خربشة قصة

القصة 50

#جاهزين 😍
الليلة عشان الكرفيس تقيل جهزوا مكاويكم مع بخاخ الموية ✋🙂 ، لانو المكوة براها ما تنفع 🙂

#والله_أنا_لو_منك_ما_بتكرفس_براي🐸

#خربشة_قصة

_أها جبت نتيجة التحليل

_ لا كان عندي مشوار ، بكرة بمشي أجيبا .

النتيجة دي مهمة لي لابعد حد ، هي الحتحدد إني ممكن أبقى أم ولا لا

_ سرحتي وين ؟!

دفئ نظراتو دي هي البتخليني عايزة أجيب عيال يسعدوه زي ما كان بيتمنى حتى من قبل عرسنا .

_ عايزة .. عيال ..عشانك

ضحك على منظر دموعي ، قعد وجراني قعدت جنبو

_ أنا نفسي أعرف الدموع دي  كيف بسهولة بتنزليها

_ لاني خايفة

_ بذمتك تخافي وعصام راجلك

_ أنا جادة ما بهظر ، خايفة ما بكون بلدي وقتها ح إضطر إتنازل أخليك ت...

_ إنتِ ليه متشائمة كدا ، يمكن ما عندنا الاتنين حاجة وبعدين تعالي هنا ، لو العيب طلع مني ، ح تتنازلي عني وتطلبي الطلاق ؟!

الحشرجة الفي نهاية كلامو ألمتني ، قالها بطريقة خلت دموعي تنزل لا إراديا ، ما قايلاه بريدني كل الريدة دي   ، هو ما بعترف ولا بقولها صريحة من يوم عرسنا من سنتين بس أفعالو بتحسسني إني ملكة علي قلبو .

هزيت راسي

_ مستحيل طبعا إتخلي عنك

ابتسم وزح لي دمعتي الفي وشي

_ أصلا كفاني شافعة واحدة تبكي بسرعة ، أكتر من كدا ما داير

بقدر ما كانت الجملة دي غزل بي بقدر ما وخزت قلبي نخزة ألم وخوف .

مر يومين كنا مشينا عند أهلو   ، مطاعنات أخواتو لي بخصوص يعرس تاني وقدامي  ودايما يحسسني بكلامهم زي الهظار لمن يقول

_ كفاني مرة واحدة مالي ومال الشقاوة ، وبعدين مرتي دي بنظري الأربعة زوجات فمكتفي الحمد لله

دايما علي مدار سنتين ما خابت الجملة الاخيرة دي في إسعادي زي برضو ما بتخيب في إزعاج أخواتو .

.......

_ أعمل شنو ساعديني أقول ليها كيف ؟!

لمن يخت يدو علي راسو ويميل لقدام مغمض عينو بعرف وقتها إنو في مصيبة كبيرة جدا ، قعدت جنبو والقلق كبير ، أبدا نبرة صوتو ما طبيعية

_ قلقتني في شنو ؟!

عاين لي بعيون حمراء وانتفض قام

_ ما في شيء ...

_ بخصوص النتيجة طلعت إني ما بلدي صح ؟!

قلتها بأنفاسي الشبه إتعدمت منتظرة ردوا ، غمض عينو وقّبل عاين لي