#الجنون فنون 🤣🤣😂😂😂
#خربشة_قصة
_ بتعملي شنو ؟!
_ انت شايف شنو ؟!
عاينت ليه بطرف عيني وواصلت مسح وشي بدِقة وانا بعاين في المراية
_ دا شنو دا ؟!! باقية زي الشبح ، دا زبادي ولا شنو البتمسحيه دا ؟
_ ايوا عندك مانع ؟!
رديت ليه ببرود ولسا بشوف في وشي ، لمحتو بحرك راسو يمين وشمال ، عيني وقعت على ليدو ، ففجأة نطيت وصرخت
_ رمّاح ...
اتخلع من صوتي الجاه فجأة من واره
عاين لي ونهرني
_ يا بت لا اله الا الله مالك يا أفنان
ختيت يدي علي وسطي ومشيت ليه بكشرة
_ انا المالي يا ولد عمتي ، شوف شايل شنو في يدك
عاين ليدو
_ مالك ومال الفي يدي ، عايز اكل الا بإذن البرنسيسة ولا شنو ؟
_ ايوا ، وجيبا دي حقتي علي فكرة .
وكالعادة يحب يستفزني
_ في بيتكم حقك بس دا في تلاجتنا علي ما اعتقد
ابتسم لي من طرف خشمو وقعد ، خلف رجل علي التانية في يدو علبة زبادي كابو مفتوحة ، خت المعلقة جواها وبعاين لي باستفزاز
_ احسن ليك ما تاكلا يا " رمّاح "
نصحتو بس ضحك ضحكة صغيرة واتعدل وبراحة شال بالمعلقة من الزبادي
حاولت اتكلم بس قال
_ هوي ، دا حقي جايبو بقروشي وباكلو
خت المعلقة في خشمو وشوية كشر وبصق الفي خشمو ، حّمر لي
_ دا شنو دا ؟
ضحكت لمن وقعت علي الارض ماسكة بطني ، وهو فضل يعاين لي ويشم العلبة
_ دا الماسك الهسي كنت بعملو في وشي ... واااا هااااا
قلت جملتي لمن وقفت واستعديت للجرية ، وبالفعل جري وراي عايز يقبضني ، عمتي شايفانا ولا كأننا موجودين او مختفيين مثلا ، وزوجها برضو مندمج مع الجريدة المعاه ولا كأني بصرخ من الجري بسبب ولدهم ، متعودين واكتر يعني نقول شنو بس .
المهم إدسيت ورى عمتي و" رمّاح " شال الشبط عايز يضربني بيه وانا بضحك .
طلعت ليه لساني لمن ما قدر يصلني ، جاه تلفون فعمل لي حركة كانو عايز يضبحني وانا بطلع ليه لساني لسا عشان استفزو .
لمن مشي اتنهدت وقعت اعاين لوشي العملتو وغسلتو بعد مدة وقلت
_ ياهو بقيت مزة ، ألف عريس يتمناني بس انا ح ارفض واقول اقيفوا الصف .
أنت تقرأ
خربشة قصة
Short Storyكل جزء قصة مختلفة ، قصيرة ودسمة ، لو بتحب الرومنسية أو بعد مرات الحزن والضحك والدراما ، حّضر مناديلك وتساليك وإتفضل إستمتع بكل قصة . مع تحياتي هبه الله حسن ،،،،، ويمكنك زياره صفحتي للروايات في الفيس بوك #روايات_هبه_الله_حسن لكل جديد وحصري
