خربشة قصة

القصة 55

#خربشة_قصة

_ إنت واقف كدا ليه قلبها وقف ، سرعة جيبوا الصاعق

حقيقي ما كنت في كامل وعي لمن سمعت صوت صفير جهاز القلب الجنبها ، كامل تركيزي على جسدها الهزيل البنتفض لفوق وتحت .

إنتفضت لمن مسكني صحبي من كتفي ، ظاهر عليه الذهول والصدمة لحالتي

_ رائف إنت معاي ، مالك في شنو بترجف كدا ؟

وقتها إنتبهت لكل جسمي بنتفض واصلا ما قدرت أوقفو ، حقيقي ما قادر آخد نفسي ، فلمن شاف حالتي

_ إنت مضايق ،  تعال سرعة معاي المكتب وشيل بخاخك

كيف وصلت مكتبو وأخدت جرعتي وغمضت عيني كمان  ما عارف  ،لسا صوت صفير جهاز دقات قلبها في أضاني ، لو ما جا صحبي في آخر لحظة كان مشت من غير رجعة مشت والمرة دي ما في أمل ألقاها

_ بسم الله  يا رائف مالك يا زول

_ كأني ما دكتور ما قدرت إتصرف وأعمل شيء لمن قلبها وقف

_ يمكن ضيق النفس هو....

_ إتصنمت لمن قلبها وقف ، خفت أخسرا

_ خفت تخسرا ؟!!!  رائف إنت بتقول شنو ، إستهدي بالله كدا و

_ دي هي بت الثانوي ، دي القلبي من زمان رادها وهسي لقيتها

عاينت ليه ، عينو اتوسعت ، نفس صدمتي لمن عرفت انها هي قبل شهر

قبل شهر إتنقلت للمستشفى الخاصة دي مع صحبي  ، وأثناء ما بتونس سألني

_ رائف ، لسا ما فكرت تعرس يا زول العمر بيمشي وشوف انا بطفلين

_ لمن تجي صاحبة القلب

_ ههه إنتظر بت الثانوي ديك لحدي ما تعجز

_ ما عندي مشكلة

انتفض لدرجة اتشوق بالموية الشال يشربا

_ إنت بتهظر صح ؟! ما تقول لي امور المراهقة دي لسا في بالك

_ للاسف يا صحبي ما مراهقة ، دي وشمت القلب واستوطنت فيه ،كدي خلينا من دا كلو انا عايز اشوف شغلي

بعترف انا كتوم جدا ولابعد حد ، يعتبر دا أقرب صديق لي من أيام الدراسة الثانوي والجامعة ، هو الوحيد العارف بقصة بت الثانوي الحبيتها من زمان  ، كنت وقتها في تانية جامعة ، بمر دايما بجنب مدرسة ثانوية حتى اصل بيتنا .

_ البت العيونا تخوف

مجموعة من الشفع وكمان البنات البضحكو فيها وهي ماشا ومغمضة عينها وتبكي

عملت نفسي اني أخوها وهرشتهم وللصراحة يعنى ما خافوا وواصلوا بس بهمس ، مشيت جنبها وشفت عيونها صراحة جميلة بطريقة فريدة، عندها المرض النادر حق إختلاف لون العينين ومن غير ما أحس قلت