خربشة قصة

القصه 15

#خربشه قصه

العرق يتصبب من راسي ، الحمى الفي جسمي حسيت بيها بتغلي وتّفور  دمي 
ما قدرت انوم
  بس اتقلب واتقلب 
نزلت دمعتي  بسبب التعب الحاسه بيه وبرضو بسبب الحمى الشديده .

من غير ارادتي شلت تلفوني  ، اتصلت بيه بس عشان الوقت داك كنت محتاجاه بالجد
، كنت عايزه اسمع صوتو يطمني ، يحسسني اني مهمه عندو ويطبطب علي ..

رقدت علي شقي اليمين متكوره علي نفسي من البرد الحاسه بيه ، ختيت التلفون في اضاني من غير ما امسكو بيدي
غمضت عيني وانا بحاول اتنفس بانتظار من شده تعبي

( الو )

رد بصوتو الناعس الانا متأكده انو كان نايم وقتها ، لانو الساعه كانت تلاته ونص صباحا

وقتها ما رديت ليه ولا اتكلمت ، ليه انا ما عارفه !! يمكن عشان عايزه اسمع صوتو بس ما اكتر .

تاني بعد شاف صمتي قال .

(الو  ....انتي معاي)

رديت ليه ببحه

(ايوا يا عثمان ....)

وقتها بالجد سمعت انتفاضتو  من رقدتو ، مباشره قال بلهفه 

( رهف انتي كويسه ؟! مالو صوتك كدا !! ....)

سكت لحظه كأنو شاف ساعه تلفونو وقال بلهفه اكبر

( يا بت الساعه قربت لاربعه في شنو ؟؟ اتكلمي )

وقتها بكيت ، ايوا بكيت بكل ما فيني من قوه لكن بسبب فرحي

، كونو هو بيحبني للدرجه دي وخايف علي  بمجرد بس سمع صوتي ، طوالي عرف اني ما طبيعيه ، لهفتو دي  خلتني اسعد زول في الدنيا  .

قال بصوت اتحشرج عديل من الخوف

( رهف بالله عليك رعبتيني ، انطقي وبطلي بكا ، وانا اوعدك اي حاجه حتكون تمام )

( اسفه يا عثمان اني صحيتك زي الوقت دا ، ما تشغل بالك  ، بس كنت محتاجه اسمع صوتك )

(ياهو الخوفتيني اكتر  بكلامك دا، يااا رب ،
رهف لو صحي بتحبيني تقولي لي ، مالك ؟! انتي عيانه؟؟!)

(ايوا ، بس  ....)

قال بلهفه

( عندك شنو ؟؟ شنو بيوجعك ، من متين !؟ وليه ما وريتيني ؟؟ حاسه بشنو !؟؟ رهف اتكلمي ياخ. )

(لو صبرت من اسألتك دي انا بجاوبك ، اسكت خليني اتكلم خلاص )

(طيب سكت قولي )

( ما في حاجه مهمه كدا ، ان شاء الله الصباح ابقى كويسه و )

قال بحده

(رهف  ، اتكلمي حاسه بشنو ؟)

( خلاص خلاص من غير صريخ ، راسي واجعني لمن ما قادره افتح عيني ، حمى شديده ، وجسمي مكسر و)