خربشة قصة

القصه العاشره

بدا تعلقي بيه من من ان عمري تمنيه سنه بالتحديد ، في اليوم المشؤوم داك اتوفت امي وشالت معاها بهجتي وقتها .
نشفت الدموع من عيني

طول اليوم كنت ببكي لا باكل ولا بشرب
بس البعملو البكا
ولمن افتر اسكت عشره دقايق واواصل تاني .

كنت قاعده في ركن الاوضه ورجلي لبطني ، ما في زول الا و حاول يسكتني ،حتى ابوي ما نجح .

في الاخير استسلمو وخلوني لعلمهم بتعلقي الشديد  بامي واني بتها الوحيده  .
لحدي ما جا هو  قعد قصادي في الارض ،حاول يبتسم لي بالرغم من ألمو لفقد خالتو بس برضو حاول يطلعني من حزني .

بعد تعب ومعاناه منو رضيت ليه ووافقت اني اكل من يدو لاني كنت شبه صايمه يومها .

في ايامات الوفاه الاولى كنت زي ضلو ولا باكل اي حاجه الا معاه

كنت شايفه فيه حبه من  حنيه امي الفقتها كنت بتابعو في اي حته لخوفي انو حيخليني زي ما امي مشت .

مرت السنين وعدت ،كان دايما قصادي وقدام عيني ، لاني كنت قاعده معاهم في بيت خالتي (امو ).

دايما وابدا مهتم بي ويقول لي بعد ما   بنكيش شعري بحركه يدو

"اختي الغلباويه والمشاغبه ".

لمن كبرت ،لفتره طويله كنت بوهم نفسي والناس متوهمين  برضو اني متعلقه بيه وانو مجرد اخ لي الم ولدتو امي
بس كان كلو اوهام

لا ما حبيتو !!

لكن انا عشقتو  وحبو جرى في مجرى دمي

_(يا بت سما للمره المليون اقول ليك انتي ما اظن بتحبيه ، انتي بس متعلقه بيه من كنت صغيره ، الاحساس دا ما اظن حب ، دا تعود عليه وحبا في اهتمامو بيك وبامورك)

_(انا ذاتي قلت كدا والله يا زينب  ، انتي قايله ما فكرت كدا ؟؟! انتي صحبتي والمفروض تحسي وتعرفي بحبي ليه كيف
الحاسه بيه اكبر من كدا بكتير  ، اكبر من الحب ذاتو والله ،
انا ياخ لمن اشوفو تقول نفسي يقطع من نفسي البزيد بسبب دق قلبي ، جسمي يرجف واطراف اصابيعني تتلج ،
بتوتر جدا بمجرد ما يناديني او ينطق اسمي ساي في كلام
يا بت انا كل ما اقمض عيني ساي بشوف صورتو قدامي

، ياخ انا كل ثانيه بفكر فيه لدرجه مره خفت اني مجنونه ما اكتر ودي نفسيات
لو ما كنت بعمل حسابي في الكلام كنت ناديت اسمو بدل ما انادي اسماء الناس التانيه
، للعلم بعملها كتير بس يضحكو ويقولو لي دا كلو عشان مهتم بيك وانحنا لا
يمشوها هظار بس الفي قلبي عمرو ما كان هظار ولا حيكون .

قالت وفي عينها حزن وشفقه لحالتي ;
_(انتي عارفه انتي كدا بتتعذبي لاني الحب دا من طرف واحد ، فؤاد شايفك اختو وبس ، اختو الكبرت قدام عيونو )

ابتسمت ابتسامه شفقه علي نفسي واتحشرج صوتي من كبت الدموع ومحاربتها ما تنزل وتتدجرج علي خدودي