خربشة قصة

القصة 67

#مناديلكم جهزوها قبل تقروا

#خربشة_قصة

_ مالك يا هناء بسم الله

جرت أمي علي مخلوعة لمن شافتني ببكي بأعلى حس عندي  ، ما قادرة أوقف الشهقات ولا قادرة أخلي جسمي يقيف من الرجفان .

أمي غلبتا الحيلة وأنا بس ببكي ، قعدت على  الأرض وضميت رجلي مواصلة .

حسيت بقلبها بدق شديد لمن حضنتني  ، ما وقفت من سؤالي وصوتها اتحشرج من غصة بكاها  .

ما كنت منتبهه وقتها بس سمعتها تنادي اخوي الكبير شكله  جا داخل

بعد نص ساعة بقيت ما شايفة من عيوني المّورمة وصداعي الشديد .

_ يا هناء مالك ؟ في شنو قلبي حيقيف من الخوف .

سألتني أمي وأخوي برضو منتظر إجابتي ، وقتها تاني اتفقعت بكى وقلت بصوت متقطع وشهقات كل مرة تزيد

_  عا ..عا..عامر ...

_ مالو خطيبك عمل ليك شنو ؟

صرخ أخوي بإنفعال ، حالتي بتقول في مصيبة فطوالي فكر بسوء ، هدتو امي وخلتو يقعد

_ أقعد بس خليها تهدى ما شايف حالتا دي ...

_ عامر طلع عندو سرطان وفي مراحلو المتأخرة ...

بعد جملتي دي إنهرت أكتر حتي ما عرفت ردة فعلهم واغمى علي .

بعد مدة صحيت ولمن اتذكرت ما قدرت أبكي من ألم راسي الشديد .

شفت امي بتبكي ، فسألني اخوي بتأثر

_ هو قال ليك ؟!

هزيت راسي ودموعي نزلت

_ ما في زول عارف غيري ، حتى هو .

.....

ولد خالتي عامر وخطيبي ، عايش معانا في نفس البيت ، نص حق خالتي والنص التاني حقنا .
حابين بعض من الصغر ، في الاول قالوا حب مراهقة بس الموضوع إتطور فطلب يدي من والدي .

ستة مرة أبوي يرفضو وكل مرة بحجة جديدة بس في الحقيقة عشان عايزني لود أختو ، بس لمن إتزوج ولد عمتي رضى بخطوبتي منو .
.....

_ يا عامر مالك ما بترد لي من قبيل بتصل عليك

_ كنت بفحص يا هناء ، خلصتي شغلك؟!

_ خلصت شغلي ولا خليت بت تفحص ليك ؟ ها ..! خطيبتك ممرضة ماشي لواحدة ت...

قاطع كلامي بضحكة

_ الغيرة مولعة  غيرانا صاحبة عيوان الغزال  ...هه ... يا ستي  الفحص لي ولد ، وبعدين فحوصات كتيرة عملوها لي ياخ اكتر من عشرين فحص أصلو شنو ؟

ضحكت علي تزمرو وواسيتو

_ أنا بعرف إتعامل وبجيب ليك نتايج الفحص كلها قبل الوقت ، شفت الواسطات تع....