خربشة قصة

القصة 88

#وكرفسة جديدة عشان خاطر كلامكم السمح زيكم دا 🥰🥰🥰
والله تسلموا كتيييير كتير كميات ياخ ، عن كمية الدعوات والكلمات السمحة البتصلني 😍😍😍😍

#خربشة_قصة

_ بتعمل شنو يا أحمد ؟

_ يكون بعمل شنو يا زينب ، بالله أمشي كبي لي الغدا سرعة .

استغربت من لهجتو  الحادة ، ما من عوايدو نهائي يتعصب فيني بالشكل دا .

عاينت لتلفونو المشغول فيه ، دخل قلبي الشك ، قلت معقول بكون شاف غيري ولا متواصل مع واحدة قلب مني كدا .

زفرت واستغفرت الله ، مشيت حضرت الاكل بذهن شارد  .

اكل وبرضو مشغول بالتلفون لحدي ما قال لي فجأة بعد مكالمة جاتو

_ عندي مشوار مهم

وطلع مستعجل ، وقتها بكيت شديد وبقوة ، خلاص شاف غيري ، وقتها امي اتصلت علي ، حاولت ما أبين شيء وأنكرت اني عندي شيء ، خصوصيات بيتي ما لازم تتعرف .

انتظرتو لوقت متأخر ما جا  ، فشالتني نومة ، ما صحيت الا بحركة كدا غريبة  ، فتحت عيني وعاينت لساعة تلفوني لقيتها قريب الفجر  ، وأحمد ما جنبي ، معقول لسا ما جا؟ بس حركة الغريبة شكلها هو .

قمت من سريري ومشيت براحة اشوف  المطبخ ، وقبل ما أدخل انتفضت لمن جا ماشي واتقابلنا مع الباب .

لاحظت لعيونو كانت محمرة شديد لدرجة تخوف ، نسيت اي شيء وركزت علي قلقلي عليه .

مسكت يدو وانا بعاين ليه وبسأل

_ مالك يا أحمد في شنو ؟

ما رد لي بس تعابير وشو ما تتقابل ، حاول يبعد مني بس أصريت وقعدت جنبو ، اخد نفس كبير وقال

_ زينب انا ع ع عايز اطلقك

نطيت زي الضربتني كهربة ، جسمي رجف وانا بعاين لقعدتو المكسورة وخاتي يدينو الاتنين علي جبهتو .

_ انت بتقول شنو ؟ دا ما وقت هظار نهائي علي فكرة و و و ... عاين لي يا أحمد

اخر جملة انفعلت وهزيتو عشان يعاين لي ، اتفقعت بكى وهو ما اتحرك بنفس وضعو .

_ طيب انا عملت شنو ؟ والله العظيم انا انا .... حرام عليك

رفع وشو وعيونو مدمعة ، مسكني حضني واتنهد

_ انا خايف ما تستحملي الجاي يا زينب انتِ طول عمرك عايشة مرفهة ولمن جيتي بيتي برضو كدا ، ما حتستحملي الوضع الجديد ، انا افلست وما فضل لي شيء و....

طلعت من حضنو ووقفت علي حيلي ، تاني قعدت وبديت اضرب فيه علي كتفو  وانا ببكي

_ ما جادي ما جااادي ، عايز تخليني عشان بقى ما عندك قروش

_ والله ما عايز بس

_ ياااخ تغور القروش ، تتحرق بجاز كلها ، انا عايشة معاك ولا معاها ، كيف سمح ليك قلبك تفكر تتنازل عني

مسك لي يدي المواصلة تضرب فيه وباسها لي

_ قصب عني عشان ما تتهاني باقي عمرك وانتِ لسا شباب و...

_ اسكت بلاش غباء عليك الله

حضنتو وانا ببكي وقلت

_ الحمد لله وقت طلع فلس ، كنت قايلة شفت غيري ، كنت عايزة اموت من قهري .

ضحك حبة  وقال

_ تقدري تستحملي الحياة الجاية

_ بستحمل اي شيء وانا معاك ، القروش تمشي وتجي بس انت لا ، عندي دهبي ما عايزاه

_ زينب ما تحاولي ما بشي...

قمت علي حيلي مشيت جبتو وجيت وانا بمسح دموعي

_ كدي اسكت ما تتكلم كتير ، قول بس ما عايز تغير لي دهبي البقي قديم دا ، ما قايلاك راجل طماع كدا  ، ما يخصني انا عايزة جديد بعد تلقي قروشك رجعت واحسن كمان .

عاين لي بنظرة عايز يعترض بس فضلت اتحايل عليه وفي الاخير وافق بعد معاناة وتعب .

مسك يدي وباسها

_ ربنا يقدرني اعوضك واعيشك ملكة

_ ومنو القال انا هسي ما ملكة ، انت ملكي ومملكتي بيتي ما دايرة اكتر من كدا .