خربشة قصة

القصة93

#خربشة_قصة

_  بعد بكرة عرسو  ؟! ومن منو  صحبتي ؟!

إتصدمت لمن لقيت الخبر من بت جيرانا ، فضلت فترة مصدومة وهي تواسي فيني

_ لو دايرة نصيحتي ،  قلوبهم واحدة عشان كدا لقوا بعض ، يعني احمدي الله ما وقعتي ما عديم الرجولة والله كشف ليك البت ديك قبل اي كارثة كبيرة ....

وفي الحقيقة كلامها دا  باقي لي زي البعيد بعيد كدا ،  اتماسكت قدامها لحدي ما مشت وبعدو بكيت  ، كلمة بكاء قليلة اليوم داك ، حسيت في حاجة في صدري ما عايزة تطلع ، زي لمن تقيف ليك شوكة في نص حلقك وانت ما قادر تمرقا ولا قادر تبلعا

الخزلان صعب ، وشديد كمان ، كونو زول بعد ما تتعلق بيه يمشي يخليك ببساطة كدا ومن غير مقدمات ، وشوفو الاحري من دا ، يعرس صحبة عمرك العارفة بكل شيء عن علاقتك

اتصلت لي في يوم بتقول لي مبسوطة انها في واحد اتقدم ليها والعقد بعد تلاتة يوم ،  ادتني فعلا اسمو بس مشيتو هظار علي اساس انحنا صحبات وحنعرس رجال بنفس الاسماء  ، ساعدتها كتير ووقفت معاها  .

وهو معاي اتغير  ، لا برد ولا بتصل ، كنت بحكي ليها بس بتصبرني ، وما عارفة قلوبهم الوسخانة دي والبعملوه .

عقدوا بس لحدي ما يتموا العرس ، وقتها رسلت لي رسالة طويلة عريضة بتقول لي قسمة ونصيب وكلام كتير ما منو فايدة وبعدو حظرتني اما هو فلا فكر اصلا يتكلم ولا كنت منتظرة .

اسبوع كنت عايشة وما عايشة ، بعدها بعد الاسبوع دا اتقدم لي واحد ، اصرت امي اقعد معاه لانو ما اول مرة يجي لابوي وانا  زمان برفضو علي  اساس في واحد عايز يتقدم لي برفض  وامي عارفة .

_ اقعدي معاه يا خديجة  ، يمكن دا هو الخير المندسي بورا البلاء الجاكي دا .

كنت عبارة عن آلة ، كلو ما مهم  ، خلي يحصل اليحصل  ، وصلت لدرجة كبيرة من الضيق وعدم الصبر.

شفت وشوا وعاينت ليه مبتسم وبشوش وانا ما برد او لو رديت باختصار مستفز 

_ ممكن اعرف مالك ؟ خلينا من جو جاي اتقدم ولا غيرو .

عاينت ليه مستغربة شوية ولا اراديا دمعت ودموعي نزلت كأني عايزة سبب  ، اتوتر في قعدتو وما عرف يواسيني كيف 

_ كدي اهدي انتِ  ، اي شيء ما يستاهل بكاك ، الدنيا وما فيها ما تستاهل .

_ كيف ما تستاهل ، اذا زول واعدني يجي يتقدم وحتى مكلم امي  ، في يوم وليلة القاه ومن غير سبب عايز يعقد علي صحبتي العارفة بكل دا ، وما ورتني ودست مني الا عرفت من برة .

اخدت شهقة كبيرة وواصلت بكي ، ابتسم  بعد انتهيت من كلامي الم محسوب قلتو في لحظة ضعف .

_ انت هسي بتضحك علي صح ؟