خربشة قصة

القصة 64

#خربشة_قصة

_ أنا حبيت

_ حبيت ؟!! إنت جادي ... منو ؟

_ ما عارف زاتو هي منو ، ولا إسمها ما عارف ولا حصل شفتها .

حسيت بصحبي عايز ينجلط ، حتي ما قدر يتكلم

_ لا إنت واعي يا نصر الدين ، كيف يعني

_ تتذكر البت اللي شهر بحلم بيها كل يوم ، حبيتها والله .

_ حبيت واحدةمن حلم يعني ؟ إنت بتتكلم جد ؟

_ ايوا

_ يمكن شفتها قبل كدا  في الحقيقةوبتحلم بيها

_ ما بعرف حاجة بس أنا حبيتها

قد يكون كلامي جنون ولا زول يقول لي إنت متوهم وما عندك موضوع بس البت دي رقما عني حبيتها ، كيف وليه ما عارف .

_ أجيب ليك العشا يا نصر الدين

سمعت كلام أمي ، بس وقتها أنا جهزت نفسي للنوم وحتى غمضت عيني عشان أحلم بيها وأشوفها ، إشتقت لعيونها البنية الواسعة ، وشها الخطفني وملامحها البريئة ، وبسمتها الخيالية .

_ لا ما عايز

قلت كلمتي وبسمتي للضرس الاخير ، ح أشوفها وقلبي يتهني بنظرة منها .

قلبي نبضاتو زادت من شوقي والنوم أبا يجيني ، أخلاقي ضاقت وقتها ،  عملت اي شيء عشان أنوم وبعد فترة نمت .

صحيت الصباح بس  وشي ما بتقابل ، ما شفتها أمس ، وللاسف يومين ما شفتها في الحلم ، حالتي إتبدلت وبقيت زهجان من أي شيء .

_ مالك الايامات دي يا نصر الدين ؟

_ ما في حاجة

حاولت ما أظهر  نفسي اني كويس بس إمي ما صدقت

_ طيب شوف شفت ليك بت ما شاء الله ، عايزاك تشو....

_ يا أمي ما داير

_ كيف يعني ، انت براك قلت لي فتشي لي عروس ، ولا دا ما كلامك ؟

_ أيوا ... بس

_ يعني لقيت البت عشان ما اسألك تاني

_ اا ايوا ...

_ منو ...

سألتني بلهفة ، عايزة أقول ليها اني عايز واحدة من حلم ، يعنى أكيد ما في زول حيصدقني ، دا لو ما ودوني لدكتور يكشف علي .

_ طيب خلاص أمشي لي السوق جيب لي حاجات اختك جاية .

فرحت لجملتها ، اختي الوحيدة الممكن تفهمني ، يمكن تساعدني  ، حالتي دي ما ليها علاج
.....

شلت  بت أختي الصغيرة بلاعبها ، هي قعدت جنبي

_ ها مالك ؟ أمي قالت لي اليومين ديل ما تمام

_  هي لمن لحقت ورتك ، وطبعا قالت ليكِ خليه يتكلم ويوريك مالو

_ يلا مدام عرفت قول سرعة

زفرت بضيق وقلت بتردد

_ بس بالله ما تضحكي فيني أنا جادي ... أنا حبيت ...و.. واحدة ما بعرفا ... شفتها في الحلم

بعد نص دقيقة إتصدمت وبحلقت في وشي ، حاولت ما تضحك ولكن ضحكت وما قدرت تقيف ، حاولت اسكتها بس رفضت قمت طلعت من الغرفة لحقتني مع الباب ولسا بتضحك .

_خ خلاص ... تعال ...

قعدت مكشر وشي  وهي لسا بتحاول ما تضحك

_ أنا جادي علي فكرة

_  طيب أحكي لي أفهم ...

_ فجأة حلمت بواحدة ما شاء الله في منتهى الجمال ، حتى الأدب والأخلاق  شفتها كم مرة في حلمي بتصلي و...

قطعت كلامي لمن سمعتها بتضحك

_ خلاص والله ما قصدي ، طيب هي ما حقيقية يا نصر الدين ويمكن وهم في راسك وحاجة انت بتتمنها  وكدا ... انساه يا نصر

_ والله العظيم حبيتها ، إحساس القلبي بدق لمن أصحي وإتخيل تفاصيلا ، بسمتها لمن تعاين لي بخجل ، ما بكون مركز طويل  في صورتها  ... هسي التلاتة يوم ما شفتها وحالتي مقلوبة من اليوم داك .

_ هو الموضوع بالجد يعني

اتأثرت بكلامي وعيوني بدت تدمع حرفيا

_ طيب دا مستحيل تلقاها حتعمل شنو ، عشان امي ما تزن انت شوف البت الاختارتا ليك امي ، شوفها وقول ما عجبتك بس ما أكتر .

......

وقفت مصدوم بعاين ليها وهي منزلا وشها ، صاعقة ورعشة كبيرة جات في جسمي لمن شفتها ، هي زاتها  البحلم بيها ، نفس خجلها واي حاجة فيها .

اسمها سمر ... إكتشفت انها بت جارة اختي ، شفتها في بيت اختي صدفة ، ايوا عيني شافتا بس ما انتبهت ليها ، لكن قلبي أبا إلا يذكرها لي فجابها بي بصورتها في أحلامي .

لمن رجعت من شوفتها إتفاجئت امي بحالتي السعيدة بعكس الحالة المرقت بيها ، حتي جيت بحلاوة وزعتها للشفع .

_ يا أبوي عايز  نتفق معاهم طوالي ونعقد .

_ براحة يا ولد مالك ملهوف كدا

ما يعرف انو أنا شوية وبطير من السعادة لمجرد انها هي ، اختي لسا مصرة تضحك فيني وعلي لهفتي لحدي ما عرستها .

_ سمر ...لو تصدقي انتِ حلمي

عقدت حاجبها  وابتسمت بسمتها البتقتلني ديك

_ ما بهظر  قلبي اختارك ، فضل يزن علي لحدي ما خلاني متعلق فيك باحلامي الكل يوم ...اتكلمي يا سمر

_ اقو..ول شنو

بعشق خجلها يا ناس !

_ قولي اي حاجة لراجلك المسكين دا، طيب قبل ما إتقدم ليك بتعرفيني ولا فكرتي في حتة بس

- بصراحة أنا اعجبت بيك  فضلت ادعي بيك ليل نهار

سمعتو جملتا ، اعمل شنو  في قلبي الرادها بقوة دا

_ طيب اعمل شنو في بحر حبي ، فاض وكّسر وعمل كوارث جواي .