#خربشة_قصة
_ إنتِ بتعملي شنو ؟!
_ نوم ، نوم دا حلم ، إنت لسا نايم
_ كنتِ بتعملي شنو بالموس دي
_ احم ولا شيء أنا ماشا
ولا كضبت خميت التوب النصو في الأرض وجريت وبجاي سامعاه يقول
_ لا إله الا الله ...
قبلت عاينت ليه ، مسكين والله ، لسا مصدوم ، بس ليه حق ! اي والله ، يعني لمن تصحى من النوم تلقى موس قريبة من وشك عايزة تشوهك ، أكيد حتنجلط
_ أشوف فيك يوم يا طربيزة اللحام
رجعت ليه عشان أنحر عنقو بالموس المعاي دي وإرتاح من لغبو لي دا .
_ سمعني قلت شنو ؟!
عاين لي من فوق لتحت وأنا خاتة كوعي على مستعدة للافتراس ، إتجاهلني ، لا وكمان حرك راسو يمين وشمال
_ شايفني مجنونة بتتحسر عليها .
_ رزان طيري أحسن ليك
_ وقايلني خايفة منك أنا ما بمشي داير تعمل ش..... يا زول ما تعاين لي كدا أصلا ما جنبك ... شوف عامل كيف بعينك السمحة دي
طبعا آخر جملة برطمت فيها وانا ماشا ، يعنى معقول الانسان المستفز دا حيطلع كدا وقدام البتاعة الجاية الليلة تزورنا دي
_ وإنتِ كمان بتضحكي علي شنو ؟ ما بعرف كيف يجيبكم قلب أخوكم يطلع وكمان يسلم لا والأحلى يبتسم للجاية دي ، نهائي ما عندكم أحساس
_ خلينا ليكِ الإحساس يا بت خالي ، كدي قولي لي شايفاك جاية بالموس من عندو أوعى تكوني ضبحتي لي اخوي بس
_ عايني ما تجيبي لي سرتو ، هرشني بنظرة عينو الفيها رموش أكتر من حقتي ، كدي اقتعيني، دا ولد دا بزمتك ؟!!
وبعدين ما هو الغلطان قلت ليه يحلق دقنو أبى يسمع كلامي ، ولعلمك أصلا ما عايزة إتكلم معاه تاني ،يستحيل إتكلم مع الاسمو كمال دا لانو زعلني
_ كمال عايزاك توصلني
_ الصباح عايزة تضبحيني وهسي عايزة خدمة
_ عليك الله ، بعدين كان قرضي شريف ، بدل تدفع دم قلبك في الحلاقة قلت أساعدك
_ رزان لخصي ، الليلة ما طالع من البيت
يااخي الخطة فشلت ، أعمل شنو يا ربي وخلاص بت عمو الايقوقة دي قربت تصل ، قربت أبكي لمن ما لقيت فكرة وفجأة كدا عطس ، للحظة نطيت من الفرحة جريت جبت كمامتي ونضارة
_ كمال شوف بدل تعادي الناس ألبس الكمامة دي والنضارة دي عشان....
_ ما تمشي من قدامي هسي يا رزان بعلقك في المروحة دي
يا ربي ! كل خططي فشلت
ما عارفة للان كيف استحملت مياعة بت عمو وكمان تدلعو وما شنقتها ،
هو الإستغفار مية مرة كافية لغفران ذنوبي لمن أقتل البت الثقيلة دي مش ؟
_ ما قلتي لي يا رزان الحبوب الفي وشك دي ما لقيتي ليها شيء يزحها
_ في حاجات تانية أهم ازحها بدل حبوبي
_ هههه والله صحي كلام كمال ، زي طربيزة اللحام
فجأة عيوني دمعت من جمعيعي للكلمات العايزة أجلدا بيها
نزلتها أكتر لمن شفت كمال دافع عني ، ياخ والله جات الدموع من مافي والعجب الشهقات ياخ من جواي انا مصدومة بالبكى الجا فجأة دا ، والعجب لمن جا يحنس فيني ، صوتي بقى عالي من البكى.
دخلت الاوضى وقفلت الباب ، ونططتت ، قعدت مسكت المراية ببتسم وببكي ،وكل ما بتذكر نهر كمال للبت المايعة ديك بضحك بس سرعة بقلبو بكى .
_ بس برضو زعلانة منو ، كيف يطلع ليها بوشو ظاهر كدا ؟!
في يوم خالي قال لأختو تناديه ، طوالي لفحت التوب وجريت قبل ما تفكر هي تقوم ، المشكلة كنت بحالتي الم ممكن أوصفا أصلا
_ كماااااال خاا....
قطعت الكلمة لمن شفت شاب قاعد معاه ، إنسحبت بسرعة والشاب بيضحك .
جا بالجهة التانية وشو شوية وينفجر ، وقفني وبقي يشاكل
_ إنتِ نصيحة ، شوفي هسي عاين ليك كيف ، تاني بس ....
ما سمعت باقي كلامو لاني دموعي جات نازلة ، ما تفهموني غلط ! ديك دموع فرحة ، كمال بغير ، بغير يا ناس !
_ خلاص ما تبكي
_ احم هو صحبك دا ليه شايفاه بقول ليك يا وجيه كتير و....
حسيت بيه شوية وينجلط ، أنا هسي قلت شيء؟!
_ الصبر من عندك يا رب
قالها ومشا خلاني ، يعني انا عملت حاجة مثلا .
_ هههه طيب نخلي اخوي يلبس نقاب احسن
_ يعني قايلا ما حاولت اا قصدي قلت ليه يلبس كمامة ويلبس نضارة رفض
خليتها بتضحك واخوها واقف يعاين لينا وفجأة قال
_ عرسو لي البت دي بس ، بقدر بأدبى في بيتي
نططت عيني
_ انت جادي ...
ضحك وهو بقول
_ مجنونة بس بحبك
عاينت لاختو بصدمة وزعل
_ شوفتي ، انا اعمل فيه شنو مثلا
_ ما مشكلة أدبيه في بيتكم هههه
_ انت فهمتي غلط ، الضحكة دي يعملو فيها شنو بس !
طبعا في نفس اللحظة جريت علي الفيس وعملت تم الزواج وتاقيت البت ديك ايوا هي زاتها بت عمو دي خمسة مرة ، يعني لو ما شافت الاول تشوف التاني وهكذا
بعد الزواج عاينت ليه نايم بهدوء ، والليلة انحنا ماشين مناسبة وكل بنات الاسرة قاعدين هناك ، طوالي شلت الموس وقبل ما أبدا رحلة التشويه في لحيتو عشان يحلقا فتح عينو
_ بتعملي شنو يا رزان الله يهديك
- الله ! ضيعت يا كمال اللحظة الرومنسية .
أنت تقرأ
خربشة قصة
Contoكل جزء قصة مختلفة ، قصيرة ودسمة ، لو بتحب الرومنسية أو بعد مرات الحزن والضحك والدراما ، حّضر مناديلك وتساليك وإتفضل إستمتع بكل قصة . مع تحياتي هبه الله حسن ،،،،، ويمكنك زياره صفحتي للروايات في الفيس بوك #روايات_هبه_الله_حسن لكل جديد وحصري
