#الرجاء ربط صمام الأمان للقلب فنحن علي وشك الاقلاع بخربشة جديدة 🤗🤓
#خربشة_قصة
_ مالك بتتنهدي ؟!
_ ولا شيء بس مبسوطة وأنا معاك
زحيت المسند الحاجز بينها وبيني في الكنبة وعيني بتبرق برق من جملتا دي
، كنا بنتفرج في التلفزيون مع بعض ، في الحقيقة هي فاتحة فلم ما فهمت منو شيء بس عاجبا ومتابعاه ، فانا زاتي قررت اتابع معاها بس ما التلفزيون هي زاتها .
كعادة ليها مالت براسها علي كتفي وهي مندمجة شديد في التفريجة ، وأنا كمان ملت علي شعرها بذقني كعادة برضو لمن تعمل حركتا دي
بس ليه ريحت شعرها الليلة سمحة كدا ؟ خلتني أغمض عيني واشمو عديل ، والله لو زول قال لي في يوم حتعمل الحركة دي كنت قتلتو عديل
_ أنفال !
همهت لي لمن ناديتها بهمست
_ انتِ غيرتي زيت شعرك ولا عملتي ليه حاجة غيرت ريحتو
خلت تفريجة التلفزيون وعاينت لي مستغربة
_ مالا ريحتو ؟ كعبة ؟
ملت تاني عليه وقلت
_ بالعكس تحفة
استغربت اول وتاني كشرت شوية كدا وابتسمت بضحكة صغيرة ، وقبلت علي التلفزيون تتفرج
المشكلة ما هنا ، المشكلة وشها دا ، هي ليه الليلة باقية لي سمحة كدا
حاولت أزح عيني منها بس متابع أي تعبير صغير أو إنفعال بحماس ، مسيت نفسي مراهق يا داب بتابع حبيبتو وحافظ اي حركة ليها .
ضحكت شكلها من لقطة في الفلم بس صراحة كنت بعيد من اي شيء الا هي
عاينت لي وتاني اتلفتت علي التلفزيون بتسألني ببسمة من اللقطة ، بس انا كنت مبتسم لضحكتا الزادت نبض قلبي لا زيادة ولا اكتر .
_ شفت ... والله الممثلة دي عسل
لا لا هو العيد دا بقاني مجنون ولا شنو ؟ طيب لو ما جنيت دا شنو بس البحصل لي ، يعني انا اضايقت عشان قالت لممثلة عسل !!!!
لو سمحتوا بس مسشتفى المجانين احجزوا لي فيها .
تاني قبلت وقبل ما تعاين للتلفزيون استغربت ضيقي
_ في شنو يا جهاد ؟
_ ولا شيء .. بس يعني ... هي عسل وانا شنو ؟
رفعت حاجب واحد شوية كدا وابتسمت بعدها ضحكت لدرجة ختت راسها علي صدري النبضاتو فضحتني
دايما مفضوح بسبب القلب دا قدامها ، حتي لمن ازعل منها بتخت طوالي يدها علي صدري محل قلبي عشان تستفزني وتقول لي " ياهو قلبك بدق عشاني زي حقي "
_ أنفال خلاص
قلتها بضيق ، زي العادة ختت يدها جهة قلبي
_ قلبك بيقول حاجة غير تعابير وشك
_ بس سؤال محيرني ، ليه باقية لي سمحة كدا ؟
_ بس دايما انا سمحة في نظرك
_ بس الليلة حاجة مبالغة يا زولة عملتي بي شنو اعترفي
ضحكت ضحكة سلبت انفاسي ومالت علي جبهتي باستها كمل الناقص
_ يمكن عشان أول عيد لينا سوا ؟
هو ليه ما في زول شايف الرقة دي والحنية والجمال و... اقول شنو ولا شنو بس
هو دا ابتلاء بس جا عن طريق الحب واني اتعذب في قربها وبعدها ، ايوا بس بكون شنو غير دا
_ يا رب ألهمني الصبر في حب البنية دي
ضحكت وحضنتي اكتر ، زحيتها مني بصعوبة وجريت من المكان ، لو فضلت أكتر من كدا بنجلط من دقات قلبي السريعة دي .
أنت تقرأ
خربشة قصة
Short Storyكل جزء قصة مختلفة ، قصيرة ودسمة ، لو بتحب الرومنسية أو بعد مرات الحزن والضحك والدراما ، حّضر مناديلك وتساليك وإتفضل إستمتع بكل قصة . مع تحياتي هبه الله حسن ،،،،، ويمكنك زياره صفحتي للروايات في الفيس بوك #روايات_هبه_الله_حسن لكل جديد وحصري
