خربشة قصة

القصة 77

#مستعدين 😁😁 ... إتكرمشوا  ااا قصدي إنطلقوا للقراية 😂

#خربشة_قصة

" فضل ساعتين !"

ضحكت لمن رسل لي الرسالة الخامسة في اليوم ، وفي كل رسالة يكتب عدد الساعات الفضلت للعقد.

ضياء ، النور الضوا حياتي ، حرفيا هو مصدر سعادتي

_ إنتِ جادة حتعرسيه يعنى

_ ومالو ما أعرسو يعني

إنفعلت بحرقة ، مقللين منو ليه ؟ عشان أبكم يعني ؟!

_ مالك إنفعلتي كدا ؟ انتِ حرة

كنت عايزة أرد ليها بس أختي جات قالت للمَرة

_ لو سمحتي ما في داعي

مشت المرة تبرطم وتلوي خشمها ، قّبلت عاينت لي وقالت

_ يا بت روقي

_ أروق شنو ، هي مالا دي كأنو ضرتها جاية تكايدني ، ما شفتيها قالت في ضياء شنو

نزلت دموعي ونفسي زاد من غضبي وحزني

_ وقالت شنو في ضياء ، ما بتكلم بس بمية راجل من عينته ولدها  ، ما تنسي المرة دي ضياء السبب في سجن ولدها .

كنت عايزة إتكلم بس لقيت رسالة منو

" عرفة ...ذكريني أعاين وأسرح فيك بعدين مية  مرة بعدد تفكيري بيك هسي في الثانية الواحدة دي واشتياقي ليك "

وسط دموعي ابتسمت ، قد يكون ما بتكلم بس بفهمو انا من نظرة عينو

  ما شفت أنقي ولا أطيب منو ولا شفت في حنانو أبدا

هو السبب الرجعني من إكتئابي وكرهي لنفسي وللعالم .

إتقدم لي خمسة مرة ورفضتو في كل مرة ، دا غير محاولاتو الفردية معاي .

سألني مرة برسالة نصية

_ انتِ ما عايزة تقبلي بي عشان ما بتكلم صح ؟

ما بكذب 80% دا السبب ، بس كذبت لكن كشفني وكتب

_ خليك واضحة بس من غير كذب ، عادي اصلا متوقع رفضك لي عشان كدا

_ طيب والحل

_ ما في حل انا عايزك وما بتنازل عنك يا عرفة .

إختفى لفترة من كلامو داك بس ما إشتغلت بيه ، وفي راسي عندي الزول المكمل الم فيه عيب حيتقدم لي ويعيشني احسن  ، كنت بتكلم مع الشاب المتواعدة معاه  فقال

_ الليلة في العرس الجيتيه طالعة نجفة ، ياخ رسلي صورتك خليني أملى عيوني منها .

_ بالجد حلوة

_ حلوة زاتها بسيطة

_ طيب تمام بس تمسحها بعد كدا

_ والله بمسحا بعد كدا ، يلا بسرعة عايز اشوف مرتي المستقبلية