خربشة قصة

القصة 73

#اللهم_مثله❤️❤️❤️

#خربشة_قصة

_ مالك ؟! إنت بتتكلم مع منو كل دا ؟

سمعتو إختصر المكالمة بعد ما كان مبتسم

_ في حاجة يا تسنيم ؟

_  لا بس شفتك طولت والغدا جهز من بدري

_ طيب يلا تعالي أنا مهوي

جراني ماشين علي الصفرة ، ما عايزة أكون المرة الشكاكة والبتفتش ورى راجلا
بس الأيامات دي بقى غريب وتعاملو أغرب ، يتأخر أكتر من عادتو ويتكلم بالتلفون بالدردشات كتير ، حاسة انو في حاجة .

مالك حب عمري وحياتي بعد تلاتة سنة معافرة قدرنا نتزوج ، لحظة أسطورية عديل لمن تم زواجنا لدرجةبتذكر  وقفنا عشرة دقايق  بنعاين لبعض عشان نتأكد من صحة اننا بقينا لبعض خلاص .

أول لمسة يد وحضن حلال قمة الحلاوة  وقتها همس لي

_ لو مسكت يدك بالحرام ولا حضنتك ما كان حيبقي بالحلاوة دي أبدا .

فعلا أثناء الخطوبة كان كلامنا محدود لاقصي حد  بالرغم من إنو اي  واحد فينا بعشق التاني  بس عشان ننول الحلال الطيب لازم نتنازل عن الحرام .

_ حبيبة بابا ...

جملتو دي هي الطّلعتني من شرودي وسرحاني

_ رهف صحت ؟ أديني ليها وتم أكلك

_ لا خليها معاي ، مشتاق ليها  الصغنونة دي

بدا يشاغل فيها ويلاعبا وهي تضحك وتبتسم ، ابتسمت علي حنيتو مع بتنا  

_ سرحانة وين كنتِ ؟

_ احم ... ولا شيء

إتنهد و عاين لي مسافة كأنو عايز يتكلم بس سكت ، شال رهف وجا جنبي ، باس شعر رهف وعمل نفس الحركة معاي حتى أداني أشيلا

دا زاد خوفي إنو يبعد عني وكونو بتكلم مع واحدة ومفكر يتزوج علي ، مالك ما ليه في الكلام الحرام  يا عرس يا ما في شيء .

.....

_ والله ما عارفة أعمل شنو ، تفتكري بتكلم مع واحدة تانية ؟

من خوفي ورعبي حكيت لجارتي ،  هي طوالي زادت فيني الشك

_ يا عويرة ألحقي سرعة قبل ما تلقي ضرة في راسك ، أكيد في حاجة

_ أعمل شنو ؟

_ شيلي التلفون وأفتحي المحادثات ، فتشي وراه ،  ومش قلتي لمن يشوفك تنومي بعد مرات يتكلم بالتلفون ، مثلي انك نمتي واتصنتي

قلبي دق من خوفي ، قّلبت كلام جارتي في راسي ، وحسمت قراري اني أنفذو

_ مالك !  أفتح لي تلفونك عليك الله عايزة اتصل لامي ما عندي رصيد