خربشة قصة

القصة 58

قبل الخربشة ، يا جماعة إنتوا ليه ما بتقروا روايتي #إدماني البنشرا بعد  الخربشة 😭😭😭  أنا زعلانة بس🥺🥺
راضوني 🐸🐸

وعشان قلبي طيب ✋😌 نزلت ليكم خربشة الليلة أخف يمكن من الفاتوا ما تحتاجوا تدردقوا كتير 😂😂

#خربشة_قصة

_ غير النوم ما عندك شيء

كنت مفتكرة الجملة دي  ح تختفي لمن أبقى مرة راجل وأمي توقف وما تقولا لي بس وين ياخ ، دي تقريبا زادت المعيار لمن عرست .

قفلت منها المكالمة والنعس أصلا ما طار ، فغمضت عيني أواصل شوية كدا حسيت بحاجة باردة في وشي ، وصوت همس حنين شديد بنادي إسمي ، للصراحة  إنتفضت لمن سمعتو دا صوت أحمد

_ يلا يا نوامة فتحي عينك السمحات ديل إشتقت ليهم .

إرتبعت في نص السرير من كلامو ، بسم الله إتلبس الراجل بجن ولا شنو ؟

وسعت عيني زي غطاية الببسي بعاين في وشو المبتسم ، بلعت ريقي كم مرة خايفة منو الصراحة

_ أعوذ بالله من ...الشيطان الرجيم

_ مالك يا قلبي

لا كدا كتير ! أنط من وين أنا هسي !

مد لي يدو بقلق وأنا إترعبت أكتر   قمت علي حيلي بسرعة ماسكة الشباك الوراي ورجلي الواحدة فوق مستعدة تطير لو أمكن ، تمتمت ليه

_ إنت منو ؟ ...اا قصدي عملت شنو في راجلي 

ضحك وقام علي حليو  واقف قصادي ، مسك لي يدي وباسها وانا بجاي إتشهدت وعاينت حوليني يمكن دا نسخة تانية  

_ يا تقى استهدي بالله مالك بس ، كيف عملت شنو في راجلك يعنى ما ياهو انا بشحمي ولحمي

_  طيب معناها هو ...  قالوا إنو ح أموت  ب....

_ما تجيبي سيرة الموت

إنفعل بجملتي ديك وتاني زفر وهدا نبرة صوتو

_ يا تقاي مالك بس متفاجئة كدا ، ولو عشان كلمة تقاي ، إتعودي عليها لاني ح أناديك تاني كدا

لسا متوجسة فضحك وجذبني ليه شديد من وقفتي فوق السرير وقال

_  طيب تعالي في حضني إشتقت ليك والله

_ احيييي ، أنا بحلم صح ؟ مستحيل ما بحلم

_ أنا الكنت شايفك حلم والحمد لله إتحقق وبقيتي مرتي

إتحسست وشو عشان إتأكد

_ ما فيك حمى  ...

قّلبت الكلام في راسي وفجأة كدا إنتفضت واقفة علي السرير ، ختيت يديني الاتنين في خصري وانفعلت مطلعة  جزء من روح الرداحة الجواي

_ لااا أسمع هنا ، لو عايز تعرس فيني قول لي عشان أضبحك واصفي دمك وأجيب ناس تشرب معاي كمان ، ولو عرست هسي تطلقها ، أسلوب اتمسكن وإتمكن دا ما بجي معاي ، وأمور روميو الجات فجأة دي ما ت...