#اتذوقوا حرف حرف 👌👌
#خربشة_قصة
_ علي الله بس ما يخليك زي الفات يا رحاب .
_ خطيبي الفات هو الخسران علي فكرة .
رديت لخالتي ، هي الربتني بعد وفاة امي ، وابوي عرسها .
خطيبي السابق كان اخو صحبتي ، حاول يتقرب مني فقلت ليه بحسم
_ ابوي موجود ممكن تتكلم معاه .
زعل شديد في البداية واتكلم مع اختو عشان تقنعني ، قال عني معقدة وصعبة ومتشددة زيادة عن اللزوم .
_ والله يا صحبتي انتِ عارفني ، اخوكِ لو انا عاجباه كدا يواصل ولو لا البنات غيري كتار .
اتوقعت ما يواصل ويجي لابوي بس فاجئني بوصولو البيت واتفقوا مع ابوي ، وبقت فترة خطوبة .
بس للاسف يا ريت ما وافقت
_ كيف يعني ؟! انا خاطبك لشنو ما تطلعي معاي .
_ بمحرم بينا ما مشكلة او لو في مكان عام قدام الناس باذن اهلي ، بس في المكان القلتو دا وبرانا ، معليش .
قفل فيني الخط ، فكرت انهي الخطوبة بس خالتي وقفت لي وقالت كيف ارفضو ، زول ما يتعيب ودا بمبدأ القروش والقروش ثم القروش .
رضاء ليها قلت اصبر عسي ولعل يتعدل ، بس دخل في منطقة حساسة وهي عباداتي .
_ من قبيل بتصل ليك ، شوفي كم مكالمة داقي انا يا رحاب .
_ معليش كنت بصلي .
_ انتِ صلاتك دي ما بتنتهي ؟ كل ما اتصل ليك بتقولي صلاة ، ولا دي حجة عشان ما تردي .
_ لا لحظة ، صلاتي ؟!! عشان انا العملتها الصلاة دي مش ، وبعدين دي ما مشكلتي انك بتدق في وقت غلط ، ما بتصلي ولا شنو انت؟
_ لا وجينا بتصلي ولا لا كمان .
_ انت فاير كدا مالك ، تقول داير سبة للشكل معاي.
انفعل فيني ...
_ ما انتِ الكل مرة دا حرام ، دا غلط ، صلاتي ، بصوم خلاص كملتي الدين وانحنا الكفار .
_ خلصت ؟!
_ ايوا زفت
_ حاجاتك بتلقاها جاهزة الليلة العصر .
وبكدا فسخت الخطوبة رغم اعتراض الحوليني والصراحة زعلت صحبتي مني ، حاولت اراضيها بس رفضت لي وقالت اني بزيد عليه وبدلع وما في داعي للتشدد دا كلو .
فقلت ليهم
_ والله ما برضي بشر علي حساب ربي ، الله الخلقوا يجيب لي الاحسن منو .
كمية الفخر الفي عين ابوي ما تتوصف ودا القواني .
بقوا ناس الحلة ما عندهم سيرة غير الشيخة رحاب ، رفضت ، وما عندها حق ، ومتشددة ونشوف لو جاها عريس ، يجيها كيف دي اصلا !!
كلو يصلني وخالتي مؤيداه
_ انتِ رافضة اي علاقة مع ولد ، ولا التعارف حتي ، وريني بس كيف حتعرسي ؟!!
ابتسمت بثقة
_ لا علاقتي بولد تجيبو، ولا تعارفي يجيبو
اصلا دا مقدر ومكتوب زي موتك ورزقك وحياتك ، ما بتفتشو براه بجيك فما خايفة ، رزقي بجيني لحدي عندي .
مشت مني وقالت كلامي فلسفة ما ليها علاقة بالواقع ، بس انا مقتنعة ، وواثقة في ربي .
اتجاهلت كلام الناس والتزمت بكلام ربي ....لحدي ما حصل الاتحديت كل الناس انو حيحصل لي في يوم وهم يقولوا مستحيل .
صاحب ابوي وصل من برة ، ابوي كان طاير من الفرحة وضبح ليهم عديل وعزمهم ، صاحبو جا هو وولدو وزوجتو
مرة واحدة اتواجهنا فنزلت راسي واتراجعت حتي الصراحة هيئتو ما شفتها لاني غضيت بصري .
ما عّدا اسبوع من الكلام دا ، طلبني من ابوي وقتها واستخرت
اكتشفت غلطي الكبير في خطوبتي الفاتت اني ما استخرت ووافقت طوالي عليه من غير مشورة ربي .
المرة دي استخرت وحسيت براحة كبيرة جدا تجاهو ، رغم اني اصلا ما شفت هيأتو بشكل كبير كدا لمن اقرر دا حيكون شريك حياتي ولا لا .
وجات النظرة الشرعية ، ولخطوبتي الفاتت والحصل فيها سألتو
_ لو حصل بينا نصيب ان شاء الله ، بتتضايق يعني من عبادتي .
اتعجب لدرجة فضل لثواني مستغرب سؤالي ، بعدها قال
_ انتِ قلتي عبادة يعني لو انا رفضت دا ، انتِ مفروض ما تكملي معاي .
ابتسمت لردو وقلت
_ ما هو سؤالي عشان اعرف حاواصل معاك ولا لا علي اساس الجواب .
ابتسم ...
_ انا لي الشرف اني ارتبط بواحدة ملتزمة زيك .
_ يعني ما شايفني معقدة ولا متشددة زي ما بقولوا
_ وبقولو كمان شيخة ما تنسي ، دا علي اساس الدين دا محصور علي فئة معينة ، او كمان بقي غريب علي الناس فبستنكروا ويتعجبوا من الزول الملتزم ، انتِ دخليه بجاي ومرقيه بجاي .
حسيت بعيوني بتلمع ، ابتسمت وقلت بحماس
_ طيب انت ما عايز تسألني ؟
ابتسم اكتر وقال
_ لقيت كل اجوبتي واكتر من سؤلك ، وفخور باختياري ليك .
وتم الزواج، شتان المقارنة بين خطيبي السابق ومعاوية .
في فترة الخطوبة ملتزمين لابعد حد ، عجبني شديد وكبر في عيني اكتر ، في مرة قال لي
_ انتِ اثبتي لي كلامي انو البت الم منقبة ملتزمة برضو ، يعني الالتزام ما ضروري بس لمنقبة والباقين لا .
كان كل يوم برسل لي رسائل تذكير لذكر معين او دعاء وكل يوم لصلاة قيام الليل .
رزقني الله بواحد احسن من داك ، بالخَلق والخُلق والدين والمعاملة والطيبة والمال .
شفت عوض ربي بيه الكنت واثقة بتحقيق امنيتي ودعائي .
الله حقق لي امنيتي بالملي .
الله بديك بمدي حسن الظن فيه وايمانك وثقتك ، واتذكر ما في مستحيل علي خالق المستحيل .
أنت تقرأ
خربشة قصة
القصة القصيرةكل جزء قصة مختلفة ، قصيرة ودسمة ، لو بتحب الرومنسية أو بعد مرات الحزن والضحك والدراما ، حّضر مناديلك وتساليك وإتفضل إستمتع بكل قصة . مع تحياتي هبه الله حسن ،،،،، ويمكنك زياره صفحتي للروايات في الفيس بوك #روايات_هبه_الله_حسن لكل جديد وحصري
