خربشة قصة

القصة 43

# خربشة_قصة

_ اها يا عارف ، متين حتجي ؟

_ اجي وين ؟

- كيف يعني تجي وين ؟ تجي تتقدم .

قلتْ ليه كلامي دا وانا قاصدة وللمرة المليون ، وهو كمان للمرة المليون يرد نفس ردو
_ يا سمر انا جاري منك ولا شنو ؟   خليني اظبط شغلي وأصل .

_ انا قلت ليك اعقد ولا عرس  بس امشي قول لابوي ياخ انا عايز بتك

_ وهو بالسهولة دي ؟
_ ما شايفة حاجة صعبة انا ، وخصوصا انك جاهز .
حسيت بيه زفر ، سكتْ مسافة وتاني قال

_ سمر في حاجة عايز اقولا ليك .

_ اتفضل

_ خلينا ننهي العلاقة دي !

ضحكت ضحكة انسان ما مصدق ، مهزوز من جوة

_ خلاص لعبة سمر استهلكت !؟

صرخ فيني بغضب
_ سمر بطلي استفزاز ، انا بتكلم معاك بالعقل ما في داعي لكلامك دا !

_ والمطلوب مني ازغرت ليك ولا بساطة اقول ليك جدا ياخ دا يوم المنى .

_ اكمل كلامي اول

_ وليه تكمل ما واضح ، انت احسن بدل تلف وتدور وتبطل تفكر في الكذبة الجاية شنو ! تريح قلبك وتريحني .

_ وانا كنت واضح من اول

_ لا كدي قلتْ شنو ؟!
كيف يعني واضح من اول ؟ تحب اذكرك انت جريت وراي لا معليش زحفت وراي قدر شنو عشان تصل لي ؟! ولا عايز اوريك كيف دخّلت اي زول واسطة عشان اوافق اعرسك ، لاحظ انك كنت بتقول عرس عديل بس انا الغلطانة الاديتك فرصة .

_ انتي عايزة تذليني يا بت انتي ؟

_ لا معليش ما ذل ، من حقي اطلع الجواني من غيظي فيك وخداعك لي بالصورة دي .

قفلت الخط منو ، اتصل تاني طوالي قفلت التلفون كلو  ،كنت متوترة ومن جواي زعلانة شديد علي الايام والا يالي الضيعتا فيهم  وانا مربوطة بحبل كذبو ، الكان مزينو لي بشرايط الخداع ولمن قدم ظهر اصلو البالي .

عدا اليوم دا كلو سرحانة وبراضي نفسي ، وكل الحصل لخير
فتحت تلفوني ، اتصلت علي صحبتي ، حكيت ليها الحصل بحرقة قلب عشان ابرد قلبي .
تاني يوم مشيت جامعتي ، مشيت محلنا انا وصحبتي بس ما لقيتا كالعادة ،فقعدت انتظرا .

جات زميلة لي، قعدت جنبي تونسني واثناء الكلام
_ وكمان مبروك لهديل ، شنو الغتاتة والدسديس دا يعني ؟

اتفاجئت وقلت باستفهام متعجب

_ مبروك لشنو ؟ !

_ اجي ! مبروك لصحبتك الخطوبة .

حرفيا اتشيلت من الصدمة

_ لا دقيقة انتي قصدك صحبتي البمشي معاها دي هديل ياها زاتها ؟