خربشة قصة

القصة 71

لو يوم ما نشرت معناها إتأكدوا إني  اتشليت من البكتبو 😢✋😂

#خربشة_قصة

_ خليك عارف إني مجبورة أعرسك وبس

دي الجملة الوحيدة القلتها ليه لمن إتصلت عليه .

قفلت الخط وإتنفست براحة

_ عاجبك العملتيه دا يا رجاء ، ما بعيد بكرة يجي يقول ما عايزها

_ أحسن ، أصلا لا شبهي ولا إستايل حياتي

_ عاجبك الاولاد ديك يعني ، كلهم من غير إستثناء ما بتحموا المسوؤلية

عاينت لصحبتي بضيق

_ يا زولة إنتِ ما نصيحة ، القرش بتجيب أي شيء

_ استغفر الله يا رب ، بس برضو بقول ما واعية وما  فاهمة والحمد لله أبوك حسم موضوع بلال .

_ مش مُصّر ، يشوف لو ما شافني مطلقة وجاياه بعفشي

_ اعوذ بالله  ،  ليه ؟

_ ما قلت ليك ،  لا استايلي ولا طريقة حياتي ، العرفتو إنو معقد ،  ولبسي وطريقة حياتي ما بتعجبو فبديهي ما نتفق.

دا كان رآي فيه  ، والاهم  عندي هي القروش ،  بغض النظر عن هو منو الشخص ، بس الاسمو بلال جا نّوم أبوي مغنطيسيا ولا شنو ما بعرف ، بس اتشربك فيه ورفض نهائي يسمع إعتراضي .

من جملتي ديك إتوقعت اليوم التاني يجي يفسخ الخطوبة بس ما جا إلا وهو بتفق مع أبوي في موضوع العرس وتحديدو.

مضايقة جدا إنو ما عمل لي حفلة بس لبست فستان واسلامي كمان ، اجبرت ألبس خلاف رغبتي

_ يا بت في عروس في يوم زي دا تمد بوزها شبرين

حاولت تتكلم معاي صحبتي بس اتكلمت بضيق

_ والله شوية وإنفجر ، يعني شنو ما يعمل حفلة هو الزول عايز يعرس كم مرة ، لا وكمان جبرني وجاب لي الفستان المقفل دا .

_ بس والله بالغتي ، الفستات فظيع عديل ، ياخ دا جابو ليك من برة بمجاسفات وعارفة وضعو كيف عشان بس يرضيك ،  بطلي بس تنقي في اي شيء

لو جينا للصراحة الفستان يخطف من سماحتو بس أنا برضو مضايقة لانو الفي راسي كلو ما بقى وتم زي ما مخططة من زمان .

.....

_ اليشوفك مكشرة كدا يقول خاطفك ابتسمي عشان ما يفهمو غلط بس

عاينت ليه بصدمة ، هو يعني يعرف يهظر ويبتسم كمان ، في التلاتة ولا أربعة مرات ديك كان عبارة عن رجل آلي .

ما قدرت أرد مهما يكون أنا بت بخجل ومتوترة في يوم زي دا .

قعد وجا قعد قصادي

_ شوفي يا بت الحلال ، عارفك انك مضايقة عشان عرستيني  بس صدقيني باذن الله بعوضك عن قلة  القروش 
وبالنسبة للعرس ما عايز أبدا حياتي معاك بحرام في حرام ، والقروش برضو ما كل شيء وبتشوفي .