#كرفسة_جديدة🙂🙂😈
#خربشة_قصة
_ إستغفري كل حاجة ح تبقى تمام .
_ تمام كيف وأنا ما بشوف
من يأسي قلت جملتي ، رد لي اخوي
_ استغفري يا بت ، دا كلام شنو دا ، كل شيء لخير .
دخلت امي الغرفة بعد ما ودعت الضيوف الجو شافوني بعد ما عملت الحادث ، دخلت غيبوبة يومين ولمن صحيت الدكتور قال اني الضربة اثرت في راسي وعمتني .
بكيت واتجرست ، وخوفي الاكبر كان خطيبي يخليني عشان عميت ، وقتها لو خلاني ما بقدر ولا بستحمل لانو هواي البتنفسو .
سافر برة البلد ونسبة لانها ارياف ما في شبكة إتصال عشان يعرف بالحصل لي .
طمنوني بس ما قادرة لا انوم ولا اعمل شيء .
تلفوني رد ، كانت امي جنبي ردت
_ ايوا يا جلال ... سمر
قاطعتها وقلت ليها
_ اديني ليه يا امي .
قلت جملتي بقصة بكاي بحاول ما ابكي ، صوتي زاتو فيه رجفة خوف .
_ ايوا يا جلال ..
قاطعتا حماسو وبداية سلامو ونطق باستغراب ظهر في صوتو
_ مالو صوتك كدا يا سمر ، في شنو ؟
ما قدرت اتكلم بس بكيت وهو بجاي ملهوف وخاف شديد ، امي شالت التلفون مني
_ جلال والله هي عملت حادث وعمت ...
كملت جملتا كدا وجات بسرعة ادتني التلفون
_ عايز يتكلم معاك ، بطلي بكى وانا ماشا اشوف الباب
سلمتني التلفون وخلتني معاه ، اتنهد كم مرة وهو بسمع فيني ببكي بس ، وسط بكاي
_ ا انت مم ممكن تخليني لو عايز ... تعرس ع عميانة ليه ...
رد لي ببرود
- قلتي كدا ...
_ ايوا ...
_ طيب يا ... انا هسي بقفل وبشوف الموضوع دا .
وقفل الخط مني ، وقتها بالجد شيء جواي اتكسر ومات ، ساعتين وانا بس نايمة عشان اهرب من الواقع ، من طريقتو عايز يخليني .
صحتني امي بطبطة
_ قومي ... دا كلو نوم
_ يا امي خليني انا ...
_ ولا عايزة تتكلمي معاي ...
نطيت من صدمتي لمن سمعت صوتو ، هبشت راسي لقيت لابسة طرحة شكلها امي ختتا لي
_ عايني يا بت الحلال ، كلامك القلتيه استفزاني ، اخليك ليه ، ما راجل شايفاني ، ولا مستهونة بريدتي ليك ... مع احترامي ليك يا خالتي اني اقول كلام زي دا قصادك بس بتك زعلتني ... افرضي انا البقيت عميان حتتخلي عني؟!
_ والله يا ولدي هي بس من صدمة وخوفا تخليها و...
_ دا لو ما تعرفيني تقول كدا ... المهم هسي زعلانة ليه والدكتور قال في عملية لازم تتعمل .
كل الكلام دا وانا قلبي حاميني اتكلم بس مبتسمة لمن بكيت ، طلع وامي بجاي بقت تشاكلني وكيف اقول ليه كدا وانا في عالم تاني ، من جواي كنت بصرخ اني بحبو وبموت فيه .
مرت الايام وحددوا وقت العملية ، أصّر نعقد عشان يقيف جنبي ، رغم اعتراض بعض من أهلو بس وافقوا تحت اصرارو ، وعقدنا بس فرحتي ناقصة علي عكسو بقول لي
_ احسن شيء اعرسك هسي وانتِ ما بتشوفي ، عشان ابقي انا عيونك وعصاتك ، وسندك
لحظة بلحظة معاي ، اقوي مني بمراحل لمن جا يوم العملية ، في الحقيقة عشاني باع حاجات كتيرة وما عرفت بدا الا بالصدفة البحتة ومبرراتو
_ الجمادات دي تمشي تجي ، واهم شيء هسي لي سعادتك ، ما بهمني تشوفي ولا لا عشان انا مكتفي بيك عن كل شيء ، بس انتِ حتكوني زعلانة فبحاول باي شكل كان ترضي واسعدك .
بكلماتو دي دخلت العملية ، واثقة في ربي وواثقة انو بدعي لي .
لمن صحيت قالوا لي انو من دخلت العملية هو في مسجد المستشفى يدعي .
للاسف ما نجحت العملية ، خشيت في حالة اكتئاب كبيرة بس فضل ملازمني وسفرني برة للعلاج والحمد لله بعد سنة من الجري والصبر والتعب رجع بصري
وقتها عرفت انو الله اداني نعمتين ، نعمة بصري ونعمة جلال
عمرو ما فتر ولا تعب ، هو اليشجعني ويستحمل تقلبات مزاجي الكعبة
في يوم وانا قاعدة جا داخل وقال
_ انا يا جلال مفكرة ابيع دهبي وباقي حاجات كدا
خت الكتاب الفي يدو وقال
_ ليه ؟!
ابتسمت وقلت
_ تتذكر انك كنت مخطط تسافر عمرة وكل القروش كلها اتصرفت في علاجي فهسي بالدهب...
_ ولا تكملي ، دهبك معاك زينتك وللعمرة الله بعوض وان شاء الله حنسافر قريب
اتصدمت
_ بس انا دايرة اساعدك و
_ انتِ ما دام بقيتي في حياتي ، دي اكبر هدية لي ، ولا في اي حاجة او هدية تفوت وجودك في حياتي .
أنت تقرأ
خربشة قصة
Short Storyكل جزء قصة مختلفة ، قصيرة ودسمة ، لو بتحب الرومنسية أو بعد مرات الحزن والضحك والدراما ، حّضر مناديلك وتساليك وإتفضل إستمتع بكل قصة . مع تحياتي هبه الله حسن ،،،،، ويمكنك زياره صفحتي للروايات في الفيس بوك #روايات_هبه_الله_حسن لكل جديد وحصري
