خربشة قصة

القصة75

#ملحوظة حاولوا ما تقولوا وااي 😂😂

#خربشة_قصة

_ شوفي جايب ليك شنو ؟

جا قاد جنبي بحماس ويفتح الكيس المعاه ، ما عاينت لمحتواه ، بس كنت بعاين للهفتو والفرح الفي وشو

_ غيث ! أنا كويسة والله ما في حاجة .

وقف البعملو  وعاين لي وابتسم

_ بسمتك ما شايفها يا تهاني.

حاولت إصطنع بسمة بس ما قدرت ، دمعت عيني وما قدرت الا إنفجر في البكى

_ لا لا لا هسي في  شنو ؟

_ أنا عايزة أفرحك يا غيث

_ ومنو القال ما مبسوط

جذب راسي لصدرو ، حسيت بخفقات قلبو السريعة

_ ما تكذب إنت عايز طفل وأنا ما فيني أمل نهائي ألدي ليك.

_ وبعدين معاك يا تهاني ، ليه عايزة توجعي قلبي بدموعك دي والله العظيم عايزاك وما داير شيء غيرك

حاول يواسيني وأنا إنهرت أكتر ، قلبي ما مطاوعني أشوفو يحب الشفع ويلاعبهم ويحبوه وما يكون عندو جنى.

قبل فترة حسيت بألم شديد نص الليل  ، وقتها كنت بشوف طشاش واتنين اتنين ، لهفتو وخوفو الشديد داك كانت مبالغ فيه ،  في البداية ما عرف يتصرف حتي خت يدو في راسو 
بعد مدة رفعني بسرعة ووداني المستشفى .

إكتشفو عندي مرض في الرحم ولازم يستأصلوه .

إنهرت شديد وقتها بس غيث وقف جنبي وواساني ، فترة بعد العملية خلي الشغل وفضل معاي

حرفيا ما كنت عايزة  زول جنبي ونظرة الشفقة الفي عيونهم واني ما حالدي تاني ، غير غيث ما كنت عايزة زول جنبي .

مريت بفترة إكتئاب ولولاه ما كنت عارفة حاعمل شنو .

طول الفترة دي بحاول يسادني بكل الطرق الممكنة فانا زاتي قررت أسعدو ولو علي حسابي .

قررت أفتش ليه عروسة ، بعد مدة لقيت واحدة ، قويت قلبي وبكيت كم ألف مرة كدا حتى قدرت إتصل ليه

_ غيث إنتهيت من شغلك ؟!

_ مالك في حاجة ؟

قالها بلهفة ، فرديت

_ لا لا ما في شيء  ، بس  أخوي وأختك جونا وقلت اوريك تجي بدري

_ تمام جاي بعد نص ساعة كد ا، عايزة حاجة ؟

_ سلامتك بس

قفلت من الخط ومسحت دموعي النزلت ، دي حيلتي عشان يشوف العروسة الجبتها ليه
جات أختو لي في المطبخ تشاكلني

_ برضو يا تهاني عملتي الفي راسك ؟ غيث حيزعل منك شديد والله

_ لمصلحتو  انا بعمل كدا ، عشان العيال

.......

نظرات اختو وزوجها ( اخوي ) كانت كأنها تقول " ما قلت ليك ما برضي "

وفعلا لمن جا وإكتشف اني جبت ليه عروسة زعل لمن طلع من البيت .

يومين ما إتكلم معاي بسبب الموضوع  دا لحدي ما راضني وقال

_ خليك عارفة ما في حاجة تخليني أبعد  عندك أو إختار غيرك ، ما بيدي ولا شهامة مني ، بس قلبي دخلك جوا وقفل الباب بالطبلة لاي زول وراك

لو عرست بظلم نفسي والبت الجبتها معاك لاني ما بشوف غيرك ولا بقدر اشوف  فزحي الفكرة دي وما تعيديها .

انبسطت شديد لكلامو وقلبي كل يوم يخزن حبو أكتر واكتر بس برضو دايراه مبسوط وحولينو اطفال يملوا عليه البيت .

نص الليل صحيت ما لقيتو جنبي ، قمت افتشو ، لقيتو في غرفة تانية ساجد وببكي وقتها العبرة خنقتني وفضلت ابحلق فيه لحدي ما سلم

جريت علي غرفتنا قبل ما يشوفني حاولت امسح دموعي وامثل اني نامية ، حسيت بحركتو جا جنبي ، بكاه عشان عايز اطفال انا عارفة وانا ما بقدر اهب ليه الحاجة دي .

مال علي وباس جبيني ، وغمض نام وانا الم قدرت انوم بعدها من الشفتو .

عدا كم يوم تاني اتصدمنا بخبر موت اختو واخوي في حادث عربية ، وفضل اطفالهم الاتنين ، إنهرت بس كان هو سند لي وقتها بالرغم من الفاجعة تمسو صحبو اللهو اخوي واختو في لحظة واحدة ماتو .

بعد مشاورات من الاهل قرروا انحنا النربيهم  ووافقنا طبعا

........

_ الجميل زعلان ومكشر مالو ؟

_ غيث ! انت مبسوط؟

_ الحمد لله جدا والله ، انتِ في حياتي واطفال المراحيم مالين دنيتي في اكتر من كدا خير ؟

_ بس  أكيد متأثر لاني ما جبت ...

_ وبعدين معاك يا تهاني تاني نعيد ونزيد ، سبحان الله لحكمة ربنا جعل رحمك يزال وخلانا انحنا نربي اطفال ايتام ونكسب ثواب فيهم ، والله انا بحب الشفع ديل كأني جايبهم من صلبي ، عايزك تشيلي الاوهام من راسك ..

_ طيب انا شفتك مرة قبل فترة طويلة بتبكي وانت ساجد وشكلك بتدعي ، ما تقول لي كمان دا كذب بعيني شفتك

ابتسم وعلق عينو في عيني ومسك يدي باسها ، وحول لليد التانية وقال

_ أيوا بعترف كنت ببكي وقربت أصل للانهيار  بس عارفة ليه ؟

قال جملة خلت قلبي يقيف ويرجع ينبض في الثانية مليار مرة من حبي للمخلوق دا

_ ليلتها حلمت بكابوس انك بعدتي عني ، فلجأت لله بسرعة ودعيت ربنا يخليكِ لي .