خربشة قصة

القصة 51

#خربشة_قصة

_ بعد رفضك للرجال بأنواعم وافقتي علي دا ؟!!

_ أحسن منهم

_ يا بت إنتِ عويرة ، دا مفلس يا داب بيبيع ملح انتِ متخيلة ، ما قادرة أصدق ترفضي كل المغتربين والمقرشين و ...

_ خلاص أقفلوا الموضوع ،أنا عاجبني وخلاص ... مش قلتي عايزة تنظمي الشيلة يلا أبدي

_ تقول شيلة عديلة أصلا ، ما كلها كم قطع ، والله إنتِ عويرة

إتجاهلتها ، ما أول واحدة تقول لي كدا حتي أمي في البداية رفضت بشكل قاطع بس أبوي وقف معاي وساندني لمن شاف طيب أصلو .

للان متذكرة أول مرة أشوفو  ، كنت وقتها في السوق بقضي مراسيل أمي

، شفت من بعيد عربية نظام طبلية كدا ما فيها غير ملح بس معبى في أكياس وفي مظلة وكرسي قاعد فيه شاب تحت ضل شجرة .

مشيت عليه لقيتو قفلها وباين عليه مستعجل

_ معليش بس قبل ما تقفل عايزة ملح .

ما عاين لي أصلا وواصل قفلو بس كلامو هو الشفع ليه

_ معليش والله يا أختي ، لازم هسي أقفل لنص ساعة كدا

_ خمسة دقايق ما تأثر لو أديتني ، ما بقدر آخد مشوار للدكاكين القدام هناك في الشمس دي

_ طيب اتفضلي في الكرسي دا وانتظريني

_ بس انا مستعجلة و....

ما أداني فرصة أتم كلامي ومشى شبه جاري ، وقتها عرفت انو ماشي على المسجد لمن خلاص بدوا يصلوا .

قعدت سرحانة في موقفو لحدي ما جا
_اعفي لي عطلتك

_ أنا العطلتك عن الصلاة ، آسفة

ابتسم وفتح الطبلية وباع لي وأداني كيس زيادة عشان إنتظروتو رغم رفضي

_ الكيس دا بخمسين جنيه ؟!! كتير عديل بتكسب طيب كيف

_ أكسب جنيه بالحلال ولا مليون أحاسب عليها بالحرام .

للحق سرحت في أخلاقو وتعاملو  ،والناس من وين جوا بالسرعة دي ما عارفة بس لفت إنتباهي حوار بين رجل وواحد تاني كأنو معتاد يجيه

_ والله يا ولدي جيتك امس والليلة برضو بس بشوف طبليتك وما بشوفك

رد ليه الراجل تاني المتعود يجيه

_ بعد الصلاة يستحيل يكون قاعد الا في الجامع اضبط مواعيدك بعد الصلاة بس

انتبهت لنفسي اني لسا واقفة لمن عاين لي باستغراب لوقفتي فحمحمت باحراج ومشيت ، بس لمحتوا ابتسم .

من وقتها يستحيل ما امشي السوق الا وأمشي عليه حتى لو ما محتاجين للملح بشتري  ، وفي يوم

_ لو سمحتي عايز رقم والدك

للحظة رمشت مية مرة في الدقيقة واديتو الرقم وبالمسى جا اتقدم لي بعد موافقة ابوي .

تم العرس وأنا مبسوطة لابعد حد ، كل يوم بيثبت لي إني إخترت صح

يوم كان  عندي ضيوف والمواعين كترت ، جا ضحك فيني وعلى كرهي للمواعين

_ طيب رأيك شنو نلعب لعبة

قّسم المواعين نص بالنص والينتهي منها اول هو البفوز  ويطلب من التاني شيء يتنفذ

هدفو  بس إستمتع بالشغل وهو يساعدني من غير ما إتحسس ، وفعلا بقيت بعشق غسيل العدة عشان هو معاي .

بعد يوم شغلو وبعد يرتاح ويستحمي يجيبي يرقد في حجري ويحسب القروش ويقول لي نخطط سوى حنعمل شنو بيها

_ عمر ،  ليه كل يوم بتخت مية جنيه طرف ، بتعمل بيها شنو

_ ممكن ما أجاوب ؟!

بعد تحانيس وتمثيل الزعل حتي جاوب

_ طيب خلاص ما تزعلي ، دي يا ستي بلمها  وكل شهر بشوف أكتر زول محتاج بديها ليه .

_ أنا حصل اتغزلت فيك ؟!

_ هههه والاكتر الفي العلامة الفي جبهتي دي ، بقيت اغير منها

_ اي والله بعشق علامة الصلاة الفي جبهتك ، زي ما بعشق سيدها

_ وانا بكون كذاب لو عبرت لانو لسا ما إخترعو كلمة علي الحاسي بيه .

حياتنا في منتهي السعادة ، عمرو المال ما كان مقياس ، والحمد لله عشان صدقاتو الكتيرة ربنا فتحا ليه من وسع
علي قطعة الارض من ورث أبوه بمشي بالليل يبنيها ولمن عرفوه أصحابو كلهم انكبوا وساعدوه بني الحمام وغرفة ورحلنا فيها والباقي وانحنا قاعدين نعمر بيتنا .

بتكون قروشو محدودة بس أبدا ما يبخل علي ضيف ولو ما فضل لينا قروش وقتها بقلب الوضع لذكري سمحة

_ عايني راجلك الشيف الخسارة فيه السودان ، اتفضلي

_ وريني  ، دا شنو ...

_انا زاتي ما عارف والله  نتوكل ناكل ، ولو متنا نكون استشهدنا سوى

ما بفكر في نفسو   ، فاضطريت أنا إهتم بيه

_ ها جبتي الشبشب

_ أيوا ، والله رهيب ، تحب تشوفو

طلعت شبط رجالي ، عاين لي وضحك

_ يعنى ليك يومين عايزة تموتي عشان شبطت عجبك عايزة تشتريه ويطلع رجالي

- عشان ليك كان ما عشاني  ، شكرا ليك على السعادة البتديني ليها

مسك وشي وباس جبهتي وحسيت بيه عاجز عن الكلام اصلا

وزي ما قال ربنا في معنى الاية نتزوج الفقراء عشان يغنينا هو من فضلوا وقد كان

بأعمال الخير الدايما بسارع ليها حتى لو بالقليل ربنا فتح ليه أبواب الرزق وفي سنة واحدة اتطورت تجارتو ومن كان ببيع في اكياس الملح بقي يوزع لمصانع ودكاكين كبار ، وسمعتو السمحة سابقاه

_ الكانو زمان بيعاتبوني عشان إخترتك هم زاتهم هسي بقولوا لي انت اخترتي الصح

_ تعرفي كل الفضل والرزق الانا فيه بفضلك بعد ربنا ، انتِ البتنظمي لي وين مفروض اخت قروشي المرة الجاية ، وبفضل صبرك وتحملك للجوع والتعب ، ربنا أكرمني بيك هدية من عندو

_ عارف مفكرة اسمي بتنا الجاية منو ؟! ....  بلسم

_اشمعني !!

_ لان أبوها بلسم أمها ، ربنا يديمك نعمة في حياتي .

_ كل حاجة في الدنيا مستعد أفرط فيها إلا سعادتي المتمثلة فيكِ.