خربشة قصة

القصة 62

#خربشة_قصة

_ عايزة يسافرو بالزمن ويجبو صحابي يعرسوه ليك يعني ولا شنو ؟

_ ما في داعي للسخرية ، عشان قلت عايزة زول متدين وعندو خلق ودين ...

ردت لي صحبتي

_ أنا ما قلت كدا يا ورد ، يعني قللي شوية من مواصفاتك دي ، ليه ترفضي اخر عريس ، مالو بس

_ أوافق علي واحد ملقلق في صلاتو

_ ما هو قال ليك ح يتغير عشانك

_ الم داير يتغير عشان ربو ، ما حيتغير عشاني ...

_ بس...

_ خلاص أنا راضية ومنتظرة رزقي وان شاء الله ما بتنازل عن رأي ، خلوق وزو دين

قمت خليتها تبرطم وتقول علي ما عندي موضوع ، قامت علي حليها لحقتني

_ يا ورد  ... ما تفوتي العريس دا ، راجل مقرش ومرطب ، الصلاة بينو وبين ربو ...

عاينت ليها

_ كيف بينو وبين ربو ، دا حيكون ابو عيالي ويربيهم معاي ، لمن اجي اقول ليهم صلوا اكيد حيقولو لي ابوي ما بصلي انا زاتي ما بصلي ...

زفرت من عنادي وقالت

_ يا زولة لو عرستي ملتزم وزول دين حتتعاملي كيف معاه ، ديل بكونو جامدين وما بتفاهمو غير قال الله وقال الرسول

_ اجي ؟!! ومنو القال ليك ؟!  ما كدا طبعا

_ لا كدا ... شوفي براك أروي انفصلت عن راجلا بسبب شنو ما هو كان مدين
وفي أمثلة كتيرة

وفضلت  تتكلم معاي وتحاول تقنعني بالعريس الجاي وطبعا الاصرار الرهيب دا من ورى اختي ، بعد فشلت تقنعني قالت تكلم صحبتي تقوم بالواجب ، بس فضلت متشبثة بقراري ورفضتو   ، أبدا بعوض واحد ما يعرف أساسيات دينو عشان القروش .

_ هسي كدا إرتاحي لو عرستي داك كان هسي عندك اتنين وتلاتة ، شوفي مرتو مسكنها وين والدهب و...

_ الله مالي ومالو  ، رزقي بجيني ، ان شاء الله اقعد مليون سنة واخر يوم في حياتي اقضيه مع الراجل الصح مش اي زول والسلام عشان اعرس

وفضلت متيقنة وراضية وبدعي ربنا يرزقني الزوج الصالح ، والحمد لله
إتقدم لي شاب متدين وفي النظرة الشرعية فضل محافظ علي نظرتو ايوا بعاين بس بحذر ، اسألتنا كانت في حدود والكلام برضو عشان نعرف بعض ...

_ شوفي هسي تعيشي كيف مع الجامد دا يا ورد ، انا ما بقول ما زول كويس بس عايني للعاطفة شوية الحياة تبقى كيف وخاصة انت ما بتحبي الجمود

برضو ما سمعت كلامها ، وللحق قلبي أكلني ، خفت يتعامل معاي بحلال وحرام وغير كدا ما في ، ايوا عايزة متدين بس خفت من كترة الكلام .