خربشة قصة

القصه14

#خربشه قصه

(_خلاص يا شذى اهدي  ، عايزه حلاوه ، طيب البسكويت البتحبيه هندا جنبك .....
يا ربي !!)

قالتا ام شذى وهي قاعده جنب بتها شذى  العمرها تلاته سنه ، كانت تبكي من غير توقف  .

دخل ابو شذى للبيت من الشغل قال بمجرد ما دخل

(_ في شنو ؟!! مالا شذى بتبكي كدا ؟!! )

شالها في رجلو  وهو يحاول يسكتا

تأففت وقالت

(_  عايزه وليد ،  من صحت  فتشتو ما لقتو بقت تبكي كدا )

(_ مشى وين  يعني  ؟؟ )

قالت وهي تشيل الحاجات الجابها زوجا

(_ ودوه العياده عيان ، لو شفتو اتشعلق قال الا يسوق شذى معاه ، بعد تعب  اقنعوه ما تمشي معاه
، وهي كمان الحمد لله كانت نايمه  والا كانت مشت مشت .)

(_ والله البت دي متعلقه  بوليد دا اكتر مني عدييل ، متعلقين شديد ببعض لدرجه كبيره ياااخ ، ما للدرجه دي )

(_ ههههه ما انت عارف ، ما شايفه شافع  غير وليد بيلعب معاها  ،بعدين دا ولد اختي ، خليها تتعلق براحتا .)

(_ لو قلنا شذى ما شايفه  شافع قدر عمرها ، بس وليد عندو اخوانو ما شاء الله  )

(_ نعمل شنو من كانت صغيره يااخ  متعلق بيها من قلنا يكبر يفتر ياهو لهسي )

سكت الابو وعاين لبتو البدت تقل بكاها باستثناء الشهقات

(_ شذى انا جبت ليك شكولاتا  ما عايزاها مني ؟!  )

قالت الصغيره

(_ بث انا عايزه ليييد ، ليييد ويييين
باااابااا جيب لي لييييد )

(_ خلاص خلاص ، خليني استحم واشيلك نمشي لوليد ، هااا اتفقنا !؟)

بشهقات متتاليه وصغيره عاينت ليه وقالت

(_ بجد ؟؟!)

(_ ايوا بجد يلا اول تسكتي عشان  اوديكي ولو لسا بتبكي ما بوديك ليه )

(_ خلاث خلاث سكت  ، اها )
ومسحت دموعها بسرعه بكل عفويه

(_ يا سلااام علي بتي العسل ، ودي الشكولاتا )

طلع الشكولاتا من جيب  بنطلونو وهو مبتسم يعاين ليها  
برقت عيونا من السعاده وقالت بفرحه ورجلا بتتحرك بسعاده

(_ يييييييي ، بس وين حقت لييييد ؟؟!)

(_ انتي اكلي دي وانا بكره بجيب ليكم الاتنين انتي ووليد اتفقنا ؟)

عاينت للشكولاتا بحزن بعدها قالت بفرحه

(_ خلاث ناكلا انا ولييد سوا .)

قام ابوها وختاها عشان يستحم ويرتاح وهي فضلت تعاين ليدها الفيها الشكولاتا .

بعد لحظه سمعت باب بيتهم يدق جرت  بشعرها العامل ضفيرتين طوال بطايرو
حاولت تفتحو بس كان اطول منها المقبض ، امها جات بوراها  وفتحتو