خربشة قصة

القصة74

#خربشاتي دي كويسة علي الاقل تدعوا  ويمكن يصادف ليلة القدر ❤️❤️😍😁
يعني ما درديق والسلام 😊😌✋

#خربشة_قصة

_ في صورة مع أختك خلي تشوفها

_ الصورة ديك شينة شديد يا أمل ياخ ، لزي صور خلينا أشوف أحسن واحدة .

_ لا معليش ما بقدر ارسل ليك صوري

_ مالك محسساني إني بلعب بيك ، أنا خطيبك وكلها اقل من شهر ببقي راجلك

_ حتي لو خطيبي ما حلالي ، معليش

_ تقول من حلاوتك ! قلت ليك خالتي في أمريكا عايزة تشوف صورة خطيبتي أرسل ليها حاجة سمحة ولا أقعد أبرر ليه اخترتك ليه ووو

_ معليش صورتي مع أختك خلي خالتك  تمص ليمونة عشان الطمام من خلقتي الشينة المستعير منها دي

غصة بكاي حمتني أكمل المكالمة معاه وقفلت الخط طوالي منو ، ما أول مرة يتعامل معاي بترفّع وتكبر ويقلل من قيمتي .

كم مرة حاولت إتجاوز وأقول ما يقصد ، معليش يمكن مضايق ، الليلة بسكت بس زاد عن حدو وبقت كرامتي تتأذى من اساليبو معاي.

.....

_ إنتِ لقيتيه لمن تقولي عايزة تفسخي الخطوبة ، ما نصيحة انتِ

قالت لي اختي ، عاينت ليها بدموع وقلت

_ قصدك شنو يعني بكلامك دا ، شايفاني اقل منو يعني

_ ما قصدي يا أمل ، بس تاني ما بتلقي زيو لا وجاهة ولا قروش ولا مكانة انتِ...

_ فعلا ما بلقي زيو في أخلاقو الزفت وتعاملو البقلل مني دايما  ، دايما محسسني اني قذرة وزي جربانة ويقعد يقارن بي مع البنات دي سمحة ودي شوفيها كيف ابقي زيها ... كرامتي وين من كل دا انا

كانت عايزة تتكلم معاي تاني  بس أختي الكبيرة جات قعدت وقالت

_ ما تسمعي كلام اي زول يا أمل ، زي دا ما يلزمنا زاتو اليقلل منك ، الرجال غيرو كتار ويجي سيد سيدو ان شاء الله .

.....

_  يعني عايزة تفسخي الخطوبة ، ليه يعني السبب

_ زي ما إتلمينا بالمعروف أحسن  نبع...

إنفعل فيني مقاطعني

_ من جمالك ولا جمالك ،  أصلا امي اختارتك وما عارف علي شنو ، لا جمال ولا إهتمام ، احسن اشوف واحدة ما معقدة زيك ولا تحرجني مستقبلا ، احسن الجات منك زاتو

إنفعلت علي كلامو المسموم دا وقلت بحرقة

_ مالك انت محموق كدا ، أنا الم بشرفني واحد زيك شايف نفسو ، علي منو يا زول ألف واحد يتمناني ، ما كنت عايزة أنهي كدا بس انت الداير سبب تداري نقصك