#خربشة_قصة
_ اهدا يا رامز
حاول اخوي يهديني بس بقيت شبه ما واعي ، شايفها راقدة ما بتتحرك ممدة في السرير ودايرني أهدا ؟!
أكيد بهظروا ، إنفعلت وأنا بحاول إنفلت من أخوي واتخطى الباب وادخل ليها في العناية
_ فكني قلت ليك ، أنا بقدر أجيب ليها أحسن دكاترة واوديها مستشفي و....
قاطعني واحد شكلو دكتور
_ انت هسي الانفعال ما حل ليك ولا ليها ، حالتا دي لو لبيت بيها الارض ما حيعرفو ليها شيء ، بس عليك هسي تدهي ربك هو بس القادر يصحيها من الغيبوبة .
_ سمعت يا " رامز " قال شنو الدكتور ، اهدا بلاش البتعمل فيه دا .
بصعوبة بعدني اخوي الصغير من جنب غرفا ، مشيت الجامع حق المستشفي وقتها ووقفت برجف عند بابو ، ما قدرت ادخل بالرغم من اني بدخلو كتير بس الليلة صعبة الليلة
_ مالك واقف ادخل ...
بوراي لزاني راجل كبير في السن فدخلت معاه ، قعدت دقيقة سارع حتى ما صليت تحية المسجد وبعدها قمت علي حيلي وصليت تحية المسجد وفي سجودي بكيت ، حتى ما اهتميت بصوتي الممكن بتسمع ، كنت بصلي بس ما عشان ربي ، عشان ارضي " مهجة "
وانا ساجد ربت علي ضهري الراجل العجوز لمن طولت ، سلمت فاتكلم طوالي
_ لو أذنبت الله غفور رحيم ، ولو تعبان وعيان او زول قريب ليك ربنا هو الشافي ، كل شيء لخير يا ولدي فما تعمل في نفسك كدا .
رجعت بعد الصلاة قعدت جنب العناية الهي فيها ، شردت في الفات
هي كانت اجمل ما حصل لي في حياتي ، شفتها صدفة في محل بتشتري لشافع لعبة ، اللفتني ليها انو الشافع دا ما بتعرفو ، ولحظي السمح لقيتها جات مرة مناسبة اخت صحبي ، وقتها قدرت اتحصل علي رقما .
ما اتصلت ليها ، بس بقت في بالي ، كنت موهوم اني مكمل ، شاب صحيح ، عندو القروش التجيب ليه اي شيء ، ومنها هي " مهجة "
ما كان بغرها القروش بس اهلها عكسها ، سهل لي الطريق ليها وخطبتها رسمي بعد ما رفضت رفض قاطع تواصلنا من غير اساس .
شوية شوية من كانت مجرد هدف بقت محور حياتي ، دخل حبها قلبي وانغرس فيه ، ومع مرور الزمن بادلتني نفس الشغف .
تم عقدنا بس من غير زواج لانها منتظرة ابوها يجي يحضرو ، فعقدنا بس بطلب من ابوها وبصراحة بعد طلبي انا ولا اقول الطلب المليون .
من حبها بشوف سعادتا حاجة فوق الخيال ، بقيت بسعي ليه بكل الطرق الممكنة ، ما ملتزم بس اجبرت نفسي علي اني اظهر وابين ليها كدا عشان اعجبا .
فتحت الدردشة من اول رسالة بعاين وببكي ، رسالة صوتيه منها
_ رامز صليت ؟!
_ انا منتظرك من قبيل ما قدرت اعمل شيء
_ كدا انا شلت معاك الذنب ، ليه يا رامز دي صلاة ما لعب
_ اسف ، وان شاء الله صلاتي دايما في وقتها وفي الجامع كمان ، مبسوطة كدا ؟!
_ علي فكرة الكلام دا ليك واكيد ح اكرن مبسوطة لمن راجلي يكون ملتزم عشان نبني اسرة صح .
