خربشة قصة

القصه 28

#خربشة_قصة

الصديق دا هو اليقيف معاك في الضيقة ، اليسندك في الوقعة ،

اليشيل همك قبل همو ويجيك في لحظة وقت الحوجة

بس ما كلهم كدا ، ما اي زول نديه لقب صديق يكون صادق في صداقتو

بعد مرات تجي الصداقة في شكل إبتلاء اختارو الله عشان يعرف صبرك ....وانا من بين الناس ديل

كنت لحب صحبتي وبعزها وعلي قدر عالي من الاحترام والتقدير ....

إسمها دايما ما يفارقني ودايما وابدا في سيرتها  بالخير .

لحدي ما جا اليوم الاعرفا علي حقيقتها 

في سمايه اختي  عزمتها ، فرحبت بالفكره وجات عندنا ...

علي حس البيت بيتها ما اتكلفت ابدا معاها  ...

انا مع الجوطه واللخمه وامشي وجيب لمحتها تدخل مطبقه سودا في شنطتا بس ما ركذت ولا اهتميت وواصلت مشغولياتي ...

لحدي ما سمعت مره معرفه تصرخ وتفتش فوق تحت

( مطبقتي وين ؟!  )
.
مشيت عليها مستقربه

( مطبقه شنو يا خالتو علويه ؟!)

( ما شفتي مطبقه سودا يا سجى ؟؟!  دي فيها مفاتيح البيت وقروش الصرفه ، والتلفون)

انا بفتش بهنا  وبجاي  النساوين بيتكلمو  معاها  

( ما دام فيها تلفون خلينا نضرب فيه ونشوف محلها )

وفعلا  بدو يتصلو لاحظت لربشه صحبتي وعملت نفسها بتفتش  ، دست المطبقه بين توبها الابساه ومشت لضلفه هدومي  ودا كلو ملاحظاه

فجأه قالت الكلام الخلاني اتصنم محلي

( مش دي مطبقتك ؟؟! في ضلفه سجى بين هدوما لقيتها  )

استلمت المره مطبقتا وهي تعالين لي بخيبه ، والنساوين ما رحمو وبدا يتوشوشو 

( يسرقوك وانت جاي بيتهم غيتو ناس )

(بجاحه شديده )

( انا ماشه ما يمشو يقبلو علي انا كمان )

في لحظه الكلمات كلها اتبخرت وانا مصدومه فيها ....

اختي ما خلت فيها حاجه من الشكل وامي بس تحاول تهدي الموضوع عشان ما يكبر ....اعتزرت من النساوين وهدت الوضع
سمعتها اتكلمت مع صحبتي

( بتي وثقت فيك وختتك في مقام اختها ، دا جزاتها ؟!)

فكان ردها

( هسي القومه والقعده دي كلها عشان  الحاجه البسيطه دي اصلا انا الغلطانه الصاحبتها )

وطلعت من بيتنا ومن حياتي ، وخلتني بوراها مصدومه

امي عاينت لي وقال

( البت دي مجنونه ولا حاجه ؟!! البت دي شكلها عنها نفسيات ...
تبكي ليها شنو بالله عليك الله ، دي خلقه تتبكي عليها )

ومشت خلتني   ، دخلت لاختي وقلت

( طيب بس ليه عملت كدا ؟! اتهمتني ببساطه وكانو ما عملت شي )

ضحكت اختي وقالت

( انتي يا سجى ما شفتي في الدنيا دي حاجه ،  العملتو عملتو بغض النظر عن ليه وكيف ؟! 

الاصحاب يا سجى دي دعمك وسندك بس دي الاخترتيها كانت واضح انها بتستغل فيك وجاريه ورى مصلحتا ...

صحبتك دي لمن تقيف معاك انتي براك تخجلي لوقفتها مش تقولي لي دي .

كدي هسي كل البكا دا عشان شنو ؟! موضوع تافه من واحده تافه ما اكتر ، ما تزعلي نفسك كتير )

وفعلا البكا في الميت ما يحيه ، ولا الندم يرجع الفات بس انحنا ممكن نعمل للمستقبل عشان ما نندم ، وننقي الطيب من الفاسد ودا ما يكون الا بالتجربه ، لانها خير برهان .

وزي ما بقول" "مشت_خاينة_وجات_ حانية "

ايوا مشت #الخاينه  الباعت صداقتنا من غير تمن ،وجات صحبه #حانيه علي تعوضني
بس نعم الصاحبه وعرفت كيف #حانية ؟!!
بالتجربه
زي ما عرفت #خيانة ديك
بالتجربه .