#كرفسة العيد اااا اقصد عيديتي حبايب قلبي ❤️😆
، لااازم أعايدكم بحاجة كدا علي زوقي😌✋
اها تقولي بسم الله وتاكلوا سمح عشان ما تتصدموا بالحتقروه وتحردوا الاقل هااا ؟!!😀😁😁😆😆
#خربشة_قصة
_ لسا ما رد ليك ؟
_ لقيت تلفونو مقفول وخالتو قالت من طلع بعد الصلاة ما رجع
_ معليش يكون مشغول يعايد الجيران واصحابوا وكدا
زعلت الصراحة وجاني ضيق كبير ، كنت عايزة سراج اول زول أعايدو وأسمع جملة " إن شاء الله السنة الجاية في عصمتي وحقتي "
لينا عيدين بيقول نفس الجملة وبتمنى تتحقق ، بس هسي ما رسل لي العيد دا .
إتصلت لامو "خالتي" قالت لي طلع وما رجع ، معقول نساني حتى مجرد رسالة ما عبرني بيها .
_ بنتظر كمان شوية كلام اختي صح .
انتظرت وانتظرت ، بعد الضهر قاعدة متمحنة جات امي
_ الدنيا عيد ، متمحنة كدا مالك ؟
_ خليها يا أمي ، يمنى ما عبروها وعايدوها من زول كدا
ضحكت امي وقالت
_ غيتو ود اختي دا جنن بتي ، ربنا يفرحني بيكوا ان شاء الله
جا أبوي داخل ، نطيت عليه مديت يدي
_ أبوي العيدية
ضحك وقال
_ كبيرة زي دا ودايرة عيدية ؟
_ مهما كبر الانسان بيفضل صغير في عين ابوينو ، فما تتهرب ، يلا يا حج بحبح الجيب
_ بعدين العصر بديك عيديتك هسي المعاي وزعتو للشفع
......
حاولت علي رقمو بس برضو مغلق ، العصر جا اختي جات مشت علي دولابي
_ سرعة يا يمنى ألبسي دا وأجهزي الرجال في الصالون شوية ويبدوا .
_ يبدوا شنو ؟
قبل ما ترد لي ، سمعت صوت حافلة وصلت ببوري ، والزغاريد عالية من النساوين ، ضحكت اختي وقالت
_ دي المفاجئة وعيدية ابوك ، عقدك انتِ وسراج هسي ، يلا بسرعة ما في زمن المأزون علي وصول
فضلت مبحلقة فيها فترة كبيرة محتاجة اصحى من الصدمة والمفاجئة دي .
تم العقد وقتها جسمي رجف وقلبي نبضاتو قربت تقيف من السرعة ، اهلي كلهم جوا يباركوا لي ويهنوني وانا في دنيا تانية .
....
وقفت قدامو بعد ما الناس فرت وطلب يقابلني ، اول من شفتو قلبي زادت نبضاتو للحد المخيف حتي نفسي واضح من الانفعال الانا فيه
بسمتو ما نقصت بيزيدا مع كل خطوة يقرب لي فيها ، لمن وصل لي ما قدرت امسك دموعي وبكيت وهو ابتسم يحاول يقاوم دموعو القربت تنزل
حضني شديد ولمن همس لي
_ ان شاء الله كل سنة في حضني دا يا يمنى
زاد بكاي فحنتو اكتر بحاول استوعب
همس تاني بعد إتنهد براحة
_ واخيرا حضنك الحلال ، لو تعرفي بس اتمنيتو قدر شنو !
زح من حضني للحظة إتمنيت ما يبعد ، ومسح دموعي وابتسم
_ ما في كل سنة وانت طيب يا سراج ولا احسن سراجي ؟
غمز لي في اخر جملة ، فضحكت بخجل وقلت
_ كل سنة وانت معاي
_ كل سنة وانتِ نبض قلبي يا يمنى .
أنت تقرأ
خربشة قصة
Short Storyكل جزء قصة مختلفة ، قصيرة ودسمة ، لو بتحب الرومنسية أو بعد مرات الحزن والضحك والدراما ، حّضر مناديلك وتساليك وإتفضل إستمتع بكل قصة . مع تحياتي هبه الله حسن ،،،،، ويمكنك زياره صفحتي للروايات في الفيس بوك #روايات_هبه_الله_حسن لكل جديد وحصري
