصدمه يناظر بعيونها الحمر ومليانه دموع وقالت:وصلت فيك الدناءه تخير مكان الطلقه وين لهالدرجه الحقد بقلبك على مهاب وصلك لذي المرحله
ناصر مسك معاصم يدينها بقوه وسحبها ناحيته:يدك تمدينها مره ثانيه اكسرها وبعدين ماراح ابرر لك فعلتي موتي بتفكيرك السوداوي
نرجس بالم من يدينها الي قاضبها وقالت:ياليتني ماعرفتك ولا دخلت قلبي ياليتني ماكنت بنت عم لك ياليت ابوي ماسمع وصاة عمي وخلاك للموت يأخذك ماكان اتعبتني واتعبت ابوي وامي ومهاب "صرخت بقوه في وجهه"أكرهك اكره يوم فكرت احبك فيه اكره الساعات الي كبرت معك فيها وكل اللحضات الي جمعتني فيك
ناصر:دام تكرهيني ادعي علي خليني أموت وارتاح اروح لابوي تعبت من الدنيا ومنكم ومن الناس تعبت من كل شي
نرجس بقهر تحاول تفك يدينها من يده بس عجزت وقالت:الله ياخذ...ماقدرت تكمل كلمتها ونزلت راسها على تحت بدموع وصارت تبكي بقوه وهي تقول:حتى الدعاء ماني قادره ادعي عليك
ناصر غمض عيونه بقوه وسحبها لصدره يدفن راسها بصدره ويخلل أصابعه بشعرها وهو مقهور عليها لهدرجه تحبه حتى بموقف مثل كذا ماقدرت تدعي عليه
نرجس رغم انهيارها وكانت محتاجه سند دفعته على ورى واتجهت تركب مع السواق وعلى طول طلعت المستشفى وراهم
-عند فله عز
وصل عز يشوف رنيم وقفت ونزلو البنات يركضون ونزل عز بسرعه وصرخ:عندك انتي وهي
وقفو البنات بخوف من صرخته وقال عز:رنيم مع زوجك وأديم كمان مع زيد
اديم اتجهت لزيد الي تو وقف وهي خايفه وركبت ومشى وشهاب نفس الطريقه اخذ رنيم ومشو
الباقي دخلو ركض وركضت غيم وراهم ركض ودخلو العيال وهم خايفين
عز صرخ فيهم قبل يطلعون الدرج وقال:اوقفو
وقفو البنات وكل وحده ماسكه الثانيه ويرجفون خوف وهمست سدن:ياليتني هربت مع نور
إيلين بخوف تهمس:قلت لكم بلاء هالسواه ماطعتم يويلنا عز مايرحم لأعصب
ريم تنحنح:عفواً بس أنا ماشيه
جت ريم بتمشي بس صرخ عز:عندك
وقفت ريم بخوف ولفت وقالت:أنا
عز:مو انتي صاحبت غيم
ريم:اي
عز:مايجيهم يجيك ودامك صاحبتها فانتي بحسبه اختي ومحسوبه علي ارجعي مكانك
البنات همسو بضحك على منظر ريم الي رجعت توقف بجنبهم
وصرخ عز:اي الموقف يضحك مو لأنكم ولا وحده عندها مخ ولاوحده فيكم عندها احترام لزوجها او اخوها جايين مكان كله رجال وين عقلك انتي وهي هاء
جابر بصراخ:ترا مره تماديتو انتي وهي وش تحسون فيه يعني الي سويتوه راح يخليكم تكبرون بعيوننا او نضحك ونصفق لكم الي سويتوه في قله ادب
عز لف لجابر وثنيان وقال:بعد اذنكم يعيال أنا عارف انهم زوجاتكم ومالي كلمه بعد كلامكم بس هم خواتي كمان وهم عرضي وشرفي ان سمحتم أنا بتفاهم معهم
جابر:ابد تكون ياعز لو تبي تذبحهم هم فداك
ثنيان:ركدها لسدن عقلها ياعز لاني معد أتحمل جنانها
سدن ناظرته بصدمه:ليه معد تتحمل ان شاءالله
ثنيان بصراخ:لان الي سويتيه اليوم فاق كل الحدود ي سدن الي سويتيه غلطه كبيره وش تبون الرجال يقولون علينا مانعرف نحوى عرضنا جايين لنص البر تسوين حركات مبزره زي ذي
سدن:لا والله هذا مايشفع انك معد تتحملني على فكره
عز معد تحمل رفعه صوتها وهو يمد يده ويطبع كف قوي على خدها وشهقو البنات بصدمه وقال:لاكنتي غلطانه تعتذرين مو تكابرين على غلطك
سدن نهدت تمسك وجهها وبدت دموعها تنزل وغمض ثنيان يصد وهو مايبي يشوف كسرتها وسدن رجعت على ورى آخر البنات تحتمي فيهم ولف ثنيان يناظرها شافها تميل براسها وتناظره وعيونها تعاتبه ماهان عليه يشوفها تحتمي في البنات من اخوها واتجه لها يمسك بيدها وسحبها معه وقال لعز:اخذت نصيبها سدن
هز راسه عز يشوف سدن الي منجد نزلت دموعها بغزاره وماحب انها تبقى عشان مايضعف
عز ناظر فيهم وشاف عصاه جدته واتجه لهم وبدو البنات يرجعون على ورى بخوف وهم يقدمون غيم قدامهم متعلقين فيها ويرجفون
