خربشة قصة

القصة 65

#خربشة_ قصة

_ لسا بتبكي ؟!

سألني بس ما رديت ، خت لي الجزر في الطربيزة

_ طيب عايني للحاجة البتحبيها .

لا شعوريا قبلت لكيس الجزر فقال

_ لا كدا كتير والله ، أنا قاصد تعايني لي تقبلي علي الجزر ، بالجد بغير منو انا كدا يا مروة .

_ حسام بطل هظار ، والله أنا زعلانة منك

_ ومنو القال ليك بهظر

قالها بنبرة بالجد منفعلة، وقتها نسيت البكية والزعل واي شيء بس فاتحة خشمي سبع متر في غيرتُ البقول عليها دي ، أشّرت للكيس ولسا مصدومة بعاين ليه

_ جزر ؟! تغير من جزر ... ما جادي طبعا

زفر وكشّر وبرطم  بس سمعت كلامو البراحة دا

_ هو بقت علي جزر ،  من يوم دخلتي حياتي بقيت ما نصيح وبعمل حركات هنود عديل .

شال الكيس وختاه وراه

_ كدا أحسن عشان ما أشوفو ... أها نسيتيني موضوعي الاساسي

لا إراديا ضحكت ضحكة صغيرة وهزيت راسي  ، مسحت دمعة نزلت من عيني ، فقرب مني ومسك لي أضاني زي الشافعة بقرصني

_ ااي مالك هسي أنا عملت شنو ؟

_ عشان تحسي بحبة وجع ، ما هو ما ممكن تبكي انتِ وأنا براي بتألم .

دايما يطّلعني من مودي بأبسط شيء يعملو والمشكلة بطريقة ما مقصودة وعفوية منو .

_ نجي للجد يا مروة ونحسم الكلام دا  ...عشان ما تأذيني كل يوم بموية النار البتطلع من عيونك تحرقني أنا ...

_ نحسمو كيف يا حسام ، عملنا عملية وبنبلع علاجات وياهو خمسة سنة ما في أتر لجنين ، كلام الناس قطع جلدي

_ لو عايزين نرتاح أول،  لازم نبعد كلام الناس ، دخليه بجاي وطّلعيه بجاي ، وبالله ما تذّكريني بعمليتك ديك ، قربت إتشل فيها بسبب تعبك

_ انت الم تذكرني بجنونك ... تصرخ في الدكتور لمن يقول ليك عملية تانية وإحتمال تنفع وأحمل ... وانت لا تنفعل وتجّرني ... اصلا دا هو المبكيني الليلة وزعلانة منك

_ شوفي !
أبكي لبكرة ولسنة كمان لكن ترجعي تعملي عملية وتتعبي وأنا البموت حي ، لا شكرا ...
ما مستغني عن روحي ...
وكمان أزعلي مني وما تتكلمي وقتها ما بقول ليك العلاج المضمون اليخلينا نجيب دسة عيال .

قام بغرور من قدامي وبصفر بخشمُ ، وأنا فاتحة خشمي بعاين ليه وهو يحمر لكيس الجزر

_ خلي الكيس دا ينفعك وقتها ...

أحب أقول ليكم إني بتعامل مع شافع عمر تلاتة سنة مش أكتر من تلاتين سنة ...

لحقتُ وقعدت نص ساعة أحنس فيه