خربشة قصة

القصه 31

#خربشة قصة

حبينا بعض خمسة سنة ونكابر بس عشان نتزوج ونكون في بيت يضمنا سوا ....

بس أهلي وأهلو كانو بالمرصاد لينا ، لمجرد وهم وغباء وجهل القبائل ...

أحقر حاجة في الدنيا لمن تفكر إنك أحسن من زول تاني ....

حاولنا بكل الطرق الممكنه وصبرنا علي امل يجي اليوم اليوافقو بينا ..

ما خليت عريس إلا ورفضتو ..وهو إستقل عديل بنفسو عشان بس ما يسمع كل يوم كلمة
( جبنا ليك عروسة )

كنا بالجد متمسكين ببعضنا ،  في يوم أسوأ من أسوأ أيامي خطبوني قصبا لود عمتي ...
يومها بكيت وبكا معاي بحرقة من غير كلمة

  ، فكرت كتير نجري من اهلنا ونعرس واليحصل يحصل بس كان  أعقل مني ...

( أنحنا علينا بس بالدعوات  والله قادر يبعد كربنا دا )

حالتي إدهورت وتعبت نفسيا ....لحدي ما تعبت ونقلوني للمستشفى ...بعد الفحوصات إشتبهو  بي بمرض خطير  ....

فورا بدون روح دقيت ليه عشان يقويني ويديني أمل في نفسي ...

من عرف جرا جري لي وطمني وساعدني عشان أرجع ثقتي في نفسي ...

بعد تلاته يوم إتصل عليه ما يرد ..

(يا ربي يكون هو إتخلى عني عشان مرضي  اللسا ما  ثبت  ولا  الحاصل شنو )

مليون ألف فكرة وفكرة شوم جات في راسي والقلق عليه برضو ما رحمني ...

في اليوم الرابع إتصل علي

بلهفه تسألتو مالو
في الاول رفض يوريني بس بعد الضغط عرفت إنو عمل حادث وشبه اتشلى ...

انا من صدمتي جريت وخليت المستشفى وليه بسرعه مشيت ...

رغم غضب أهلي لمن عرفو وغضب أهلو أكتر من موقفي دا

بس برضو كان كل  همي  هو

محتاج لي حاليا محتاج وقفتي ...

أنا مرضي طلع سلبي  ومجرد اشتباه

... قبلو بسبب اشتباه المرض  دا إتخلى عني الخطبوني ليه بحجه واهية زيو

وقتها رده فعلي كانت مختلفة عن اي بت اتعرضت للموقف دا 

فرحت ونططت وزغرت ووزعت حلاوه عديل
اما زولي وقفت معاه وساندتو  لحدي ما بقدره الله بقى كويس بس في عرج طفيف قالو حيفضل بيه طول عمرو بس ما هماني ولا حيهمني ...

في اللحظه ديك بس عرفت إنو كانو عايزين ليه بت عمو وبعد موقفا من الحادث ونفورا منه إتقاضو من الفكرة وإستسلمو لقرارو ...

بعد شهر تم عرسي ليه ...منو فينا الكان ممكن يصدق إننا ممكن نكون لبعض ...

بعد جهد جهيد وتعب ورفض بعض من الافراد من اهلي واهلو لعرسو بس برضو كنا كأننا طايرين فووق السحاب ...

منو اسعد مننا وقتها في اللحظه القالو لينا عقدو ..ما في زول ...

مرت السنة الاولى بس
اهلو واهلي خلاص فكرة اننا ما  ننفع مع بعض ولازم نفترق عشان نلدي  كان كل يوم يعرضوها لينا بطريقه ابدا ما لايقه .....

عشان فترنا من كلامهم سافرنا عديل منهم وخلينا ليهم البلد كلو

مرت اربعه سنه ...4 سنة من المعاناه من اهلي واهلو  برضو ...
(ما بتلدو ما تنفعو مع بعض ...اطلقو احسن )

الاهانات بتصلنا لحدي عندنا ...دا سبب ليه  ولي بعض من النفسيات ....

لحدي ما في يوم ظهرت المفاجئه إني حامل ...
وقتها من الفرحة جسمي اترعش وهو ما عرف أصلا يتصرف ولا يقول شنو من فرحتو  ...

بعد استوعب حرفيا نطط زي الشافع الصغير ..

عمري ما حانسى كيف كان رده فعلو دي ..كان اسعد زول في الدنيا بكا وبكيت من فرحتي ....

عدت الشهور ومضت ، اهلي واهلو اخيرا  فرحو لينا في حاجة بس برضو ما في زول فكر يتكلم معانا ..

ودا كلو بسبب قبيلتي  وقبيلتك ...تفكير جاهل .

ولدت والفرحة الاكبر كان لمن عرفت اني حألدي توأم ...سعادة  كدا بس الا الله يعلم بيها  ...

مرت ستة شهور علي ولادتي ....وللاسف مرض عيالي  دخلنا المستشفى بيهم

في يوم حسيت بولدي اتحرك حركة غريبة ...اتخلعت فضلت بس اعاين فيه لحدي ما استكان وانا بس اعاين فيه ....
اتشليت حرفيا من غير اي كلمة ...

دخل زوجي واتصدم لحالتي قبل ما يعرف الحاصل شنو ....
لمن فهم  انو واحد من عيالنا مات حضني عليه  قوي وانا لسا في صدمتي ....

ما تم كم دقيقه عشان نستوعب الحاصل
توأمو  برضو بحركة غريبة فاجئنا

...وقتها رجفت اكتر وخلاص حسيت الدنيا لفت بي ...

لحدي ما ولدي  استكان ومن غير حركة وبعدها مات ....

حاول زوجي يطلعني من الغرفة بس كنت طوبه بس تعاين لاولادا  الماتو قدام عيونا ...من غير حياه ...

من الصدمة قربت اجن بس كان هو اقوى مني وكفتني كم كفه كدا لحدي ما رجعت للواقع وصرخت صرخة اتلمت المستشفى كلها علينا بسببا ...

حالتنا الانهيار كان قليل عليها ...ما في زول شاف منظرنا ولا سمع بيه ساي الا وبكا معانا ...

لحدي ما خارت قواي واغمى علي ...

اهلي لمن عرفو بالحصل حنو علي وقالو لي اجي بس رفضت ...

عدت سنه تانيه علي حالنا دا لحدي ما حملت من جديد ...
بقدر ما كنت فرحانه كنت خايفه ...

ولدت بت كنت بخاف عليها جدا  وابوها برضو ..
بس الحمد لله كانت متعافيه وفي اقل من سنه حملت بتلاته توائم

عرفت انو الله عظيم وكيف بعد المعاناه دي كلها حياتي نورت باطفالي ...مع زوجي القليله عليه كلمه رائع ..صابر محتسب متمسك بي وعطوف ...

الدنيا مآسي ..بس الصبر لازم يكون ملازم ليك عشان تلقى الحاجه السمحه ...