_ ما احلي كلمة راجلي من حشمك يا " مهجتي " ابوك دا ليه اتأخر كدا ، هو الخمسة يوم دي مالا باقية لي خمسة سنة كدا
ضحكت وردت
_ بهون يا رامز ، اصلا وليمة ما فرقت ياهو عاقدين
_ رامز ح يموت في يوم من اسمو العسل من خشمك دا .
قفلت الدردشة بسرعة وملت ابكي وجعي علي بعدها .
ربت علي زول ، مسحت دمعتي سرعة واستعدلت لقيتو صحبي
_ شدة وتزول ان شاء الله ، وبكرة نجي نحضر عرسك من الجننتك
_ ان شاء الله ، يا رب تقوم لي بالسلامة
_ عارف الانت فيه دا ابتلاء ، تتذكر قلت لي شنو ، بقروشي بحصل علي الدايرو ، الله وراك هسي وكانو بقول ليك عندك قروشك يلا طلع مرتك من غيبوبتا لو تقدر من غيري .
انفعلت لكلامو
_ انت جاي تواسيني ولا تزيد علي
_ ما قصدي يا صحبي بس حبيت اوعيك واوريك ، بتعنل اي شيء زمان خير بس ما لربك لرضى زوجتك وتكون مبسوطة منك ، يا ريت الحصل دا يبقي ليك عظة وتفصل حبك لمرتك ورضي ربك
ملت وقلت بندم
_ انا فعلا مقصر والله ، بس انا عايز اتوب ، الله من بغفر لي
_ الله اسمو الغّفار يعني مش غفور بس ، المهم انت هسي اصبر واحمدو عشان بالابتلاء دا وراك طريق الصح والا كان فضلت معمي طول الوقت .
مر شهرين علي غيبوبتا ، وانا بتقطع في كل ساعة ، وزني نزل وبقيت ما بتكلم كتير غير العبادة والصلاة ، وهي بس
لحدي اليوم الصحت فيه ، كمية الفرحة الحسيت بيها شديدة جدا ، قلبي رجع لي ، سجدت شكر لربي ببكي ، رجعها لي هو الوحيد لا مال ولا معارف ولا سلطة .
بعد يومين فضلت اعاين ليها بس ، فتحت عينيا وابتسمت ، شلت يدها وبستها وقلت
_ أنا آسف يا مهجة
استغربت
_ علي شنو ؟
_ علي كذبي ليك ، انا ما الراجل البتتمني تعيشي معاه ، ملتزم يعرف ربو ودينو وهمو الاخرة ، انا العكس شايف الدنيا بس قدامي لدرجة بكنت بعمل العبادات والاوراد والاذكار دسك كلها عشان انتي تبقي مبسوطة ، كنت غلطان لدرجة كبيرة بس خوفي من انك تبعدي حاجب عني الصح والغلط
ولعكس ما اتوقعت ابتسمت
_ في كلامك دا السمعتو كلو كان ، يعني فعل ماضي ، مشى ، قدامنا المستقبل يا " رامز "
البقوم بالليل بتسحب ويصلي ويدعي ربنا يغفر ليه عمرو ما كان همو الدنيا ، ايوا شفتك امس لمن كنت راقد هنا ، معناها اتغيرت ، ودا هو الراجل الدايراه ، يغلط ويعرف غلطو ويصلح
ممكن في ملتزم يشوف نفسو ما بيذنب اعمل بيه شنو دا ، والاهم من دا كلو اني عايزة راجلي باي شيء انت عليه لاني ببساطة بحب راجلي .
كيف ما بعرف بس حضنتها ببكي ، دموع الرجال صعب تنزل الا في الشديد القوي
وانا بسمح بيها تنزل في حب زوجتي وحب ربي وبس .
أنت تقرأ
خربشة قصة
Cerita Pendekكل جزء قصة مختلفة ، قصيرة ودسمة ، لو بتحب الرومنسية أو بعد مرات الحزن والضحك والدراما ، حّضر مناديلك وتساليك وإتفضل إستمتع بكل قصة . مع تحياتي هبه الله حسن ،،،،، ويمكنك زياره صفحتي للروايات في الفيس بوك #روايات_هبه_الله_حسن لكل جديد وحصري
