#خربشة_قصة
#عظمة_الصحة
قمت بصعوبه ، حاولت أسند نفسي باي طريقه بس تطاش قدامي وحوليني بيدوور ويدوور
قعدت من تاني وختيت يدي في عيني بحاول اتماسك
تاني ما حسيت بحاجه الا وانا ممده في غرفه مركبه درب ، وقتها استوعبت اني ما في بيتنا .
كنت في المستشفى ، الريحة والمكان يؤكد دا ....
أمي لمحتني جات علي، وعلي وشها مليون ألم إطبع فيه
كانت بتعاين لي ودموعها بس هي البتتكلم ....
كان المفروض إستغرب او اتحير من نظراتا لي ودموعها بس لا !!
عارفه في حاجه كبيره بتحصل لي اصلا مستحيل ما يكون عندي حاجه وانا بتعب كل يوم في اقل من الثانيه .
( امي عندي شنو ؟؟ انا ما قلت ليكم مرضي كعب عشان كدا ما عايزه افحص واعرف )
مشت مني وابت تقول لي ، مسكت جنبتي للمره الم بعرفا كم ، بتألم ...
بعد حنسه وتعب عرفوني
كلاي الاتنين ما نافعين نهائي !!
محتاجه غسيل كلى بس برضو يا ريتو بنتيجه ...
مع دموعي كانت بسمتي ، ايوا بسمه طيب اعمل شنو قضائي وقدري
كنت مواظبه علي الغسيل الدوري
احساس التعب البحسو زي الموت لمن يجي يسلم عليك ويمشي
اسبوعين من بديت الغسيل إكتشفت وقتها معادن الناس ...
شلت تلفوني واتصلت عليهم كلهم ، كل معارفي الجافوني والنسوني في مرضي
شهقو وقت شافوني ، اكيد بحصل كدا عباره عن هيكل منبطح في السرير اسود بطريقه مبالغه فيها من الغسيل .
( انتو عارفين دا ما وقت كرامه وعزه نفس ، دا وقت تزول الغشاره من عيونكم وتفتحو وتشوفو قدامكم
، كل واحد شايف نفسو احسن من التاني
كل واحد هو رقم واحد والبقيه ارقام ساي
بتهتمو بالمظاهر واللبس والجيها وشي فلان عمل وبنا وعرس وعرببتو ووجاهتو
وديك جابت كم جنا وربت كيف ، لبسا وبيتها وشكلا ولونا وووو
ما بتخلو حتى الميت الاتدفن وتقولو ما خلى لعيالو وما قسم وووو كتيير .
عارفين تنكشف الغشاوه متين لمن تبقو في حالتي دي لا سمح الله
لمن تفقدو اهم حاجه في الدنيا صحتك .
لان دي الوحيده الم حتشتريها لا بقروش ولا عربيتك تنفع ولا جيهتك ، دا حتى الجمال الساعين ليه في غمضه عين يمشي .
جبتكم هنا عشان اقول ليكم خلو الحساده والحقد
خلو الدنيا بيسطه مبسطه وعيشو بسعاده وتحمدو الله كتير لانو اداكم الصحه )
مشو مني وسرحت انا في حياتي وشريط امنياتي الزال مع مرضي ، بس راضيه بقدري لانو فهمت غيري اهم شي في الدنيا دي الصحه .
.........
قد تكون امنياتها بعدها اتكفنت بالبياض كنقاء قلبها وإدفنت في التراب معاها
بس صدى كلماتها محفور في قلوب وعقول من سمعها عشان تكون عظة وعبرة تحت عنوان
#عظمة_الصحة
أنت تقرأ
خربشة قصة
Short Storyكل جزء قصة مختلفة ، قصيرة ودسمة ، لو بتحب الرومنسية أو بعد مرات الحزن والضحك والدراما ، حّضر مناديلك وتساليك وإتفضل إستمتع بكل قصة . مع تحياتي هبه الله حسن ،،،،، ويمكنك زياره صفحتي للروايات في الفيس بوك #روايات_هبه_الله_حسن لكل جديد وحصري
