#النار تبدا بشرارة ....
#خربشة_قصة
_ يا بت عادي ، قال ما عايز ونسة بس يسلم علي ويطمن.
_ يا مريم ، انا بقول كدا لمصلحتك ، طيب فايدة الصحبة شنو بينا .
ردت لي بفتور
_ وانا فاهماك ، الولد ما كعب اصلا ، وكمان هو جارنا زمان لقي رقمي وقال لي يرسل بس في الواتس وسلام ما اكتر ، احرجوا يعني ؟!
_ في اسلوب راقي لانك تقولي ليه ما تتواصل معاي .
_ تقى ، انا بس ما عايزة احرجوا ، وسلام بس ما بضر .
وبكدا ما سمعت كلامي ، ما حبيت اضغط عليها ، شفتها اضايقت بخليتها علي راحتا .
مرت الايام وهي بتحكي لي اي شيء بيحصل ، فعلا بداية بس بسلم وترد ورد مختصر ، في يوم جاتني وشفتها مشغولة بالكتابة فسألتها
_ شايفاك مندمجة ، في شنو ؟
_ علاء بحكي لي المشكلة الزمان الحصلت بتفاصيلها كان حاضر .
_ مش قلتي سلام وبس ، متين قلبتوها لونسة .
_ تقي ، هو غريب يعني ، الدردشة ما غلط ما دام في حدود ، واصلا ما بسمح ليه باي تجاوز لو حصل طوالي بحظر .
_ مريم انا خايفة ، دي جرجرة من سلام بقي كلام وبكرة يبقى اكتر.
_ انتِ تعرفي عني اني كعبة وبرضي بالكعب ؟!
اتنهدت وقلت ليها
- لا
- طيب ما تخافي علي .
الصراحة كنت خايفة عليها فعلا ، وخصوصا منو ، شاب عاطل لا عندو شغل ولا مشغلة ، بخاف عليها بحكم صحبتي .
وزي ما خفت من دردشة بس قلبت لاتصالات ، والاتصالات اتحولت لبليل ،وشوية شوية جرت لانو قال ليها هو بحبها .
جاتني في يوم مبسوطة بتنطط ، استغربت وسألتها
_ مالك ؟ ربنا يديم الانبساط
_ قال لي بحبك يا تقي اخيرا قالها واعترف .
وبدت ترقص وتغني مبسوطة ، قلت ليها
_ طيب ما دام دايرك خلي يتقدم
- انتِ عارفة يعني هو وضعو شنو ، يجي يعرسني بشنو ؟
- وما دام عارف وضعو وانو عاطل ، يفتش شغل .
_ منو القال ليك ما بلقي شغل ، بس هو بقول انو في حاجات بتعمل ليه حساسية ، وفي اشغال صعبة ما بقدر عليها .
_ والحل !
_ منتظر يرسلوا ليه من برة عشان يسافر ، ووقتها بعين كبيرة يجي يتقدم لي .
_ طيب ما تتواصلي معاه كتير ، عارفة الحلال و...
_ تقي والله افكارك دي بتضايقو ، وبقول ما دام ما في شيء بينا غلط ما مهم .
أنت تقرأ
خربشة قصة
Short Storyكل جزء قصة مختلفة ، قصيرة ودسمة ، لو بتحب الرومنسية أو بعد مرات الحزن والضحك والدراما ، حّضر مناديلك وتساليك وإتفضل إستمتع بكل قصة . مع تحياتي هبه الله حسن ،،،،، ويمكنك زياره صفحتي للروايات في الفيس بوك #روايات_هبه_الله_حسن لكل جديد وحصري
