#مطلوب الراجل الفي الخربشة دا حيا أو ميتا ....😢😢
#خربشة_قصة
_ أنا ما عايزة إتمكيج عند المرة دي وإنتهى الكلام
_ إنتِ بتهظري ، دي أشطر واحدي يا أسيل وعملت لينا تخفيض كمان
ما أديتهم فرصة وطلعت من بيت الجياهة المفروض تجّيهني في عرسي .
وأنا في الطريق ، أختي جاية بوراي منفعلة بتتكلم بالتلفون
_ ما عارفة والله مالا فجأة طلعت ، وجيت لقيتها قالت ما دايرة دي
وصلت جمبي وهي بتتكلم ، فجأة مدتو لي
_ هاك إتكلمي مع معتصم
لمن قالت كدا عرفت إنها دقت لخطيبي وولد عمتي في نفس الوقت
زفرت بقوة وقعدت في حجر صغير ، جاني صوتو الهادئ الرزين ، بالأول سلم علي وإتكلم معاي قبل ما يدخل في الموضوع ، دا كّبرو في نظري اكتر
_ أحكي لي يا أسيل
_ لو حكيت ليك بتقول لي دا سبب تافه ، وهو ما تافه والله
اتقرش صوتي واتغير بسبب غصة بكاي ، اتفاجئ
_ بسم الله ، خلاص خلاص ، إنتِ هسي تمشي البيت مع اختك وبعد نص ساعة تكوني رقتي أنا وقتها اسمعك تمام
_ تمام
......
بعد نص ساعة اتصل لي
_ قولي سامعك
_ أنا خايفة ...
_ من شنو ... قولي لي
_ طيب بس بالله ما تقول علي هبلة
أنا إتفقت مع المرة على الزمن ، قالت تبدا تمكيجني مع صلاة المغرب ، قلت ليها طيب والصلاة قالت لي انتِ عروسة شنو يعني لو فوتي صلاة .
كنت متوقعة يقول لي ما عندك موضوع زي ما اختي قالت بس سألني
_ طيب ما قلتي ليها تنتظرك عشرة دقايق بس عشان تصلي فيهم ما بتاخد زمن ؟
اتكلمت بحماس لتقبلو إعتراضي
_ قلت ليها ، قالت هي حتبدأ لي قبل المغرب بشوية وعندها عروسات تاني حيبدوا بعدي ومع اللبس والمكياج ودا كلو بيدخل العشا ويضيع لي المغرب ، لو بدت لاي واحدة قبلي انا البتأخر وزمنا زي ما عارف محدود
زفر بقوة وقال
_ تصدقي إنتِ كبرتي في نظري أكتر يا أسيل
ما عرفت أرد ليه من خجلي فابتسمت وما إتكلمت
حسم الموضوع باني اشوف واحدة تانية وطبعا قربت أموت من الفرح وكمان مشيت أغيظ أختي المعترضة اننا نخلي الجّياهة دي
.......
" ها صليتي ؟ "
رسل لي رسالة نصية بعد ما خلصت خلاص ومستعدة للطلعة ، رديت
أنت تقرأ
خربشة قصة
Cerita Pendekكل جزء قصة مختلفة ، قصيرة ودسمة ، لو بتحب الرومنسية أو بعد مرات الحزن والضحك والدراما ، حّضر مناديلك وتساليك وإتفضل إستمتع بكل قصة . مع تحياتي هبه الله حسن ،،،،، ويمكنك زياره صفحتي للروايات في الفيس بوك #روايات_هبه_الله_حسن لكل جديد وحصري
