#خربشة قصة
_ قومي يا حنان جيبي الشاي .
قامت حنان من مكانها عشان تسوي القالتو أمها ، أما هي واصلت كلامها مع جارتا
_ أها قلتي شنو ؟
_ بس ... قام طلقا بسبب الطلعة الكتيرة
_ أصلو من يومي قلت ما بتنفع معاه ، حوامة وما بتحب الشغل .
_ والله غيتو إشتكت وقالت غير النوم ما عندو شي .
_ لو جينا للصح كل الرجال كدا ، ينوموا ويصحوا ، وجيبي وسوي وأفعلي ، كأننا خدم وهو ملك .
_ بس تقولي شنو ، الله يدينا الصبر .
جات حنان بالشاي وختتو بعدها قعدت تكتب كتابتا الما ليها حد.
عاينت ليها جارتا
_ لسا يا حنان بتكتبي ؟! من ساعتين ولسا ما خلصتي
_ والله يا خالتو رباب ،بيدونا في المدرسة كتابة كتيرة .
_ أسكتي ساي يا رباب ، من تجي من المدرسة تقعد تكتب لمن أحن عليها ، قراية ما بتقرا زي الناس .
_ دي مشكلة ياخ ... أها أنا بستأذنك حيكون الراجل جا عايزة أخت الغدا .
_ طيب ما تشربي الشاي دا أول .
_ مرة تانية ان شاء الله ، يلا سلام .
وطلعت رباب بعد ما كملوا ما هب ودب من الكلام ، دي طلقوها ودي عرسوها ودي فعلت ودي تركت ، والشكوى طبعا الم بتخلص من الرجال ، إلا القليل النادر .
يشكوا بأني رجالهم ما بيعملوا شي أو إتكاليين لابعد حد ، غافلين إنهم بيربوا أولادهم على الهسي بيشكوا منو دا .
_ يا أمي قولي لبتك دي تغسل لي هدومي .
قالها أخو حنان لامو لمن رفضت تغسل ليه .
_ حنان قومي طيب غسلي ليه بعد ما تخلصي كتابتك .
_ يا أمي أنا أغسل ولا ارتاح ولا أقرا ، زي ما عايز يقرا أنا كمان عايزة، خلي يغسل براه .
_ معليش إستحملي هو ولد.
هو ولد دي الكلمة الغرسوها في أمخاخ الاولاد
_ يا أمي ليه ما أطلع ، هسي ما ولدك دا كل يوم طالع وما سألتوه
_ لانو هو ولد وإنتي بت .
حفظوا الاولاد إنو ما عنهم رغابة ويعملوا العايزنوا لانهم أولاد .
_ خلي الباقي دا لاخوكي يجي ياكل
_ والله حقو أكتر من قسمتي
_ ياخ دا ولد ، خلي يتغذا .
_ طيب ليه هو عندو تلفون وأنا لا؟
_ لانو ولد .
_ أمشي أصحيه أنا ، كفاية نوم بعد دا، الساعة عشرة جات.
_ لا ما تصحيه ، خليه شوية
وطبعا الكلمة المعروفة لو سالت ليه ، لانو ولد !
بإختصار الامهات معظمهم ربوا أولادهم على التمييز وغرسوا فيه كلمة أنت ولد يعني، إنت الكل في الكل .
وبشكل مناقض تماما تشتكي من زوجها الاصلا إتعود على الحاجة دي وهو صغير .
زي صحبتنا دي ، تربي ولدا على إنت ولد والكل في الكل ، وتعلي صوتها على راجلا لمن عايز يعيش زي ما ربوه من قبل .
أنت تقرأ
خربشة قصة
Short Storyكل جزء قصة مختلفة ، قصيرة ودسمة ، لو بتحب الرومنسية أو بعد مرات الحزن والضحك والدراما ، حّضر مناديلك وتساليك وإتفضل إستمتع بكل قصة . مع تحياتي هبه الله حسن ،،،،، ويمكنك زياره صفحتي للروايات في الفيس بوك #روايات_هبه_الله_حسن لكل جديد وحصري