عز:غلطكم كبير وصار يلزمكم تأديبه
غيم من شدت الموقف تناظر بعز وهو شايل عصاه جدته بكل غضب وجلست تشوف وجه جدها فيها لمن كان يعنفها ويضربها وهي صغيره وحتى لمن كبرت يوم يرفع عصاه بوجهها وارتجف قلبها من تكرار المشاهد وهي تردد بنفسها:هو اي الجابر هو
ناظرت بعز بكل جمود وتسمع البنات من الخوف يترجون عز وتقدمت غيم ترجعهم ورى وتوقف قبال عز بكل صرامه بس يدها وشفايفها ورجولها وجسمها كل يرجف وقالت بصوت واضح فيه الغصه والخوف:أنا الي جبت الفكره واخذت البنات معاي إذا عندك عقوبه فهي لي أنا بس
وقفت غيم على جنب باستسلام ونزلت عيونها للأرض بس حست عز يرفع عصاه شدت قبضه يدها وغمضت عيونها وصار صوت انفاسها مسموع وهي مايدور بذاكرتها إلا جدها الي صارت تشوف عز فيه وصوت ضربه لها وصرختها وهي صغيره تستنجد بأحد يفكها وحتى الم ضرباته لها وهي كبيره
عز رفع عصاه وهو صح انه بقمه غضبه بس بداخله مستحيل يضربها بس يبي يخوفهم لكن الي ماتوقعه انه دمر نفسيه غيم الي رجعت لها صفحتها السوداء الي عمرها ماتمنت تتذكرها وبس ناظر بيده الي شادتها ارتخت يده ينزل عصاه وتعقدت حواجبه من شافها ترجف بشكل يفجع وهي مغمضه وتمتم:لا ي جدي تكفى معد اعيدها الله يخليك لاتضربني
عز ارتخى جسمه كله والبنات كمان ناظرو بغيم بصدمه كيف تحولت لوحده ثانيه وحده ضعيفه جدا عكس الي كانو يشوفونها عز تقدم لها بخوف بس مسك كتوفها وهمس:غيم أنا عز مو جد...انصدم من جسمها الي مال بكل قوته وطاح على الارض لو مو قربه كان تعور راسها وصرخو البنات بخوف يتجهون لها الي تضرب كتفها والي ترش عليها مويه يحاولون يصحونها بس عجزو
عز معد تحمل وهو يشيلها وصرخ بايلين:افتحو لي الباب بروح بها المستشفى
ريم:بجي معكم
اتجهو البنات بخوف يساعدونه يركبها وعند سدن الي كانت صاده وثنيان يحاول يكلمها بس ماترد عليه لفو على عز الي طالع ركض وغيم بين يدينه وصرخت سدن:وش سويت فيها هاء
عز:مو وقتك سدن
ريم:ماصار شي بس شكلها تمر بنوبه
سدن:كيف!!
ريم:بنؤديها المستشفى
سدن:أنا بجي معكم
ثنيان مسك بيد سدن:تعالي معاي بنلحقهم
هزت راسها سدن تتجه معه وعلى طول على المستشفى
بس وصلو المستشفى استنفرو الكل يعالجون غيم بحكم انها طبيبه عندهم والكل يعرفها وعز من القهر يلوم بنفسه وسدن كمان ماوفرته تعاتبه
بعد فتره تقريباً ساعتين طلعت ريم
ريم:تطمنو لاتخافون صحت هي طيبه بس الدكتور يقول تعرضت لصدمه
عز:اقدر اشوف...قاطعه صوتها غيم الي توقف وترمي بالمغذي:قلت لكم أنا بغير بعدو مني
عز فز يمسك كتوفها:غيم وش فيك ليه تسوين كذا ارتاحي
ريم:غيم وش تسوين
غيم بحده:ماني ضعيفة مو بحاجتكم أنا اقدر اسند نفسي
عز عرف انهم شافو ضعفها وهالشي حز بخاطرها وقال بهمس يمسح راسها:بطلتي عمرها ماتكون ضعيفه بطلتي قويه محد يقدر يكسرها
غيم ناظرته تبوزشفايفها بحزن:كنت بتضربني
عز يمسح خدها بحنيه:لالالا حبيبتي والله اكسر يدي قبل تنمد عليك
غيم:اسفه معد نعيدها سامحنا
عز:اششش المهم انتي الحين
غيم:سامحنا والا برجع اطيح
عز ابتسم والكل ضحك عليها وقال عز:لايكون تمثلين علينا
غيم:وش فيها لو اختبرت خوفك علي؟
عز بهمس:اجل لسا ماتعرفين كبر غلاك بقلبي
غيم ابتسمت تنهد بعد بكاء داخلي طويل وحط يده عز ورى ضهرها يحاوطها يسحبها لصدره :اهدي لاتخافين تمام
غيم:مو خايفه
عز يطلعها من حضنه:من الي ترجف قبل شوي هاء
غيم:الحين خايفه
عز ابتسم :حزيره هي
غيم:بقربك ما اخاف والله
سدن وريم :اوووووووو
عز يمسح خدها بخفيف ويبتسم وغيم رجعت تسند نفسها عليه وبس جو طالعين من المستشفى وقفت ريم بصدمه وغيم اعتدلت من كتف عز ونادو بصدمه مع بعض:نرجسسس
....