خربشة قصة

القصة 66

الليلة مافي فرشات ، لو الارض كفتكم زاتو 😂😂😂

#خربشة_قصة

_ لسا بتبكي ؟!

سألني بس ما رديت ، خت لي الجزر في الطربيزة

_ طيب عايني للحاجة البتحبيها .

لا شعوريا قبلت لكيس الجزر فقال

_ لا كدا كتير والله ، أنا قاصد تعايني لي تقّبلي علي الجزر ، بالجد بغير منو انا كدا يا مروة .

_ حسام بطل هظار ، والله أنا زعلانة منك

_ ومنو القال ليك بهظر

قالها بنبرة بالجد منفعلة، وقتها نسيت البكية والزعل واي شيء بس فاتحة خشمي سبع متر في غيرتُ البقول عليها دي ، أشّرت للكيس ولسا مصدومة بعاين ليه

_ جزر ؟! تغير من جزر ... ما جادي طبعا

زفر وكشّر وبرطم  بس سمعت كلامو البراحة دا

_ هو بقت علي جزر ،  من يوم دخلتي حياتي بقيت ما نصيح وبعمل حركات هنود عديل .

شال الكيس وختاه وراه

_ كدا أحسن عشان ما أشوفو ... أها نسّيتيني موضوعي الاساسي

لا إراديا ضحكت ضحكة صغيرة وهزيت راسي  ، مسحت دمعة نزلت من عيني ، فقّرب مني ومسك لي أضاني زي الشافعة بقرصني

_ ااي مالك هسي أنا عملت شنو ؟

_ عشان تحسي بحبة وجع ، ما هو ما ممكن تبكي انتِ وأنا براي بتألم .

دايما يطّلعني من مودي بأبسط شيء يعملو والمشكلة بطريقة ما مقصودة وعفوية منو .

_ نجي للجد يا مروة ونحسم الكلام دا  ...عشان ما تأذيني كل يوم بموية النار البتطلع من عيونك تحرقني أنا ...

_ نحسمو كيف يا حسام ، عملنا عملية وببلّع علاجات وياهو خمسة سنة ما في أتر لجنين ، كلام الناس قّطع جلدي

_ لو عايزين نرتاح أول،  لازم نبعد كلام الناس ، دخليه بجاي وطّلعيه بجاي ، وبالله ما تذّكريني بعمليتك ديك ، قربت إتشل فيها بسبب تعبك

_ انت الم تذكرني بجنونك ... تصرخ في الدكتور لمن يقول ليك يعملوا لي عملية تانية وإحتمال تنفع وأحمل ... وانت لا تنفعل وتجّرني ... اصلا دا هو المبكيني الليلة وزعلانة منك

_ شوفي !

أبكي لبكرة ولسنة كمان لكن ترجعي تعملي عملية وتتعبي وأنا البموت حي ، لا شكرا ...
ما مستغني عن روحي ...
وكمان أزعلي مني وما تتكلمي وقتها ما بقول ليك العلاج المضمون اليخلينا نجيب دستة عيال .

قام بغرور من قدامي وبصفر بخشمُ ، وأنا فاتحة خشمي بعاين ليه وهو يحمر لكيس الجزر

_ خلي الكيس دا ينفعك وقتها ...