خربشة قصة

القصة 85

#احتمال 99%  أخفف كتابة خربشة لاني حابدا اكتب الجزء التاني لرواية #إدماني

#خربشة_قصة

_ ألف مبروك ليكم ؟

_ الله يبارك فيك

ما رديت أنا من خجلي وهو إتكفل بدا وبحماس شديد ، بعدت من المعازيم وفضلت أعاين لفرحتو  وبسمتو الكبيرة الكل مرة تزيد وما تنقص ، جسمي جاتو قشعريرة من لهفتو الفرحة دي لمن تمينا عرسنا .

قبضني بعاين ليه فابتسم وفضل يعاين لي بعمق لمن ما عرفت أعمل شنو فاضطريت اقول

_ رابح  ما تعاين لي كدا

وكأني قلت ليه عاين زادت نظراتو ، مال علي وهمس

_ إيثار ؟! أقرصيني

_ بتهظر !

- لا بجد ، عايز اتأكد انو دا ما حلم

_ لا ما حلم دا

_ قولي بس قلبك ما مطاوعك تقرصي راجلك ، مرتي ياخ

ضحك وانا عاينت ليه بضيق شوية كدا وابتسمت

عدة سنة لعرسنا ، وفي كل يوم حبو لي بزيد وانا بتعلق بيه أكتر  من اليوم القبلو ، مستحيل اليشوفنا ما يقول متزوجين عن حب بس لا ، كنت لا بعرفو ولا يعرفني ، رشحتني اختو في عزاء واحدة وتمت خطوبة كدا اتفاهمنا فيها واعجبنا ببعض وتم العرس .

_ ماشا وين يا إيثار

_ السوق ، عندي صحبتي منتظراني هناك نجيب كم حاجة كدا

_ اوصلك ؟

- لا ما في داعي ، شكرا ليك

ودعتو وطلعت مشيت السوق ، قضيت حاجاتي مع صحبتي وانتظرنا عربية بعد تعب لقيناها وركبت ، اما صحبتي انتظرتني ركبت ومشت

انا بعد ركبت اتذكرت اني نسيت ما جبت لرابح هدية
كنت عايزة اديه حاجة ولو بسيطة ابين فيه كيف اني محترماه ومقدراه ، بغض النظر عن قيمتا .

مشيت البوتيك لقيت مرة ومعاها بتها واقفين بتفرجوا  ، سلمت علي بتاع المحل وسألتو عن الساعة وعن حاجات تانية .

_ معليش معاك بدرة ولا روج ؟

- لا والله ، بس عندي مرطب

أديت البت المرطب وقلت ليها

_ بس معليش ما تعمليه قدام الناس ما ظريفة .

هزت كتفها وطلعت مرايتا وبدت تصلح وتعدل وتخت وقالت

- عادي ، ما عندي لزول حاجة

امها بتختار وتوريها مرة تعترض ومرة تقول ما بطال ، رفعت عينها من المراية حبة وسألتني اثناء ما انا بشوف

_ شكلك عروس جديد

ابتسم ورديت ليها 

- يعني ، لي سنة من اتزوجت

_ والهدية كمان ليه طبعا صح ؟

اشرت للبعاين ليه باصبعا وبنبرة سخرية سألتني

من نبرة سخريتا ما حبيت ارد ليها ، اضايقت من طريقتا واسلوبا ، جات امها جنبها طوالي حكت ليها اثناء ما بتديني المرطب

_ دي عروس بتجيب لراجلا ، الليلة تشتري ليه وبكرة تشتري سوط عشان يجلدك بيه

عاينت ليها باستغراب وضيق بنفس الوقت

_ ما فهمت قصدك ؟

_ لا لا بتي ما قصدها ، بس يعني بسبب الحصل ليها بقت تكره الرجال

_ يا امي الا تقولي ما كل الرجال كعبين

_ لا ما كعبين كلهم ، ممكن زول حصل ليه موقف بس في الكويسين

_ ما انتِ عشان عروس بتقولي كدا ، الليلة يهتم بيك وبكرة يهتم بغيرك او يزهج منك .

طلعت من المحل ومعاها امها ، لدرجة الفي المحل حركو راسهم بسخرية وضحكو ، شلت حاجاتي  ومشيت بفكر في كلامها
مشيت كم محل عشان القي حاجة ترضي ذوقو ، حسيت بالوقت مشي

رفعت تلفوني عشان اعاين الساعة لقتيتو في وضع طيران .

فتحتو لقيت مليون رسالة من صحبتي ومنو ، استغربت  ، رجعت لصحبتي اول  وقبل ما اتكلم لقيتها بتبكي منهارة

_ ايثار انتِ حية ، وااي يا رب الحمد لله انتِ... انتِ نزلتي من العربية

_ مالك في شنو ، اهدي كدي بسم الله .

_ العربية الركبتيها اتقلبت والفيها كلهم يا ماتو يا في حالة خطيرة ، الحمد لله ، راجلك قرب يجن يا ايثار حصليه هو قال ماشي محل الحادث

عيني اتوسعت وجريت بسرعة ، ركبت مواصلات تاني ولمن شفت محل الحادث الظاهر انو بشع نزلت بفتش فيه ، الناس كتار شديد والعربات والناس البتبكي انا زاتي بكيت .

بفتش فيه لمن فترت ، شفتو  قاعد خاتي يدو الاتين علي راسو  جريت عليه بعد تعب بسبب الصدمة وبنادي فيه .

الا هزيتو حتي رفع عينو المحمرة وببكي ، اول من شافني اتصنم ووقف يعاين لي دقيقة وبعدها انتفض يعاين لي من فوق لتحت  بحاول يشوف اي ضربة فيني حتي اتكلم بصوت متحرشج

_ ايثار ... في .. انتِ ... صحبتك قالت ركبتي العربية و.... انتِ كويسة ؟

ما قدرت استحمل فحضنتو وانا ببكي حاول يبعدني عنو رفضت وقلت

_ ما ركبت العربية انا ، اهدا

وقتها حضني اكتر وفضل يحمد الله كتير  .

......

اليوم داك بالليل ما قدر ينوم ، حسيت بيه بتقلب ، فتحت عيني لقيتو بعاين لي

_ لسا ما نمت انت ؟

_ ما عايز اتكلم ، عايز اشوفك بس قدامي ، عمرك ما تتخيلي كمية الرعب الجاتني لمن صحبتك اتصلت علي وقالت العربية الركبتي فيها ماتو الفيها .

_ انا جنبك

حضني عليه واتنفس بقوة

_ خليكِ دايما جنبي لاني من غيرك ما بعرف حاعمل شنو .