Unicode
ယွီကျစ်ယွီသည် ခရီးဆောင်အိတ်ကို ချလိုက်ပြီး ပထမထပ်တွင် အခန်းရှိမရှိ စစ်ကြည့်လိုက်သည်။
ဖူဟန်သည် ဒုတိယထပ်ရှိ မာစတာခန်းမှ ရုတ်တရက် ထွက်လာကာ "မင်း ပထမထပ်မှာ နေလို့မရဘူး"
"အာ?"
ယွီကျစ်ယွီက ထောင့်ဆုံးရှိအခန်းကို လက်ညိုးထိုးပြပြီး "အဲ့အခန်းထဲမှာ ကုတင်တစ်လုံးနဲ့ ဗီရိုတစ်လုံးရှိတယ် ၊ ဘာလို့ အဲ့မှာမနေရတာလဲ"
"အဲ့ဒါက သက်တော်စောင့်တွေနဲ့ ယာဥ်မောင်းတွေအတွက် အနားယူအခန်းပဲ။ ကျန်တဲ့အခန်းတွေကလည်း AV အခန်း(audio visual room)၊ အစည်းအဝေးခန်းမ၊ gymခန်းနဲ့ ရုံးခန်းတွေပဲ"
"အို့"
ယွီကျစ်ယွီ တစ်ချက်ကြည့်လိုက်ပြီး မှန်နေတာတွေ့လိုက်ရ၏။
"ဝိုး..ပထမထပ်က ကုမ္ပဏီအသေးစားလေးနဲ့တူတယ်"
"တတ်လာခဲ့"
ဖူဟန်ပြောပြီးတာနဲ့ ဒုတိယထပ်ရှိလက်ရန်းကနေပျောက်သွားလေ၏။
"ကောင်းပြီ"
ယွီကျစ်ယွီ ချက်ချင်းပဲ ခရီးဆောင်အိတ်ကိုယူသွားပြီး သီချင်းလေးညည်းရင်း အပေါ်ကိုပြောင်းလေသည်။
ဖူဟန်ပြန်ဆင်းလာတာကိုတွေ့လိုက်ရသောအခါ သူလှေကားမှာပဲရှိသေး၏။
ဖူဟန်သည် လင်းပိုင်အရုပ်နှင့် ခရီးဆောင်အိတ်ပေါ်ရှိ ကာတွန်း စတစ်ကာတွေကို တွေ့လိုက်သောအခါ မျက်မှောင်တို့စုကြုံ့သွား၏။ ယွီကျစ်ယွီတစ်ယောက် ခရီးဆောင်အိတ်ကို အပေါ်ထပ်သို့သယ်လာတာကို မြင်ရတဲ့အချိန်မှာ ပိုလို့တောင် မနှစ်မသက်ဖြစ်သွားပြီး "ဓာတ်လှေကားရှိတယ်လေ"
"ဓာတ်လှေကား? ဘယ်မှာလဲ?"
"ကျစ်"
ဖူဟန်က သူ့ကိုမရှင်းပြဘဲ ခရီးဆောင်အိတ်ကိုဆွဲယူပြီး သယ်သွားလေသည်။
ယွီကျစ်ယွီ ကမန်းကတန်း လိုက်သွားပြီး ထောင့်နားကို လျှောက်သွားရင်း လျှို့ဝှက် ဓာတ်လှေကား တံခါးကို တွေ့လိုက်ရတယ်။
"အဲ့တော့ ဒီမှာ ဓာတ်လှေကား ရှိတယ်ပေါ့။ ဒီဇိုင်းက အရမ်းမိုက်တာပဲ။ ကျွန်တော် ဒါကို ဗီရိုလို့ထင်နေတာ။ လောင်ကုန်း ခင်ဗျားနေရာက တကယ်ကို ကြီးတာပဲ။ ဘာလို့ အိမ်နှစ်လုံးက တူတူပဲကို ဆန့်ကျင်ဘက်အခန်းနဲ့က အရွယ်အစားကွာခြားတာလဲ? ကျွန်တော် နားလည်ပြီ၊ တိုက်ခန်းနှစ်ခုကြားက အရွယ်အစားကွာခြားချက်က ပွဲကျင်းပမယ့်နေရာရဲ့ အရွယ်အစားကွာခြားချက်ပဲ၊ ဟုတ်တယ်မလား? အရမ်းအံ့သြစရာကောင်းတာပဲ.."
YOU ARE READING
ဇာတ်လိုက်နဲ့စေ့စပ်ပွဲပျက်ပြီးနောက် သူ့ဦးလေးနဲ့လက်ထပ်လိုက်တယ်
Romanceဖူဟန် × ယွီကျစ်ယွီ
