خربشة قصة

القصة 52

#يلا_حماس_يا_جماعة

#خربشة_قصة

_ ليه مُصِر تتقدم لي للمرة الخامسة هسي ، وكل مرة أرفضك

ابتسم ، عاين للارض وتاني رفع عينو لي

_ ما محتاجة ذكاء أفتكر ، لانو واضح السبب

_ ما أظن ، كل الرجال كذابين ! 

_ ما برد ليك ، لاني عارف المريتِ بيه

_ طيب وقت عارف المريت لسا عايز تعرسني ليه  ؟!! خلوني في حالي بس أنا لا دايرة أعرسك ولا غيرك

ومن غير ما أحس بكيت ، وقمت خليتو قاعد محلو

ليه ما مقدرين شعوري ؟
كيف بقدر أعرس تاني بعد الحصل لي من عرسي الاول .

دخلت أمي الغرفة الأنا فيها منفعلة كالعادة من وقت ما بقى هو يجي ويطلبني وانا أرفض

_ عاجبك العملتيه هسي دا ؟ ها !!

_ قولوا عايزين تتخارجوا مني ،  بس وأنا ما بعرس لا هو ولا غيرو عشان يجي يعمل زي الحيوان داك تاني  ؟!

كانت دايرة تتكلم ، بس سمعت صوت أبوي بناديها فمشت ليه ، سمعت بينهم حوار وشكلو بهّديها وبصبرها

جات أختي الصغيرة معاها أكل وبكل حسن نية وبراءة

_ ليه يا تّنو ما عايزة الراجل داك ، هو سمح وبجيب لي حلاوة كل مرة .

_ منو القال ليك إنتِ

هزت كتفا وقالت

_ براي

عاينت ليها وابتسمت لسداجتها الطفولية ماخدة الحياة ببساطة  ، يزيدو صفر علي التلاتة  سنة حقتها دي عشان تقدر  تفهمني لمن أحكي ليها  يمكن .

مسحت لي دموعي وختت الصحن وبدت تاكل هي لمن رفضت انا آكل معاها .

..........

صحيت  علي صوت تلفوني برن ، لقيتو رقم ما رديت وبعد إحاح رديت بصوت ناعس لقيت صوت بقول

_ قومي صلي ليكِ ركعتين وأدعي تتفرج همومك

عاينت للرقم لاني عرفت الصوت طبعا بنبرتو المميزة

_ إنت جبت رقمي من وين أصلا وداقي لي الساعة تلاتة صباحا  بصفتك شن...

_  أبوك هو الاداني الرقم ، يلا قومي وأدعي لي ربنا يحنن قلب واحدة كدا جامدة وما بتحس

وقبل ما إنفعل قفل فيني الخط ، طّلعت شحنة غضبي في المخدة وأديتها نصيبها من اللكمات .

طبعا في البداية ركبت راس وقلت ما بقوم أبدا ، بس تاني لعنت إبليس  ، احسن اتقرب من ربي واصلي .

في السجدة الاخيرة وأنا بدعي اتزاحمت في راسي كل الذكريات المأساوية الحصلت لي قبل سبعة شهور