خربشة قصة

الحلقة 89

#🤗😢😢❤️❤من أين لنا هذا الحب ؟

#خربشة_قصة

_ يا أمي عليك الله وريني ليه رفضو ابوي بعد ما وافق ؟

_ سلوى بالله أنسي الموضوع دا .

_ يا أمي والله حرام عايزة أعرف ليه رفضتوه .

نطقت جملتي ودمعت عيني ، اتنهدت امي وقالت

_ نعمل شنو يا سلوى ما إنتِ عارفة الحاصل  ، ود عمك قال عايزك ورفض الشاب .

اتوسعت عيني مصدومة من كلاما ، قمت علي حيلي شبه ضايعة بحاول استوعب

_ ود عمي ... كيف ؟! ... مش ، مش دا رفضتو وقلت ما عايزاه ... الدخلو في حياتي شنو بس

انفعلت في اخر جملة ، نهرتني امي ، ما إلتفت لكلاما ، لبست توبي ماشا علي الديوان  ، عارفة اني ابوي قاعد معاه ود عمي .

_ أبوي عايزة اتكلم معاك ضروري .

قلت جملتي بصوت مهزوز من البكى مع مسح دمعتي النزلت

_ لبعدين طيب

_ لا يا ابوي الموضوع مهم  ما يتأجل

استغرب وسألني

_ طيب قولي في شنو ؟

_ مش يا أبوي انت المسؤول مني وولي أمري ما غيرك ؟

_ دا كلام شنو  ؟  أكيد طبعا

_ طيب ليه في ناس يقرروا ويحكموا في حاجة ما ليهم دخل فيها .

ولد عمي سامع كلامي وفهمو ، انفعل فيني وصرخ

_ الظاهر  انتِ ناقصة تربية عشان تقولي كلامك دا

أبوي إنفعل فيه بدوروا

_ انا ما مت عشان تصرخ في بتي وقدامي ... وانتِ شنو الجاك لمن جاية تتحاججي معاي في موضوع زي دا ، يلا سرعة من هنا .

مشيت غرفتي وقفلت الباب ببكي ، اخوي بالمسا جاء  وعرف الحصل جاني الغرفة وانفعل فيني

_ اخر  الزمن جاية  تنزلي راسنا في الارض ، اسمعي هنا الزول الجا داك ولا تحلمي بيه زاتو عشان تعرفي قلة ادبك سمح

ضربني اثناء كلامو الا ادخلت امي وابوي الصرخ فيه وقال ليه

_ انا لسا حي لمن اموت اعمل الدايرو يلا قدامي من هنا .

خلوني منهارة من البكى ، كنت موجوعة ما من الضرب ، كان اهون علي من كلمات اخوي الضبحني بيها ، يعني كدا ما حاكون ليه ؟

شلت تلفون داساه منهم غير الشالو مني اخوي واتصلت عليه بيد ترجف

اول من سمح صوتي حسيت بيه قلق

_ في شنو يا سلوي ...انتِ ق...

_ معتز انا عايزاك انت بس عليك الله حاول تاني عشاني ،  اول مرة اقولا ليك صريحة بس خايفة ما تكون من نصيبي