ငါဒီရုပ်ရှင်ထဲကူးပြောင်းလာဖူးတယ် « 这个电影我穿过 »

အခန်း ၂၅: အစစ် သို့မဟုတ် အတု

{Unicode}

အခန်း ၂၅: အစစ် သို့မဟုတ် အတု

သူမထိန်းချုပ်နိုင်စွမ်းဆုံးရှုံးသွားပြီ။

နင်နင်ကချန်ကွမ်းချောင်ရဲ့ခါးပေါ်မှာထိုင်နေတယ်။ သူမလုပ်တာကမှားနေတယ်ဆိုတာကို သူမသိတယ်။ သူမရပ်တန့်ချင်ပေမဲ့ ရပ်လို့မရဘူး။ ဘာဖြစ်လို့လဲဆိုတော့ ချူနင်အာရဲ့ပုံရိပ်က သူမရဲ့အနောက်မှာပေါ်လာခဲ့ပြီဖြစ်လို့ပဲ။

ချူနင်အာရဲ့မီးကျွမ်းထားတဲ့လက်တွေက အနောက်ကနေဆန့်ထွက်လာပြီး သူမရဲ့လက်တွေပေါ်ကိုအုပ်မိုးကာ ချန်ကွမ်းချောင်ရဲ့လည်ပင်းကို ရက်ရက်စက်စက်ညှစ်လို့နေတယ်။

"ဟင့်အင်း!" နင်နင်သူမရဲ့နှလုံးသားထဲမှာအော်ဟစ်လိုက်တယ်။ "ဟင့်အင်း! ငါဒီလိုလုပ်လို့မရဘူး!"

"ဘာကအရေးပါလို့လဲ?" ချူနင်အာကသူမရဲ့မေးစေ့ကို နင်နင်ရဲ့ပုခုံးပေါ်မှီထားတယ်။ သူမကပိုပိုပြီးအစစ်အမှန်နဲ့တူလာတယ်။ ချူနင်အာရဲ့မေးစေ့က သူမရဲ့ပုခုံးပေါ်ကိုထိုးစိုက်ထားတဲ့နာကျင်မှုကို‌တောင် နင်နင်ခံစားမိလာတယ်။ "ဒါကရုပ်ရှင်လေးပဲကို၊ နင်ကြိုက်သလိုလုပ်လို့ရတယ်၊ နင်သူ့ကိုသတ်လိုက်လည်းကိစ္စမရှိဘူး၊ သူကအစစ်မှမဟုတ်တာ"

"ငါ့အတွက်စဉ်းစားပေးသလို လာဟန်ဆောင်မနေနဲ့!" နင်နင်ဒေါသတကြီးပြောလိုက်တယ်။ "နင်ကငါ့ကိုအသုံးချပြီး ချန်ကွမ်းချောင်ကိုသတ်ချင်နေတာ၊ သူကချန်ကျွင်းယန့်ရဲ့မြေးဖြစ်နေလို့!"

ခဏလောက်တိတ်ဆိတ်သွားပြီးတဲ့နောက်မှာ ချူနင်အာကအေးစက်စက်ရယ်လာတယ်။ "ဟုတ်တယ်၊ ငါသူ့ကိုသတ်ပစ်ချင်တယ်! ငါသာအသက်ရှင်နေသေးရင် ငါ့မြေးလည်းသူ့အရွယ်လောက်ပဲရှိလောက်ပြီ၊ ငါသာအသက်ရှင်နေသေးရင်..."

အဲ့ဒီစကားလုံးတွေနဲ့အတူပွင့်အံကျလာတဲ့ သူမရဲ့နာကျည်းမှုက နင်နင်ရဲ့လက်တွေကနေတစ်ဆင့်စီးဆင်းသွား‌ပြီး ချန်ကွမ်းချောင်ရဲ့လည်ပင်းကို ပိုပြီးပြင်းပြင်းထန်ထန်ညှစ်လာတယ်။

နင်နင်ကခဏလောက်အထိကို မလိုမုန်းထားတဲ့အမူအရာမျိုးတပ်ဆင်ထားပြီး အချိန်အနည်းငယ်ကြာမှ ခေါင်းကိုခက်ခက်ခဲခဲလှည့်ကာ နင်ယွီရန်ကိုရုန်းကန်ရင်းပြောလိုက်တယ်။ "ငါ့ကိုတား"