خربشة قصة

القصة98

#خربشة_قصة

_ بس أنا نفسي أمشي معاكم ...

_ المرة الجاية ، يلا يلا سرعة يا جماعة جاهزين؟!

اتكلمت امي  بعدو واصلت في الترتيبات للرحلة

بديت أعمل الاصوات الاإرادية البتطلع مني معاها حركات يدي البتضرب مرة يدي ومرة وشي 

دمعت لمن لمحت الانزعاج من أصواتي والبعملو  ، قعدت بشوفهم بحضروا للرحلة مع جيرانا  ، وطبعا ما ح أمشي معاهم عشان مرضي دا ، بس ما بإرادتي اعمل شنو .

مشوا وخلوني مع  أخوي الكبير ، لمن بتوتر وبزعل شديد بتزيد الاصوات أكتر وحركات يدي الا إرادية معاها 

_ يوووه يا "وفاء " حاولي ياخ إتحكمي في أصواتك دي ، ما عايز  إزعاج انا .

قام خلا المكان ولا إراديا اتضاعفت الاصوات ، اول من زول يستهزئ بي او يتنمر بتتعالي وتزيد ، ففضلت كدا لمدة دقيقة كاملة من الاصوات مع دموعي البتجري .

مسحتها ومشت غرفتي وقفلت الباب علي ، علي الاقل بسبب مرضي دا عاملين لي غرفة براي  عشان ما أزعجهم .

وانا سرحانة تلفوني ضرب ، ابتسمت ورديت علي " أمين "

_ أنا الليلة جايب ليك أحلي بيتزا زي ما بتحبيها

ابتسمت من جواي

_ عرفت انو مشوا رحلة وخلوني صح ؟

_ ومنو القال ليك اني عرفت

_ لانو خالتي مشت معاهم يا ذكي ، اكيد يعني عرفت من والدتك .

_ يا بت خالتي ممكن تسكتي وتفتحي الباب ، عارف اخوك قاعد ، وسر بيني وبينك كدا ما عايز اخواتك واخوك  بشوفوها ،  البيتزا دي للوشوش السمحة بس .

ضحكت وبين ضحكتي جات الاصوات الغريبة ، ما اتحرجت لانو " أمين " ود خالتي هو الشخص الوحيد البحس بيه ما بضايق من الاصوات دي

_ علي فكرة ديل اخواتي واخوي برضو مهما اضايقوا و ...

_ وعلي فكرة انا منتظر .

قفلت الخط ولبست توبي ومشيت فتحت الباب ، ناولني البيتزا سرعة وقال

_ امشي امشي دسيها في غرفتك وتعالي

ما اول مرة يعملا ، فشلتها مع حركتي الاارادية من الاصوات  ومشيت غرفتي اوديها واطلع ليه مبسوطة

لقيتو قاعد مع اخوي يتكلمو  فقعدت معاهم طرف ، ما بتظهر الحركة لو كنت مرتاحة او ما متوترة ، بتختفي وتجي بعد فترة طويلة مرة .

سرحت في ذكرياتي مع " أمين " ، طفولتي كانت قاسية بس هونها لي هو ، في نفس المدرسة الاساسية كان هو موجود معاي بس في الصفوف الفوق ، لمن زول يتنمر علي بجي اشكي ليه هو  ، بس مشى الثانوي وانا لسا ما وعيت عشان ادافع عن نفسي وقتها قعدني وفهمني ، الم قدرت استوعبو من امي وابوي لمن عرضوني للدكتور