خربشة قصة

القصة 53

#خربشة_قصة

_ ح يعرس يا قصي ، بعد أهاني طوالي فتش غيري ، حاسة قلبي حيقيف

_ ما تقولي كدا يا عبق

حقيقي ما عارف الجملة دي كيف قدرت أكتبا ليها لمن رسلت لي ، أنا القلبي  الحيقيف لو زدت لحبها دا ذرة تاني ، أكيد ما بستحمل أكتر من كدا بيتمزق حبة حبة
أصعب شعور في الدنيا تكون ما شايف غير إنسان واحد وهو معتبرك مجرد أخ  .

مسحت وشي بوجع مع تنهيدة مُرة ، كل نفس طالع مني هسي باسمها ينادي عبق عبق  واي نفس احرى من التاني ما عارف كيف أقللو

  أفرح عشان هسي ممكن أعرسا انا ، ولا أموت من الألم بسبب نبرة صوتها البتعذبني لمن تتكلم معاي وتشكي لي .

ركبت الموتر ومشيت لبيت خالتي ، ولو جينا للصح مشيت للبيت الفيه قلبي .

عبق حب طفولتي وللاسف المرير ما عرفت دا الا لمن إتخطبت لولد عمتها

_ خالتي نادي عبق

نظرة خالتي المشفة دي ورتني إني كيف مكشوف قدامها الا هي  ، نزلت عيني منها محرج ففي الاخير دي بتها .

ربتت على كتفي ومشت الغرفة تناديها 
قاعد  ومتوتر و خايف منظرا المشفق يدمرني أكتر مما أنا فيه  ، كفاية داسي في قلبي ،  فاق كتماني تحملي وقدرتي .

حسيت بيها قبل ما تطلع ، قلبي دلاني وخفق بقوة اضطريت اخت يدي عليه عشان أهديه

عيني ما نزلت منها رغم محاولاتي أبعد نظري ،   لو تقدروا تقولوا لعيوني حرام وغضي أنصحوها لان عيني إتبرت مني وسمعت نداء قلبي

نزلتها لمن شفت عيونها الحمراء المنفوخة ، والاسوأ عرج رجلها البسببو  خلاها وفسخ خطوبتو منها

_ حالتي بائسة صح ؟!

قالت جملتها لمن قعدت قصادي بنبرى بكى ، هو الزول ممكن يتعذب ببكى زول تاني ؟!!
طيب انا ليه حاسي بصوت بكاها دا بقطع فيني !!؟

_ لا أبدا ، زي ما إنتِ زهرة مالية الكون بعبقها

آخ من بسمتا  ! ما هو أصلو ما معقول البتعملو فيني البت دي ، أنا أصلا كيف للان قاعد وما عرستها

_ يا خالتي ..

لو تصدقوا أنا زاتي اتفاجئت زي ما هي اتفاجئت وخالتي جات مهجومة من جوا ماسكة معلقة شكلها بتعمل في عصير  من صوتي العالي لمن ناديت خالتي

رمشت كم مرة إستوعب فيه الحصل  ، الواضح والصريح في حضرة مالكة قلبي كل خلية في جسمي بتتبرى مني وتعمل الشايفاه مناسب ليها  حمحت أجلي المشاعر القربت تدفق من خشمي بس الحمد لله وقّفتها في الحلق

_ نادي عامر يمشي معانا انا وعبق لمشوار ، يلا يا عبق البسي عبايتك

وطلعت من البيت واقف مع أخوها عامر العمرو 15 سنة ، رفضت أقول ليها وين ماشين لحدي ما اتفاجئت بقيف في بيت عمتها .

سألنا منو قالوا في دكانو طوالي اتوجهنا هناك ، وقبل ما يستقبلنا شفت نظراتو الشامتة علي رجل عبق البتعرج ومن غير ما أحس لقيت نفسي بلكمو في وشو الاصلا كنت نغبون منو دا .

_ أيوا يا قصي دا الكنت عايز أعملو بس امي شاكلتني ومنعتني

شجعني اخوها ، اما هو بعد غضب عايز يتعارك معاي الرجال اتدخلوا وعبق لسا مصدومة ودموعا أبت تقيف وأخوها بشاكل فيها

_ يا عويرة دا جاب ليك حقك

أما شبيه الرجال داك أدي  كلام ما ليه لازمة وانا بس ساكت لحدي ما في الاخير قلت

_ حتندم لانك خليت كنز زيها ، بس الحمد لله لانو عبق حتبقي مرتي

كان لازم أرد كرامتها لمن رسل بكل صفاقة  عايز حاجات خطوبتو ودبلتو بعد ما عملت الحادث الاتسبب في عرج رجلها ، لو أمو عايشة كانت إتبرت منو  ،  بدل يجي يكّفر ليها يجي يقول أدوني حاجاتي ، والاسوأ لمن إتحاججو معاه وقال

_ أعمل بواحدة مكسرة شنو .

وللاسف سمعتو هي .

عامر أخوها طول الطريق بشكر فيني على العملتو

نزلت من العربية وطوالي دخلت البيت من غير ما تتكلم معاي  وانا بعاين لطيفها الدخل كالعادة اللسان سلطانو قلبي

_ عايز أعرس أختك ، وباسرع ما يكون

فرحة اخوها كنت بتمنى هي التفرح كدا لمن اطلبا ، وامها الزغرتت بمجرد ما دخل عامر البيت وقال

_ امي قصي داير يخطب بتك ، وينها هي العاملا فيها كئيبة عشان واحد طحنوه ولا عمل حاجة غير يتكلم زي النسوان .

ضحكت على كلامو ، وامو جات إتكلمت معاي

_ من زمان كنت دايراها ليك ، بس دايما بتقول لي قصي زي اخوي

اتلاشت بسمتي ، بس انا ما اخوها ، ما اخوها يا ناس كنت عايز اصرخ عشان تفهم
.......

" لو ما دايرة العرس ما بجبرك يا عبق "

رسلت ليها ، شافتا وما ردت تاني رسلت

" عارفة حبيتك من متين  ؟!

من وقت بجريني من مذاكرتي عشان أمسك ليك عروستك تمشطيها ، بس أنا الغبي ما عرفت حبك دا الا لمن فاجئتيني بانو رشحوك تعرسي ود عمتك الجاي من السعودية

وقتها ما قدرت اتنفس للحظة ، ومنو  عرفت انك انتِ الاكسجين البتنفسو  وما عرفت الا لمن حسيت بانك بتروحي مني .
هسي مبسوط للقدر الخلاك لي ، وعشان عارف إنك ما حبيتي شبه الراجل داك عشان كدا واثق من نفسي وقدرتي على اني اخليك تحبيني "

رسلت مقطع صوتي  ، جزء من صوتها أحياني وخلاني الليل كلو أسمعو وما بمل منو قالت فيه ببحة صوتها البتعزف فيني ألحان عمري ما ح أعرف هي شنو وماهيتا

" انت اكتر شخص في العالم برتاح ليه ، ما بقول انك ما اخوي لانك انت اخوي وابوي وامي وصحبي وود خالتي ، وطبعا اكيد داك ما حبيتو انا انجرحت زي اي واحدة بتنجرح وتتألم لمن تترفض بالطريقة دي

، بس انت طلعتني من دا كلو ، ايوا بطريقة هندية هههه بس عجبتني ، ومن هسي دخلت التحدي ونشوف ثقتك دي الحتخليني بحبك "

مر شهر من زواجنا وأنا حاليا الحمد لله كل يوم بديها درس من دروس حبي عشان تتخرج واحدة بتعشقني زي ما أنا متيم بيها .