خربشة قصة

القصه التاسعه

–ايوا ياخ من قبيل اتصل عليك ما بترد يا اخينا  مالك؟

رديت ليه بصوت ناعس مليان غضب لانو صحاني من احلى نومه

_ايوا يا زفت في شنو ؟ مالك من الصباح دا؟

_صباح في عينك الساعه هسي تسعه يا زول ، قوم بطل كسل ونوم ، انت عرس فرج الله دا كلو حيكون في راسك ، قوم يلا ورانا شغل كتير بكره الحنه يا خ

قعدت في نص السرير وانا بتمغى بعدو علت وتيره صوتي بغضب وانا بقول
_ياخ عايز انوم عشان اعوض الجاي ، عارف نفسي ما حانعم بنوم طويل بسبب العرس ، انحنا نتعب في عرسو وهو حضره سياتو مبسوط

سمعت ضحكه عاليه منو بعدو قال :
_علي العموم انحنا في الانتظار يا النوام نص ساعه وتكون عندنا عايزنك في اللمه والجبنه ، يلا سلام

قفل في وشي الخط وخلاني ازفر واطلع نفس الضيق بعدو جهزت نفسي بعد الفطور طبعا ، الا والطقه ما فيها مجامله ، بعدو مشيت للشباب

_اووو يا ابو الشباب نورت
_رديت ليه :بنورك يا عريس لازم انور بطلتي ولا كيف ياخ .
_هههههه انت والنوم دا بتحبو بعض شديد ، كدي خونو حبه مع بنت من بنات حواء شويه ياخ ، ما بيزعل صدقني
عاينت ليه بضيق بطرف عيني ، قلت ليه بعد ما شبعتو نظرات : انت خليك بعيد يا هادم اهم لحظات النوم ، لو ما كنت صحبي كنت مسحت راسك من وش الكره الارضيه دي كلها

ضحك الاتنين بعدو قال العريس بجديه : لا بالحد يا دفعه ، ما في واحده كدا ولا كدا وختم بغمزه .

_انتو بشر لا يطاق ، حب شنو يا طلس انت خليك انت مدبس في الجاي .

طبعا بصفتنتا اصحاب العريس كل التعب والشغل والمصايب  في راسنا لحدي يوم الحنه كان كل شي طبيعي لحدي ما لفت نظري بت تخطف الانفاس بطلتها ،
ايوا كنت ملاحظ ليها قبل كدا وما كنت مهتم بيها
كونها قريبه صحبي وبتشتغل وتساعد بالطول والعرض من قبل الحنه كمان

كانت بطله راقيه وبعيده عن التكلف دا يمكن الشداني ليها اكتر ،
عفويه وابتسامتها تلخم ، اول مره اشوفها او بالاصح اول مره ادقق فيها واشوف كيف الملاك الماشي في الارض دا
ايوا جمالها عادي وهي عاديه بس تشد الزول من رقبتو ليها ، دا كلو كوم وخجلها وحيائها كوم تاني وتالت كمان ، نادر في الزمن دا اليكون زيها وباخلاقها دي .

كنت مندمج طول الوقت معاها في الحنه  ، عيني ما نزلت من عليها.

العجب العجيب ابتسامتي الم قدرت اكبتها
ليه انا ببتسم ببلاهه كدا يااخ ؟
طيب ليه انا بعاين ليها كتير كدا ؟
دا حتى صحباتها انتبهو لي وبدو يشغلوها ليها .

تاني يوم من الحنه  كنت بحاول وبتمنى  اني اشوفها لو حتى لمحه
فضلت كدا لحدي اخر يوم في المناسبه بعد الزفاف قررت بس اني اشيل رقمها ،
_شكلي اعجبت بيها !!قلت كدا في نفسي لمن قررت وحسمت امري اني  اشيل رقمها 

_لو سمحتي
_نعم !!
_شهد ازيك وصحتك كيف؟ ومبروك ليه ؟
_بخير والله ،  الله يبارك فيك كمان عقبالك .
سكت لحظه وبعدو قلت باندفاع  عشان ما اتراجع في اخر لحظه ، دا حتى ما قلت ليها امين لدعوتها .

_من غير مقدمات انا معجب بيك وعايز رقمك دا لو سمحتي طبعا ، فلو ما ممكن كمان انا بتفهم .

في الثواني الترد ليه فيها حسيتهم ايام من خوفي انها ترفض طلبي ،

بعد تردد منها شلت الرقم ومشيت
كنت فرحان زي الطفل الادوه حلاوه كان بيبكي طول اليوم انو عايزها .

_ههههههه  صاااحبنا وقع  واخيييييرا ، دي معجزه إلاهيه من واحد ما بيعترف ويقر انو في حاجه اسمها حب ، عقبال تلحق المشا دا انت كمان. .

اتجاهلتو بفرحي ومشيت منو وانا مبتسم كأنو كسبت كنز العالم كلو ،

الفرحه ديك ما كانت تقارن ابدا بفرحتي هسي وانا ماسك يدها.

بتزكرت كل دا وكيف هي بقت  حلالي
متقدمين لبيتنا  بخطوات كل واحده بتتنافس ياتا الاكتر سعاده فيهم

فرحتي كانت كبيره لمن اكتشفت حبها لي واكبر لمن اتقدمت خطوه وطلبتها من اهلها ووافقو علي .

لكن الفرحه دي  ما بتتوصف لمن بقينا  في بيتي وبيتها تحت سقف واحد مليان بالتفاهم والود

من ما عرفت نفسي اني بحبها سعيت بكل ما املك اني ما افرط في الحب دا واسعى لكسبها جنبي طول عمري ،

اكتشفت انو الحب موجود ومقروس في البشر بس كيف ومتين يطلع ليك الحب دا  من اعماقك ويظهر للعيان ؟؟

لحدي الوقت داك عيش كدا لحدي ما تلغى الحب اليحتويك
، الحب البجد الخالي من الغدر والكذب ومن وهم  التسليه ، ما تحاول تملى الفراق دا بحب كذب وهمي وانتظر حبك الاسطوري
ما براهم غيث وليلي عاشقان  ولا جوليو ورومييت هائمان
انت كمان تقدر تكون كدا بس اصبر وانتظر  ودا بيكون تحت سقف بيت يبارك الله فيه ويبث فيه رحماتو عليكم .