{Unicode}
အခန်း ၆၂: အတိတ်မေ့ရောဂါ
"အား!!" နင်နင်။
"အား!!" တစ်ဖက်လူ။
နင်နင်အော်တာကကြောက်လို့ဖြစ်တယ်။
တစ်ဖက်လူအော်တာက အိပ်ရာပေါ်ကနေကန်ချခံရလို့ဖြစ်တယ်။
"ယွင်လင် နင်ဘာဖြစ်နေတာလဲ?!" တစ်ဖက်လူကသူမကိုအော်ပြောလာတယ်။ ဒီအသံကနည်းနည်းရင်းနှီးနေသလိုပဲ...
နင်နင်မီးအိမ်ခလုတ်နှိပ်လိုက်တယ်။ တစ်ဖက်လူရဲ့မျက်နှာကိုတွေ့ပြီးတဲ့နောက်မှာ နင်နင်လည်းသံကုန်အော်ဟစ်လိုက်တယ်။ "လီဖင်းဖင်း နင်ဘာဖြစ်နေတာလဲ?!"
ကြမ်းပြင်ပေါ်ကနေထလာတဲ့လူက အခြားဘယ်သူမှမဟုတ်ဘဲ သူမရဲ့အခန်းဖော်၊ လီဖင်းဖင်းပဲဖြစ်တယ်!
သူမကဆံပင်သွားကောက်လာရုံတင်မကဘူး ယန့်ချင်လိုမျိုးပန်းပွင့်ရိုက်ဂါဝန်ပါဝတ်ဆင်ထားသေးတယ်။ ဖေရွှမ်ရဲ့အိမ်မှာချိတ်ထားတဲ့ ဓာတ်ပုံထဲကနဲ့တစ်ပုံစံထဲပဲ!
"...နင်ဘာဖြစ်လို့ယန့်ချင်လိုပြင်ထားတာလဲ?" နင်နင်သူမကိုဒေါသတကြီးကြည့်လိုက်တယ်။ "ငါ့ကိုလန့်သေအောင်ခြောက်မလို့လား?"
လီဖင်းဖင်းကအချိန်အကြာကြီးငိုထားတဲ့ပုံပေါ်တယ်။ သူမရဲ့အိုင်းလိုင်နာက မျက်ရည်စီးကြောင်းနှစ်ခုအဖြစ်ပေပွလို့နေတယ်။ သူမကနင်နင်ကိုအေးစက်စွာကြည့်လာတယ်။
"သူယန့်ချင်ကိုကြိုက်တာတော့ ငါစောဒကတက်စရာမရှိပါဘူး၊ ယန့်ချင်ကလှတယ်လေ၊ ဘယ်ယောက်ျားမဆို သူ့ကိုသဘောကျနိုင်တာပဲ၊ ဒါပေမဲ့နင်ကဘာမလို့လဲ?" သူမကရုတ်တရက်ပြောလာတယ်။ "သူသာမန်မိန်းကလေးမျိုးလိုချင်တာဆိုရင် ဘာဖြစ်လို့အဲ့ဒါကငါမဟုတ်ဘဲနဲ့ နင်ဖြစ်နေရတာလဲ?"
နင်နင်ခဏတာအံ့အားသင့်သွားပြီးမှ သူမကိုမေးလိုက်တယ်။ "နင်ဖေရွှမ်နဲ့သွားတွေ့လာတာလား?"
ဘာတွေဖြစ်သွားခဲ့လဲဆိုတာကို နင်နင်စဉ်းစားကြည့်လို့ရတယ်။ "မနက်တုန်းက ငါပြန်လာမယ့်အချိန်ကိုမေးတာ မဆန်းတော့ပါဘူး၊ ငါပြန်လာပြီးတော့ နင်သူ့ကိုသွားရှာခဲ့တာလား?"
YOU ARE READING
ငါဒီရုပ်ရှင်ထဲကူးပြောင်းလာဖူးတယ် « 这个电影我穿过 »
Mystery / ThrillerFan translation of 这个电影我穿过 [I've Transmigrated Into This Movie Before] Author 梦魇殿下 [Mèngyǎn diànxià (Her Highness, the nightmare)] Status in COO 174 Chapters (+ 2 Extra Chapters) ©️ Cover illustration is fully credited to Z...
