خربشة قصة

القصة 78

#خربشة الليلة وصلت😁😁

#خربشة_قصة

_ أنا زهجت من نقتك ، دايرة وما دايرة ، دا شنو ياخ

_ زهجت من نقتي ؟!  هو أنا بطلب حاجة غير للبيت وليك 

عاينت ليه زهجان وكأنو ما طايقني ، قام خلى الاكل ودفروا لمن وقع الصحن واتكسر .

عاينت للصحن شوية وانتفضت لحقتو ، انفعلت فيه

_ إنت مالك بقيت عصبي كدا ؟ في شنو لكل دا  فهمني

عاين لي وانفعل بيديو وخشمو

_ شوفي نفسك بتعملي شنو ، دا حتى نفسك ما مدياها حقها بس فالحة تمعطيني انا

_ أنا يا  رؤوف؟!

_ ياخ ما فاضي للنكد والجو الكئيب دا أخير أطلع ، حاجة تقرف .

طلع من البيت وقفل الباب شديد وانا لسا بعاين أثرو ، قعدت براحة بحاول أعصر ذاكرتي واتذكر أنا غلطت في شنو ولا عملت شنو عشان ينفعل كدا .

راجعت نفسي واتنفست بعمق ، لازم اهدأ وأكرز استحمل شوية في النهاية  رؤوف دا حب عمري .

لميت الصحن المكسر ونضفت البيت ، قررت أعمل ليه حاجة سمحه ياكلها بدل الرماه دا يمكن يتحسن مزاجو ، يمكن مضغوط في الشغل وتعبان وانا زوتها لمن قلت ليه ناقص شنو في البيت .

.....

لبست واتعطرت وانتظرو لحدي قريب نص الليل ما جا ، لمن شالتني نومة وانا منتظراه .

سمعت فتح الباب انتفضت ونفضت النوم من عيني وانتظروتو

_ رؤوف انت ...

_ أنا فتران وزهجان ما فاضي لنقة يا سعاد .

أخدت نفس طويل شديد وعديت لعشرة حتي فتحت عيني ، ما اتكلمت  بس مشيت المطبخ سخنت ليه العملتو ليه .

_ هاك اكل

عاين للاكل وعاين لي

_ عشان بعدين تقولي لي الاكل نقص وما في وانا عشان النفيدي بشتري ما مشكلة

لهنا وما قدرت اتحمل

_ انت مالك عايز تتشاكل لاي سبب ، حاولت ارضيك وقلت مضغوط بس ما شكل زول مضايق كان رقت لمن كملت وقتك مع اصحابك وخليت مرتك .

_ اهاا وكمان جابت ليها اصحابي... سعاد بالله نومي خليني بكرة  عندي شغل

_ اول كلمني بعدين نوم نومك ، الحاصل عليك شنو ؟

انفعل زي

_ انتِ الحاصل عليك شنو

_ انا لو مقصرة يا رؤوف وريني  مش تنتقد وتهيج 

_  سعاد النقاش منتهي

خليت اي شيء وطبعت من الغرفة الهو فيها لغرفة تانية وقفلت الباب علي.