خربشة قصة

القصه 35

#خربشة_قصة

بالكتب المردمه فوق بعض ، كراس بجاي وقلم بهناك

كنت ببحلق في الدفاتر دي ، وبفكر
هسي دي لو مجلات او كتب تسليه وترفيه كنت أكلتهم اكل وما بعدت عنهم

بس القرااايه وما ادراك ما هي

كابوووس اي طالب ، وحرقه دم بالبطيئ .

دا كان تفكيري

لسا مبحلقه فيهم

[ ما عارفه اتعوذ واشيل اقرا  !؟؟

ولا اخليهم بكره!!؟

  ايوا صح احسن بكره !!

اممم او بعدين لمن احسن نفسي عايزه اقرا !!

اااه المهم لمن اقرر بس ما هسي
لكن
هسي امشي اتابع لي المسلسل وادخل الفيس مع الواتس اشوف الشمارات]

بكدا اتراجعت عن اني اقرا وافتح اشوف فيها شنو مقرراتي 

طولت من اكون جاده في القرايه ، ولو قريت صفحه صفحتين باستعجال اكون نهيتها .

طلعت بره الغرفه واول من اتكلمت معاي امي لمن شفتها مستغربه

[ شنو يا عبير !! ما قلتي عايزه تقري ]

[ يااخ بعدين ولا اي وقت ، هسي ما لي مزاج اقرا ]

[ وكمان القرايه بقت بمزاج !! ولمتين حتقعدي كدا !؟؟

لمن الامتحانات تجي عليك وتقعدي تندمي ، ويا ريت يفيد وقتها !]

[ يا امي خلاص ،  بس اتفرج حبه وامشي اقرا ]

وبكدا انسحبت

وانا  بتفرج تلفزيون ،فجأة امي قالت:

[ يلا خلي التلفزيون دا خلاص الامتحانات قربت ]

كنت كلامها بدخل بجاي وبمرقو فورا من اضاني التانيه

كان معاها جمله " بقرا لمن الامتحانات تقرب  "

ويا ريت ما قلت كدا او عملت بيه ،الامتحانات قربت والقرايا اتردمت

ما عرفت ابدا بالحفظ ولا اشوف زول يشرح لي للفهم

ولا افتش الناقصني وما معاي وداخل في الامتحان
اموري جااطت وتركيزي زاتو بقى ما معاي

يعني نصو مع القرايه والنص التانيه بفكر حاتخارج من جبل المذاكره الباقي كيف !؟؟

"يوم لا ينفع ندم  الطالب الذي لم يهتم "

دا كان يوم الامتحان وتحديدا داخل غرفه الامتحان وبيدي ورقه الامتحان
والاصعب  ما قادره احل 

بكييييت بشده وزاد اكتر  بالنتيجه الم مرضيه

، وما حسيت الا بيد في كتفي تهزني

[  بسم الله ، مالك يا بت ، اصحي !"]
كان صوت امي بيصحيني من الكابوس الشفتو

اتلفت حوليني لقيت نفسي في سريري وقدامي المسلسل السنه بتفرج فيه من غير فايده

فرحت جدا ،
يعني لسا قدامي فرصه !!

جريت بسرعه لكتبي ، تحت استغراب امي وعقدها لحواجبينا

( بسم الله البت دي مالا )

قالت كدا ومشت لشغلتا ، وانا كنت مع شغلتي الكانت طبعا قرايتي 

اول شي عملتو جبت ورقه وسطرت فيها جدول لمذاكرتي

وفعلا بقيت اقرا بهمه ، اليوم البكون كسلانه فيه بضغط نفسي بقوه افتح الكتاب وابدا اول سطر ، بعدو خلاص براها القرايه تحلى لي

لازم كل يوم اقرا ان شاء الله لو نص صفحه بتركيز المهم

ختيت قدامي هدف اني لازم ارفع راسي فوق بتفوقي ، اكون مثال حسن لغيري

وطبعا لكل مجتهد نصيب  ، وثمار قرايتي ظهر يوم نتيجتي

ما بتشوف قيمه قرايتك الا لمن تشوف نتيجتك، وقتها التعب دا  يبقى ليك مجرد ذكرى مرت

اما نجاحك ما بيكون مجرد ذكرى ، نجاحك حيطاردك ويكون ملازم ليك زي اسمك

عرفت انو كل شي سهل ، ما في صعب في القرايه ، فهم عقلك كدا

هو طوالي حيخنع ليك ويوافقك الرأي وبالتالي تلقى حل للكان صعب

ما في شي صعب ، الصعب بيدك انت تسهلو

[ واخيييرا خلصت إمتحانات !، بس ليه باقي  لي ملل الكنت زمان شيفاه سمح وقت القرايه ]

ضحكت امي وقالت بهظار

[ انتي ما عارفه في شيطان بيحبب ليك اي شي وقت القرايه ، ولمن تنتهي من القرايه وتمتحني بيمشي!! ]

قلعت عيني وشبه صدقتها 

[ بجد !"]

ضحكت بقوه وقالت

[ انتي اي شي تصدقيه ، الله يهديك !]

ضحكت لكلامها بس برضو متأكده انو فينا شياطين بتجذبنا لاتفه شي وقت القرايه ، ولمن نمتحن بتمشي الشياطين دي

مش كدا !!!؟؟ ولا كلامي غلط !!؟