خربشة قصة

القصة 63

#خربشة_قصة

"مرة المدمن "

" أهلها كيف وافقوا بيه ... بس عشان القروش "

أقوال الناس كترت بمجرد ما عرست علي ، ولاسف كنت زيهم

_ يا أمي ما دايرهُ ، ما دايرهُ ، دا واحد مدمن وكعب أعرسو كيف ، كيف ترضو لي زاتو

_ أبوك لو ما عارف أخلاقو ما كان وافق ، هو تاب

ما مصدقة حكاية تاب دي أبدا ، والعجب صحباتي البنفخوا فيني أكتر والناس الزي ديل ما بتوبوا وإنتِ ...وانتِ...

بس تم العرس بعد دا كلو ، خلال الفترة الإتقدم لي فيها ولحدي العرس ما إتكلمت معاه
كنت خاتة في راسي الموضوع ما يتم  بس عكس توقعي تم بتيسير عجيب ، والاعجب أهلي الصعبين الم برضو بعرس برة منهم رضوا بيه ومتحمسين ، لدرجة قلت بس عشان القروش رموني ليه .

جا شالني وأنا دموعي أبت تقيف ولا حتي سامعة كلامو البقولو لي  يمسك يدي وأنا بحاول أبعدها منو بنفور   ، كل ما أبكي اكتر يقولوا عشان مفارقة اهلها .
......

_ برضو ما عايزة تعايني لي ؟

سألني بهدوء ، برك جنب رجلي على الارض لمن دخلنا الشقة ، رفضت أعاين ليه فلمس ذقني عشان يجبرني اعاين ليه

_ زح يدك مني

إنفعلت وقمت علي حيلي ، وقتها عاينت ليه سمح مع الاضاءة ، وشوا منور حرفيا ، حاجة كدا ما تقدر توفع عينك منها ، ابتسم وهدءني

_ خلاص ..خلاص .. آسف

خجلت من الهدوء الكان فيه مقابل إنفعالي ، فخلاني علي راحتي ومشي غرفة تانية

من تعبي نمت أول من ختيت راسي  لكن فجأة صحيت بصوت خفيف ، لمن فتشت لقيتو في غرفة تانية منورة الكان فيها علي ....

شفتو ساجد وكتفو بتحرك من بكاه ،أول مرة في حياتي أشرف راجل ببكي قدر دا  ، سمعتو  بقول بصوت متقطع

" يا رب عفوك ، الحمد لله علي نعمتك وأنها معاي  ، الحمد لله ..."

لمن قام من سجدتو أنا زحيت من الباب بسرعة عشان ما يحس بي ، وأنا طول الليل بفكر في دعوتو دي .

يوم تاني مر كدا ، هو بحاول يتكلم معاي وأنا برد مرات وعشرات لا .

بس لمن يجي بالليل لا إراديا بصحى وبمشي أشوفو هناك ساجد ، بس ما كان ببكي زي أول مرة شفتو فيها ديك .

_ رنا تعالي ...

ناداني ، إتخلعت لانو كشفني ، ضحك وقال

_ علي فكرة من أمس حاسي بيك بتجي وتمشي .

أخدت نفس ومشيت قعدت علي السرير الجنب سجادتو ، هو قام قعد جنبي

_ أسألي ..

قال لي كدا  كأنو عارف في راسي مليون سؤال ، يعني هو مدمن وبشرب خمر وبتاع نسوان ووو الكتير الجاني كيف بقيم الليل ويبكي وهو ساجد  وغيرها من الامور الكل مرة بشوفها بتخليني إتعجب ، لمن شافني ما قلت شيء مسك يدي وقال

_ رفضتي تتكلمي معاي قبل العرس عشان كدا ما وضحت ليك شيء ، وما بلومك على كلام الناس السمعتيه لانو حقيقية زمان

_ الناس كلها عارفين كدا

_ شوفي يا رنا ، قبل سنة إختلطت مع أصحاب سوء  والانسان بيغلط بس كيف يرجع للطريق الصح وأنا الحمد لله عرفت دربي وين الازم امشيه

ما بقول ليك شربت منهم كم  وإتلهيت لمدة شهر   إتنشر الخبر دا بسرعة ما ممكن تتخيليها ، والموضوع من هظار بقى جد

عارفة الرجعني لوعي شنو ...  واحد عجوز

_ كيف ؟!

_ أنا ومعاي إتنين كدا راجعين مع آذاذين الصبح ،  الراجل العجوز إتعتر ، الاتنين المعاي سكرانين ضحكو فيه ومشو  وأنا أصلا بشرب من مرة لمرة فما شربت يومها وجريت عليه  قال لي

" الحمد لله رجلي ما إتكسرت خايف ماأمشي الصلاة بسبب الرجل ، ربنا يحميك يا رب ويهدي طريقك ويوفقك "

وصلتو الجامع  إترددت أدخل ، لي شهر بعيد وملقلق في صلاتي ،  دخلت واول من سجدت بكيت وحسيت اني مقصر ومن وقتها خليت الشلة ورجعت رب ربي  "

ما عرفت أقول شنو فمال علي وباس لي جبهتي وقال

_ الحمد لله علي نعمتك ، ما مهم كلام الناس وشايفني كيف المهم إنتِ تشوفيني كيف عشان كدا وضحت ليك .

.......

عدت الايام وفي كل ثانية يثبت لي فيها إني ملكة و أميرة متوجة

_يا رب أحميها وأغفر ليها وحقق كل ما تتمناه في الدنيا والاخرة ، يا رب زي ما هي زوجتي في الدنيا أدعوك تكون لي زوجة في جنتك يا رب

قعدت جنبو براحة جنب سجادة صلاتو ، اتفاجئ ، نزل كف يدو

_  يعني الا تتسحبي كل يوم

_ علي ... ربنا يخليك لي .

إتفاجئ أول وحضني ليه

_ يا رب ... علي قول امي عشان رجعت لربك كافئك برنا ، وكلامها صح والله .

عيوني دمعت وقلت

_ آسفة علي الحصل كلو وسوء ظني

_ أنا ما عايز الماضي ، أي حاجة مؤذية نقفلها في صندوق ونرميه البحر   ... العايزو هسي انت بس بعيوبك وحلاوتك ومحاسنك

ملت براسي لكتفو وزفرت

_ كان ممكن أندم لو ما عرستك ، الحمد لله .

_ في مشكلة ...لازم تعرفيها عشان نلقي حل

رفعت راسي وقلت

_ شنو ؟!

_ أنا أدمنت حاجة

_ علي انت جادي ولا بتهظر

_ والله العظيم ما طولت  وبسرعة أدمنتها  من يوم عرستك بس ،  أعمل شنو عشان إتعالج من إدمانك .