خربشة قصة

القصه ال11

#خربشات قصه

(تعالي يا فرح ، اقعدي جنبي هنا عايزه اتكلم معاك )

قالتها امي بجديه دليل انو موضوع لا يقبل النقاش او الهظار فيه.

قعدت جنبها في السرير وانا مراقبه حدقه عيونها تعاين لي عشان تبدا تسرد لي كلامها

_(نعم يا امي خير )

بعد اخدت حصه كبيره من النفس لرئتها وطلعتو دفعه واحده قالت

_(للان ما فهمتك يا فرح ، انتي بت ما شاء الله اي زول يتمناك متعلمه ومتخرحه ومثقفه وواعيه ، معقول من كل العرسان الاتقدمو ليك ديل ما في واحد عجبك او علي الاقل لفت نظرك !!!)
حاولت اتكلم لكن قاطعتني

_(قبل ما تقولي حاجه انا عارفه كويس انك ما مستعجله للعرس زي ما بتقولي ولا في راسك هسي ، طيب متين لو ما هسي ، العمر ماشي وانحنا ما دايمين ليك عايزين نشوف،احفادنا كمان ولا دي امنيه كبيره)

_(لا يا امي ما كدا ، بس بالجد النقاش دا مكرر ومعاد ، انا صحي ما بفكرفي العرس حاليا ،بس لو في واحدلقيتو مناسب لي صدقيني ما حاتردد )

طلعت امي من جوفها زفره راحه وقالت
_(انا بقول كدا ليه!؟ لانو يا فرح كلام الناس كتر عليك، وليه بترفضي العرسان واحد ورا التاني من غير سبب كبير)

_(عاارفه كل دا ، بس الصبر كلام الناس ما بخلي ابدا مهما كان فما تشتغلي بيهم )

فعلا كنت برفض العرسان واحد بورا التاني لاني شايفه اني ما مستعده او ما لقيت الزول اليفهمني ويخليني اسلم ليه كل حياتي الباقيه عشان يتصرف فيها .

، اسبوع مر علي كلام امي معاي في الموضوع بس علي غير العاده اخدتو بمحمل الجد

طلعت للسوق عشان اشتري اغراض وانا واقفه انتظار  الاشاره عشان اقطع الظلط ، عيني وقعدت علي شاب مقعد في كرسي متحرك

اللفت نظري ليه انو مقعد بس بنيتو وهيبتو تخليك تتغاضى عن انو مقعد او عاجز ، بالاضافه لابتسامتو الواسعه البتحسسك بانو ضارب الهم بالفرح وجادع الزعل والاكتئاب بعيد

الكان وراه بيلزو بكرسيه  استأذن منو لمكان قريب وقال 
_انتظرني،بمشي وبجيك

_خلاص بس ما تتأخر

كلو وانا مركذه في الشخص داك بطريقه مخفيه محاوله ما اظهر اني متابعاه بعيني
لحدي ما رد علي اتصال جاه ، كان صوتو خافت وهو بيتكلم ما خلاني اسمع بيقول شنو
بس ابتسامتو البتزيد وما تنقص بتجذبني ، للحظه كشر وشو وانا لا اراديا كشرت معاه
معقول الوش البشوش دا يكشر!؟
دي حتى الكشره ما تليق بيه.

انتبهت ليه عاين وراه يمين وشمال عرفت انو بيفتش رفيقو الكان معاه ،
رجع يعاين للاشاره 
للحظه انتبهت انو الاشاره قفلت وانا ما قطعت اصلا
زفرت واتربعت اعاين فيها لحدي ما تفتح عشان اقطع الظلط